De Maandbode

in Wikipedia, die vrye ensiklopedie
Jump to navigation Jump to search
Prof. Jan Lion Cachet, in 1873 stigter van De Maandbode.

De Maandbode was ’n godsdienstige nuusblad met noue bande met die Gereformeerde Kerk wat van 1873 tot 1894 gepubliseer is, deurgaans op Burgersdorp. Dit is die voorloper van Die Kerkblad, wat die GKSA besit en wat sedert 1894 op Burgersdorp uitgegee is, maar einde 1904 na Potchefstroom verhuis het saam met die Teologiese Skool Burgersdorp.

Die eerste uitgawe het op 1 April 1873 onder redaksie van prof. Jan Lion Cachetop Burgersdorp verskyn as De Maandbode. Die uitgewer was aanvanklik St. P. O'S. O'Brien en later J.J. McNally. In die eerste uitgawe is die blad se strewe deur sy subtitel verwoord: "Nuusblad toegewy aan die belange van die Gereformeerde Kerk in Suid-Afrika." Prof. Cachet het aanvanklik De Maandbode op eie rekening en risiko uitgegee om die horison van gemeentelede in die hele kerkverband te verbreed, skole onder die pioniersvolk te propageer, en om die lidmate sendingbewus te maak.

Nadat prof. Cachet Burgersdorp in 1875 verlaat het om leraar van Philipstown te word en daarna sowat nege jaar lank predikant van Steynsburg (1883–'92) was, het ds. Dirk Postma, ook prof. Cachet se opvolger aan die Teologiese Skool, De Maandbode by hom oorgeneem. Ná ds. Postma se dood in 1890 het die Sinode van 1891 proff. Cachet en Stephanus Postma, ’n seun van ds. Dirk Postma, gevra om die publikasie voor te sit. Die Sinode van 1894 het De Maandbode aan die kuratore en professore van die Teologiese Kweekskool toevertrou en terselfdertyd die naam verander na Het Kerkblad. Dieselfde Sinode het prof. Cachet vas aangestel as enigste professor in die teologie aan die skool van die Gereformeerde Kerk op Burgersdorp om die volle predikante-opleiding te behartig en die rektorskap van die skool met sy voorbereidende afdeling waar te neem.

Bronne[wysig | wysig bron]