Gaan na inhoud

Denny (hibriedhominien)

in Wikipedia, die vrye ensiklopedie
Denny (hibriedhominien)
'n Beeld van die fossiel.
Algemene naam "Denny" (Denisova 11)
Katalogusnommer DC1227
Spesie Eerstegenerasie-hibriedhominien
Ouderdom 90 000 jaar
Plek ontdek Denisovagrot, Altaigebergte, Siberië
Datum ontdek 2012
Ontdek deur Viviane Slon, Svante Pääbo et al.

Denisova 11 (ook genoem "Denny") is 'n fossiele spesimen van ~90 000 jaar oud. Sy was 'n 13-jarige vroulike hibried tussen 'n Neanderdaller en Denisovamens.[1][2] Tot op datum is sy die enigste eerstegenerasie-hibriedhominien wat nog ontdek is.[3] "Denny" se oorblyfsels bestaan uit 'n enkele gefossileerde fragment van 'n lang been wat ontdek is tussen meer as 2 000 visueel onidentifiseerbare fragmente wat in 2012 in die Denisovagrot in die Altaigebergte in Rusland opgegrawe is.[2]

'n Span navorsers aan die Universiteit van Oxford onder die argeoloog Tom Higham het 'n manier van proteïenvingerafdrukke en die ontleding van mitochondriale DNS (mtDNS) gebruik om die fragment te identifiseer as dié van 'n argaïese mens wat van Neanderdallers afstam.[4]

Genomiese volgordebepaling en ontledings onder leiding van die paleogenetici Viviane Slon en Svante Pääbo van die Max Planck-instituut vir Evolusionêre Antropologie het onthul "Denny" is die afstammeling van 'n Neanderdallermoeder en Denisovavader.[1][3] Boonop het haar genoom daarop gedui dat haar vader ook 'n klein persentasie Neanderdallerafkoms gehad het van 300 tot 600 generasies voor sy leeftyd.[3]

Dié verbasende data het sommige paleontoloë laat spekuleer dat verbastering tussen Denisovamense en Neanderdallers taamlik gereeld plaasgevind het gedurende sekere tydperke van kontak oor baie duisende jare.[3] Verder het die bevindings die hipotese ondersteun dat soortgelyke patrone van 'n genetiese mengsel, of verbastering tussen argaïese en moderne mense, kon gelei het tot die gedeeltelike absorpsie van Denisovamense en Neanderdallers in moderne menslike bevolkings.[3]

Ontdekking

[wysig | wysig bron]

Die vonds bestaan uit 'n enkele beenfragment van sowat 2 cm lank wat in 2012 deur Russiese argeoloë in laag 12 van die oosgalery in die Denisovagrot opgegrawe is.[5] Die grot is geleë in die Denisovavallei in Siberië, Rusland.[2] In dié tyd was die oorsprong van die been onbekend omdat dit saam met duisende ander, onbeduidende fragmente van die grot geargiveer is.[4]

Die Denisovagrot in die Altaigebergte.

In 2015 het Thomas Higham en Katerina Douka[6] besluit om nuwe wetenskaplike metodes te beproef om te kyk of hulle menslike oorblyfsels tussen die duisende ongeïdentifiseerde beenmonsters op die terrein kon vind. Met die samewerking van die hoofopgrawers op die terrein het hulle verskeie sakke met duisende stukkies ongeïdentifiseerde bene teruggeneem na die Universiteit van Oxford. Die navorsers het proteïenafdrukke van die Denisovabene vergelyk met dié van diere en mense van bekende oorsprong, en hulle het bevind een van die bene (DC1227) behoort aan 'n argaïese mens.[4][7][8] 'n X-straalskandering het gewys die oppervlak het merke op wat 'n aanduiding was dat dit dalk deur die spysverteringstelsel van 'n dier, waarskynlik 'n hiëna, beweeg het.[4] Direkte radiokoolstofdatering het gewys die spesimen is ouer as 50 000 jaar, en die volgordebepaling van haar mitochondriale DNS het gewys Denisova 11 het 'n volgorde wat ooreenstem met dié van 'n Neanderdaller.[4]

