Dnister

in Wikipedia, die vrye ensiklopedie
(Aangestuur vanaf Dnjestr)
Dnister
Die Dnister in die noorde van Moldowa
Die Dnister in die noorde van Moldowa
Die Dnister in die noorde van Moldowa

Die stroomgebied van die Dnister.

Oorsprong Karpate (Oekraïne)
Monding naby Odessa, Oekraïne, in die Swartsee
Stroomgebied Oekraïne, Moldowa (Transnistrië)
Lengte 1 362 km (846 myl)
Oorspronghoogte 1 000 m (3 300 voet)
Mondinghoogte 0 m (0 voet)
Gemiddelde afloop 310 m³/s (11 000 vt³/s)
Stroomgebiedopp. 68 627 km² (26 497 myl²)

Die Dnister (Oekraïens: Дністер; Roemeens: Nistru; Russies: Днестр, Dnestr) is 'n rivier in Oos-Europa wat deur Oekraïne en Moldowa vloei. Die rivier, wat deur die antieke Grieke Tyras genoem is, ontspring in die Karpate, net oos van die grens tot Pole en mond in die Swartsee uit. Die rivier het 'n lengte van 1 352 km, terwyl die stroomgebied 72 100 km² beloop. Die Dnister is na die Dnjepr die tweede grootste rivier in Oekraïne en die grootste in Moldowa. Die Dnister vorm die westelike grens van die wegbreek-republiek Transnistrië in Moldowa. Transnistrië is na die Roemeense naam van die rivier (Nistru) genoem, en beteken dus letterlik "oorkant die Nistru", vergelyk Transkei. Transnistrië se hoofstad en grootste stad Tiraspol is langs die Dnister geleë.

Die Dnister in Rîbnița, Moldowa/Transnistrië
Die Dnister naby die Ottomaanse vesting Tighina in Moldowa

Oorspronklik het die Dnister uitsluitlik deur Oekraïnse gebied gevloei. Eers nadat Roemeenssprekendes hulle vanaf die laat 14de eeu in die gebiede oos van die Karpate-bergreeks en in Bessarabië gevestig het, het die Dnister tussen Mohyliv-Podiskyi en sy monding (wat gelykstaan aan sowat 'n derde van sy totale lengte) die etniese grens tussen Oekraïens- en Roemeenssprekende gebiede begin vorm. Rivieraf van Rybnica het Roemeenssprekende gebiede selfs tot die Dnister se linkeroewer gestrek. Sodoende is byna 'n kwart van die Dnisterbekken buite Oekraïenssprekende gebiede en buite die huidige grense van Oekraïne geleë. Van 1918 tot 1940 was die helfte van die rivier (vanaf Chotyn) die grens tussen Roemenië en die Sowjetunie.

Die Dnister is die belangrikste rivier in Galisië, en so word na dié streek soms ook as Naddnistriansjtsjina (Land aan die Dnister) verwys. Die rivier se historiese en etnografiese betekenis as die simbool van die vorstedom Galisië-Wolhinië was ook ná sy ondergang sterk genoeg dat skrywers soos die Wes-Oekraïense romantici Markian Sjasjekewitsj en Joeri Fedkowitsj dit in hul werke met 'n soort vroomheid beskryf het. In die name van Galisiese instellings en organisasies word dikwels na die Dnister verwys.[1]

Verwysings[wysig | wysig bron]

Eksterne skakels[wysig | wysig bron]

  • Wikimedia Commons logo Wikimedia Commons het meer media in die kategorie Dnister.
  • (en) "Dniester River". Encyclopædia Britannica. Besoek op 10 Maart 2019.

Koördinate: 46°21′0″N 30°14′0″O / 46.35000°N 30.23333°O / 46.35000; 30.23333