Dessau-Roßlau

in Wikipedia, die vrye ensiklopedie

Dessau-Roßlau

Kaart Wapen
Vlag
 Land Vlag van Duitsland Duitsland
 Deelstaat Sakse-Anhalt
 Koördinate 51°15′N 12°15′O / 51.250°N 12.250°O / 51.250; 12.250
 Stigting Laat 12de eeu
 Oppervlakte:  
 - Totaal 244,79 vk km
 Hoogte bo seevlak 59 m
 Bevolking:  
 - Totaal (31 Desember 2022) 79 655[1]
 - Bevolkingsdigtheid 325/vk km
 Tydsone UTC +1 (MET)
 - Somertyd UTC +2 (MEST)
 Klimaat  
 - Tipe Gematigde klimaat
 - Gemiddelde jaarlikse temperatuur
 - Gem. temp. Januarie/Julie
 - Gemiddelde jaarlikse neerslag
 Burgemeester Robert Reck (onafhanklik)
 Amptelike webwerf dessau-rosslau.de

Dessau-Roßlau is 'n selfregerende stad in die Duitse deelstaat Sakse-Anhalt. Die stad het as gevolg van 'n administratiewe hervorming op 1 Julie 2007 met die samesmelting van Dessau en Roßlau ontstaan en is tans die derde grootste stad in Sakse-Anhalt ná Halle en Maagdeburg. Die grootste stede in die omgewing is Halle (40 kilometer suid van Dessau-Roßlau), Leipzig (52 kilometer suidoos van Dessau-Roßlau) en Maagdenburg (sowat 65 kilometer noordwes van die stad).

Gerekonstrueerde vooraansig van die Bauhaus Dessau, ontwerp deur Walter Gropius
Die Dessau-Wörlitzse Tuinryk

In historiese opsig was Dessau die hoofstad van die vorste- en latere hertogdom Anhalt-Dessau en Anhalt. Dessau was sedert die 18de eeu – toe dit tot een van die beduidendste sentra van die Duitse verligting ontwikkel het – 'n bakermat van belangrike vernuwings en ontwikkelinge op sosiale, ekonomiese en opvoedkundige gebied. Die harmoniese wêreld van tuine, parke en slotte, die sogenaamde Dessau-Wörlitzse Tuinryk in die rivierlandskap tussen Elbe en Mulde, dateer uit die 18de eeu. Die Dessau-Wörlitzse Tuinryk is in 2000 deur Unesco as wêrelderfenisgebied gelys.[2]

Later het die bekende Duitse nyweraar en lugvaartpionier Hugo Junker sy vliegtuie in Dessau vervaardig en 'n nuwe tydperk in die geskiedenis van die lugvaart ingelui. Met die befaamde kunsskool Bauhaus het Dessau 'n groot invloed op die internasionale argitektuur, kuns en ontwerp uitgeoefen. Die Bauhaus Dessau is in 1996 deur Unesco as wêrelderfenisgebied gelys.[3] Dessau-Roßlau is ná Weimar net een van twee Duitse stede wat twee Unesco-wêrelderfenisgebiede huisves. Net Berlyn het drie inskrywings.

Die gebied van Leipzig-Halle-Dessau is tans een van die beduidendste ekonomiese groeipunte in die oostelike deelstate van Duitsland. Dessau is die setel van belangrike instellings van die deelstaat Sakse-Anhalt en die Duitse Federale Buro vir Omgewingsake (Duits: Umweltbundesamt).

Verwysings[wysig | wysig bron]

  1. (de) Statistisches Landesamt Sachsen-Anhalt, Bevölkerung der Gemeinden – Stand: 31. Dezember 2022
  2. (en) "Garden Kingdom of Dessau-Wörlitz". Unesco. Geargiveer vanaf die oorspronklike op 4 Mei 2020. Besoek op 13 Julie 2017.
  3. (en) "Bauhaus and its Sites in Weimar, Dessau and Bernau". Unesco. Geargiveer vanaf die oorspronklike op 30 April 2020. Besoek op 13 Julie 2017.

Eksterne skakels[wysig | wysig bron]