Daan Langeveldt

in Wikipedia, die vrye ensiklopedie

Daan Langeveldt is ’n joernalis en vir ’n ruk redakteur van die tydskrif Keur.[1] Hy skryf ontspanningslektuur, veral spanningsverhale en liefdesverhale.

Skryfwerk[wysig | wysig bron]

“Dossier Q-013 streng vertroulik” (1969) is ’n spanningsverhaal in die Klub 707-reeks. “Spore in die ruigtes” (1976) is ’n spioenasie-verhaal. Braam Retief is aantreklik, ryk, besit ’n wildplaas en ’n spoghuis en tree as akteur in rolprente op, maar is ook ’n meedoënlose en gewetenlose spioen vir sy land. René Steenkamp is ’n jong filmster wat nog droom oor haar eie huis en man en kinders en sy is baie lief vir Braam. Sy onstandvastige lewe veroorsaak egter dat sy troos soek by die standvastige Frans le Roux, ’n film-regisseur. Braam ontmoet vir Olga Schmidt, een van Oos-Duitsland se gewildste verhoogsterre, vrou van ’n knap Duitse wetenskaplike en ma van ’n lieflike blondekopdogtertjie. Hulle raak bevriend en kry albei hoofrolle in dieselfde film wat in die donker oerwoude van Afrika afspeel. Wat Braam nie weet nie, is dat sy met ’n doel na Suid-Afrika gestuur is en dat die veiligheid van haar man en kind afhang van die sukses van haar sending en of sy die inligting wat hulle verlang, uit Braam kan kry. In “Dorp van skande” (1978) verlaat Frans Myburgh die dorp Steynskloof onverwags en keer dan jare later net so onverwags terug. Sy terugkeer verander die inwoners se lewens ingrypend, want hy weet nou waarom Rina Verhoef te vroeg dood is.

Verskeie liefdesverhale van hom word gepubliseer. Toe Erika Basson in “Gister se skadu's” (1975) gekroon is as Mejuffrou Suid-Afrika en boonop die liefde wen van Gerrit de Vos, het sy aanvaar dat die toekoms mooi sal wees. ’n Vreemdeling maak egter sy verskyning en dreig om al haar toekomsdrome te vernietig.  “Twee paaie na geluk” (1975) is Herman Scheepers se verhaal. As jong seun moes hy magteloos toekyk hoe sy skimmelperd Sieraad van eienaar verander en die meisie waarop hy verlief was, Ilse, hom duidelik laat verstaan dat Sieraad nou aan haar behoort. Baie dinge en mense verander in die jare voordat hy hom as plaaslike geneesheer in die praktyk van ou dokter Chris van Rooyen vestig. Nou is hy die man na wie die omgewing se mense hulle wend in ’n oomblik van siekte of pyn. Almal kom na hom toe. Ook Petro Vermaak, die speelmaat van destyds wat so skielik ’n vrou geword het; Dries Lategan, wie se baie plase en baie geld hom voorheen baie mag gegee het; en selfs Ilse.

“Altaar van geluk” (1979) verskyn aanvanklik as ’n tydskrifvervolgverhaal. Tertius word as senior mediese student gedwing om sy kursus te staak weens finansiële probleme. Elma is in haar liefde vir hom bereid om baie op te offer om dit te verhoed, selfs haar eie mediese studie, die sekuriteit van die verlede en die goeie verhouding met haar ouers. Sy trou met Tertius en gaan werk sodat sy vir haar man se studie kan betaal. Tertius worstel met sy trots en dit lei tot ’n verwydering tussen hom en Elma. Hy moet besluit oor ’n aantreklike aanbod van die skatryk sakeman Magnus le Roux, wie se dogter Marié nie haar gevoelens teenoor hom verberg nie. Die koerantman Martyn Verhoef sien in “Sonja” (1980) sy vakansie-meisie se foto in die koerant, die dag nadat sy sonder waarskuwing vertrek het. Die artikel is van ’n suikerboer se vrou wat verdwyn het. Sy joernalistieke intuïsie sê vir hom dat iets nie pluis is nie en hy wil nie glo dat Sonja hom doelbewus bedrieg het nie. Hy verbind hom dus daaraan om haar te help opspoor en die gebeure rondom haar verdwyning te ontrafel.

In “Ons, die skuldiges” (1981) sien nuuskieriges hoe dokter Chris Fouché laataand uit die huis van sy verpleegster, Adele Rousseau, kom. Die skindertonge is los oor hy nie tuis is by sy vrou, Elma, nie en ook oor Adele se verlede. Sy is geskei en het ’n kind. Dinge is egter meer ingewikkeld as wat dit op die oppervlak lyk. Chris en Elma se huweliksbootjie het gestrand die dag toe hulle daarin geklim het, Chris en Adele ken mekaar al van sy hospitaaljaar en dit was Chris wat vir Adele oorreed het om op hierdie klein Vrystaatse dorpie vir hom te kom werk. Dit word ook gou duidelik dat Adele se verlede haar gaan inhaal en dat sy nie altyd op die vlug sal kan bly nie. Eendag gaan dit opdaag, met verreikende gevolge. “Tussen liefde en haat” (1981) speel af op die plaas Berg-en-Dal, wat aan die kluisenaarskrywer Paul Barnard behoort. Sandra Petzer aanvaar Paul se aanbod om privaat klasse vir sy seuntjie te gee. Sy kom egter gou agter dat daar duistere geheime op Berg-en-Dal is. Paul se vrou, Janie, het op die berg op die plaas verongeluk, maar die buurman insinueer dat dit meer as ’n ongeluk was. Sandra begin vrae stel en kom dan op ’n aantal ongerymdhede af, sodat sy later nie meer weet wie om te vertrou nie. Dit is egter seker dat haar lewe ook in gevaar kan wees.

In “Blare in die wind” (1982) staan Tanya le Roux se moeder op troue met die veel ouer en baie ryk Ben Cronjé. Sy kinders Henri, Louise en Helen, is heftig gekant teen die troue. Veral Henri en Louise doen alles in hulle vermoë om die huwelik te laat skipbreuk ly en gebruik Tanya se blitshuwelik drie jaar gelede in Parys as wapen om druk op haar uit te oefen. Tanya swig eindelik en besluit om haar moeder te versoek om nie met Ben te trou nie. Dan neem die lewe sy eie loop en Tanya, Louise en Henri besef mense is maar nes blare wat deur die lewenswind rondgewaai word. In “Einde van ’n droom” (2010) swig Emil Laubscher voor druk van sy vrou Julie en hulle het ’n pragtige seuntjie, Mark. Tog bly die vrees by Emil huiwer dat die ongeneeslike siekte waaraan sy broer op jong ouderdom dood is, ook in sy gene skuil. Dié vrees het ook ’n invloed op sy huwelikslewe, en hy en Julie begin uitmekaardryf.

Publikasies[wysig | wysig bron]

Jaar Publikasies
s.j. Dit is my erfenis
Geheim van die klowe
1969 Dossier Q-013 streng vertroulik
1975 Gister se skadu’s
Twee paaie na geluk
1976 Die pad wat ons geloop het
Spore in die ruigtes
1977 Die dogters van Sybrand Jordaan
1978 Dorp van skande
1979 Altaar van geluk
Man uit die verlede
1980 Sonja
1981 Ons, die skuldiges
7 Tussen liefde en haat
1982 Blare in die wind
1983 Waar die seewind ruis
Prinses van die duine
2010 Einde van ’n droom

Bronnelys[wysig | wysig bron]

Internet[wysig | wysig bron]

Ander verwysings[wysig | wysig bron]