Daniël Lötter

Daniël Lötter
Gebore	7 Julie 1973 Fraserburg, Suid-Afrika
Ouer(s)	FJ Lötter (gebore Aberdeen, Oos-Kaap, 12 Oktober 1946) Babs Lötter (geb Van der Merwe, Fraserburg, Noord-Kaap, 2 Maart 1948)

Daniël Lötter is 'n Afrikaanse skrywer en akademikus. Hy is gebore op Fraserburg in die Noord-Kaap, waar hy tot Standerd 5 ingeskryf is by die Hoërskool Fraserburg. Hy het 'n jonger broer, Johan. Lötter se ouers is beide verbonde aan die Suid-Afrikaanse Polisie. Die gesin verhuis in 1986 na George, waar hy matrikuleer aan Hoërskool Outeniqua in1991. Na skool studeer hy in die teologie en raak dan betrokke in die Uitsaaiwese. Hy werk as Programopsteller, nuusredakteur en aktualiteitshoof by Suid-Kaap Stereo vanuit die Oudtshoorn Ateljee (1996 tot 1998), waarna hy oorsee verhuis.

Van 2000 tot 2006 is hy verbonde aan 'n Toerismefirma in Londen, Verenigde Koninkryk, en studeer deeltyds verder. Hy is ook betrokke in die Radio- en Televisiebedryf in Londen en werk ook in Nederland en Denemarke. Hy behaal die grade BA Ed en BSc Kommunikasiekunde (cl). Hy keer in 2006 terug na Suid-Afrika en is sedertdien verbonde aan ’n TVET-kollege in die Kaapse Wynlande as Programbestuurder: Vaardigheidsontwikkelingsprogramme. Hy fokus hoofsaaklik op die opleiding van Opvoeders in die sektor van Vroeë Kinderontwikkeling.

Hy is sedert 1998 betrokke by Arbeidsgenot en die Langenhoven Gedenkfonds, gemoeid met die instandhouding en bevordering van die letterkundige nalatenskap van CJ Langenhoven en dien tans op die Direksie van die Langenhoven Gedenkfonds. Sedert 2022 is hy ook betrokke by die Breytenbach Sentrum op Wellington waar hy op die Direksie van die Sentrum dien en fokus op die letterkundige nalatenskap van Breyten Breytenbach, die bevordering van die Afrikaanse woord- en digkuns en ook die uitvoerende kunste by die Bôrdienghuis Teater van die Breytenbach Sentrum

Hy debuteer in 2020 met 'n bundel sketse oor die Karoo en die Karoo se mense en legendes. Uit hierdie boek vloei twee bundels waarin hy die mees opspraakwekkende moordsake in die Suid-Afrikaanse regsgeskiedenis herbesoek. Drie bundels van verhale oor Suid-Afrikaanse spoke, legendes en rare karakters uit die geskiedenis volg en in 2024 publiseer hy 'n boek oor Koninklikes van die wêreld en hulle bande met Suid-Afrika. Die boek is tans in herdruk. Hy skryf 'n kortverhaal saam met Francois Bloemhof vir 'n versamelbundel, "Sewe keer sondig" en sy kortverhaal, "Wanneer kom die reën, Manie?" word opgeneem in die Woordfeesbundel van 2025.

Lötter se liefde vir die geskiedenis kom uit sy familie-agtergrond met sy oupa aan vaderskant, die legendariese oom Rooijan Lötter van Farewell, Aberdeen, wat ten tyde van sy sterfte in 1982 die langslewende Kaapse Rebel van die Anglo-Boereoorlog was. Stories oor die geskiedenis en die mense van die vroeë tyd was deel van grootword, ook van die kant van sy oupagrootjie, oom Danie Geldenhuys van Williston, wat self die Anglo-Boereoorlog deurleef het en op 98jarige leeftyd eers oorlede is.

Lötter is betrokke by 'n aantal leeskringe en Boekklubs in die Boland. Hy woon tans in die Paarl.

Publikasies

• Die grootpad is 'n grondpad — 'n Koffiekuier by Karoomense. Protea Boekhuis. 2020
• 17 maal moord - 'n Grieselrige reis. Protea Boekhuis. 2020
• Ware spookverhale van Suid-Afrika. Protea Boekhuis. 2021. ISBN: 9781485313007
• 14 maal moord. Protea Boekhuis. 2021
• Dwars – rare karakters onder ons. Protea Boekhuis. 2022
• Gedaantes en gedoentes – stories oor spoke, sieners en legendes. Protea Boekhuis. 2022. ISBN: 9781485314233
• Blou bloed. Koninklike spore in Suid-Afrika. Protea Boekhuis. 2024. ISBN: 9781485315421