Danny Jordaan

Danny Jordaan
Jordaan by die 2009 Wêreld Ekonomiese Forum oor Afrika
Burgemeester van Nelson Mandelabaai
Termyn 18 Mei 2015 – 18 Augustus 2016
Voorganger	Benson Fihla
Opvolger	Athol Trollip
Lid van die Parlement van Suid-Afrika vir die Oos-Kaap
Termyn 1994–1997
Persoonlike gegewens
Gebore	Daniel Alexander Jordaan 3 September 1951 (1951-09-03) Port Elizabeth, Kaapprovinsie, Suid-Afrika
Politieke party	African National Congress
Beroep	Anti-apartheidsaktivis, prokureur, dosent, sokkeradministrateur

Daniel Alexander "Danny" Jordaan (gebore op 3 September 1951) is die president van die Suid-Afrikaanse Sokkervereniging (SAFA). Hy is 'n voormalige dosent, politikus en anti-apartheidaktivis. Hy het Suid-Afrika se suksesvolle 2010 FIFA Wêreldbeker-bod gelei, die eerste suksesvolle een vir Afrika, sowel as die land se onsuksesvolle bod vier jaar tevore vir die 2006 FIFA Wêreldbeker, en was die uitvoerende hoof van die 2010 FIFA Wêreldbeker Suid-Afrika. Hy is ook die voormalige burgemeester van die Nelson Mandelabaai Metropolitaanse Munisipaliteit, en het vanaf Mei 2015 tot Augustus 2016 gedien.

Hy het FIFA in verskeie hoedanighede gedien, insluitend as 'n Algemene Koördineerder vir die Jeug-Wêreldbeker (nou FIFA o/20 Wêreldbeker), die 2001 FIFA Konfederasiebeker en die 2002 FIFA Wêreldbeker in Korea en Japan. Hy was ook 'n wedstrydkommissaris vir die 2006 FIFA Wêreldbeker en 'n lid van die 2006 FIFA Wêreldbeker Organiseringskomitee. Hy het op die 2010 FIFA Wêreldbeker Organiseringskomitee en die Konfederasiebeker in 2009 se Organiseringskomitee gedien.