Verdere werk by die Max Planck-instituut, waar vorige voorbeelde van Denisova-DNS ontleed is, het nog sleutelbewyse opgelewer.[7] Viviane Slon, Svante Pääbo en ander het "Denny" se gemengde herkoms ontbloot deur te bevestig haar mitochondriale DNS, wat sy van haar ma geërf het, is van Neandalleroorsprong, terwyl 'n deel van haar kern-DNS wat sy van haar pa geërf het, Denisovaans is. Die publisering van hulle resultate in 2018 het die eerste direkte bewys verskaf van die verbastering van argaïese mense.[7] Dit is beskryf as 'n "landmerkontdekking" wat ons begrip verander van hoe hominiene in wisselwerking was en kan help om die storie oor argaïese en moderne mense te herskryf.[9]

Die storie word vertel in Tom Higham se boek "The World Before Us: How science is revealing a new story of our human origins"[10]

Verwysings

[wysig | wysig bron]
  1. ↑ 1,0 1,1 Warren, Matthew (22 Augustus 2018). "Mum's a Neanderthal, Dad's a Denisovan: First discovery of an ancient-human hybrid". Nature. 560 (7719): 417–418. Bibcode:2018Natur.560..417W. doi:10.1038/d41586-018-06004-0. PMID 30135540.
  2. ↑ 2,0 2,1 2,2 Vogel, Gretchen (22 Augustus 2018). "This ancient bone belonged to a child of two extinct human species". Science. doi:10.1126/science.aav1858. S2CID 188160693. Besoek op 22 Augustus 2018.
  3. ↑ 3,0 3,1 3,2 3,3 3,4 Slon, Viviane; Mafessoni, Fabrizio; Vernot, Benjamin; de Filippo, Cesare; Grote, Steffi; Viola, Bence; Hajdinjak, Mateja; Peyrégne, Stéphane; Nagel, Sarah; Brown, Samantha; Douka, Katerina (6 September 2018). "The genome of the offspring of a Neanderthal mother and a Denisovan father". Nature (in Engels). 561 (7721): 113–116. Bibcode:2018Natur.561..113S. doi:10.1038/s41586-018-0455-x. ISSN 1476-4687. PMC 6130845. PMID 30135579.
  4. ↑ 4,0 4,1 4,2 4,3 4,4 Brown, Samantha; Higham, Thomas; Slon, Viviane; Pääbo, Svante; Meyer, Matthias; Douka, Katerina; Brock, Fiona; Comeskey, Daniel; Procopio, Noemi; Shunkov, Michael; Derevianko, Anatoly (29 Maart 2016). "Identification of a new hominin bone from Denisova Cave, Siberia using collagen fingerprinting and mitochondrial DNA analysis". Scientific Reports (in Engels). 6 (1): 23559. Bibcode:2016NatSR...623559B. doi:10.1038/srep23559. ISSN 2045-2322. PMC 4810434. PMID 27020421.
  5. ↑ Hood, Marlowe (22 Augustus 2018). "Neandertal mother, Denisovan father—Newly-sequenced genome sheds light on interactions between ancient hominins". Phys.org. Besoek op 22 Augustus 2018.
  6. ↑ "PalaeoChron Project ERC". Geargiveer vanaf die oorspronklike op 18 Augustus 2014. Besoek op 30 Junie 2024.
  7. ↑ 7,0 7,1 7,2 Wei-Haas, Maya (22 Augustus 2018). "Ancient Girl's Parents Were Two Different Human Species". National Geographic. Geargiveer vanaf die oorspronklike op 22 Augustus 2018. Besoek op 22 Augustus 2018.
  8. ↑ "Novel collagen fingerprinting identifies a Neanderthal bone among 2,000 fragments". University of Oxford. 29 Maart 2016. Besoek op 1 April 2016.
  9. ↑ Zhang, Sarah (22 Augustus 2018). "Scientists Stunned By a Neanderthal Hybrid Discovered in a Siberian Cave". The Atlantic. Besoek op 22 Augustus 2018.
  10. ↑ Higham, Tom (2021). The World Before Us: How science is revealing a new story of our human origins. Penguin/RandomHouse. ISBN 978-0241440674.

Skakels

[wysig | wysig bron]
Ontsluit van "https://af.wikipedia.org/w/index.php?title=Denny_(hibriedhominien)&oldid=2836378"