Doddington (skip)

in Wikipedia, die vrye ensiklopedie
Die Doddington.

Die Doddington was 'n Oos-Indiëvaarder van die Britse Oos-Indiese Kompanjie wat by Voëleiland in Algoabaai, naby die huidige Port Elizabeth, gestrand het op 17 Julie 1755.[1][2] Die skip het goudskatte, wat aan Clive van Indië behoort het, vervoer. Die skatte is later deur skattejagters geplunder, en hierdie voorvalle het bygedra tot die onlangse veranderinge aan internasionale maritieme verdrae om onderwater kulturele erfenisse beter te beskerm.

Skipbreuk[wysig | wysig bron]

Onder die bevel van Kaptein James Sampson, seil die Doddington op 22 April 1755 vanaf Dover in Engeland na Fort St. George in Indië, en word begelei deur die Stretham (met Clive van Indië aan boord), die Pelham, die Edgecote en die Houghton. Die skepe is op pad na Porto Praya geskei, maar ontmoet weer by die hawe, waar hulle ge-anker het om voorrade op te neem. Op 27 Mei 1755 vertrek die drie skepe saam uit die Kaap Verdiese Eilande, maar word weer geskei nadat die kaptein van die Doddington 'n meer suidelike roete as die ander skepe geneem het. Na sewe weke, het die Doddington om die Kaap van Goeie Hoop geseil, en nadat dit ooswaarts gevaar het vir nog 'n dag, het die skip om 1 uur op die oggend van 17 Julie 1755, 'n rots getref en gestrand in Algoabaai.

Van die bemanning en passasiers van 270, het 23 aanvanklik oorleef. Die skipbreukelinge het vir sewe maande van die vis, voëls en eiers geleef, op 'n nabygeleë eiland, wat hulle Voëleiland genoem het. Een van hulle was 'n skrynwerker, wat hulle in staat gestel het om 'n sloep te bou, wat hulle die Happy Deliverance genoem het.[1][3]Met hierdie sloep, was hulle uiteindelik in staat was om die eiland op 16 Februarie 1756 te verlaat, en teen die ooskus van Afrika op te reis oor St. Lucia tot by Delagoabaai,[1][4] waar die oorlewendes die sloep verkoop het en na Indië gereis het op 'n ander skip.

Herwinning[wysig | wysig bron]

Die skip se besending van goud en silwer, bekend as Clive van Indië se Goud, is in die 1990’s deur skattejagters van Port Elizabeth geplunder, en het baie omstredenheid veroorsaak.[5][6] 'n Derde van die 1200 goue munte is uiteindelik teruggekeer na Suid-Afrika, na 'n vier jaar lange regsgeding in Londen. Hierdie hoë-profiel hofsaak het verskeie tekortkominge in beide Suid-Afrikaanse en internasionale maritieme reg beklemtoon.[7] Die Opvoedkundige, Wetenskaplike en Kulturele Organisasie van die Verenigde Nasies het die geval gemonitor, aangesien dit 'n belangrike voorbeeld was vir die UNESCO Konvensie vir die Beskerming van Maritieme Kulturele Erfenisse wat in 2001 gepubliseer is.[8]

Kultuur[wysig | wysig bron]

In September 1867 word 'n plaaslik geskrewe toneelstuk, Treasure at Woody Cape, opgevoer deur die Dramaklub van Port Elizabeth. Die toneelstuk was gebaseer op die legende van die Doddingtonskatte.[9]

Verwysings[wysig | wysig bron]

  1. 1,0 1,1 1,2 Saxe Bannister (1830). Humane Policy, Or, Justice to the Aborigines of New Settlements. T. & G. Underwood. pp. xxxiii. Besoek op 8 Julie 2012.
  2. Mr Webb (1758). A Journal of the Proceedings of the Doddington East Indiaman, from her sailing from the Downs till she was unfortunately wrecked on the East Coast of Africa. Besoek op 8 Julie 2012.
  3. Cyrus Redding (1833). "Chapter V". A History of Shipwrecks, and Disasters at Sea, from the Most Authentic Sources: From the Most Authentic Sources. Whittaker, Treacher & Co. Besoek op 8 Julie 2012.
  4. Reginald Frank Kennedy (1955). Shipwrecks on and Off the Coasts of Southern Africa: A Catalogue and Index. Besoek op 8 Julie 2012.
  5. Geoffrey and David Allen (1978). Clive's Lost Treasure. Robin Garton. ISBN 0-906030-07-2. Besoek op 8 Julie 2012.
  6. The Independent, Clive of India's gold comes up for sale after legal settlement, besoek op 8 Julie 2012
  7. Barbara T. Hoffman (2006). "Chapter 42". Art and Cultural Heritage: The Case of the Doddington Coins. Cambridge University Press. p. 313. ISBN 0-521-85764-3. Besoek op 8 Julie 2012.
  8. UNESCO, The UNESCO Convention on the Protection of the Underwater Cultural Heritage, adopted in 2001, besoek op 8 Julie 2012
  9. The Port Elizabeth Opera House, A Short Historical of Theatre in Port Elizabeth Geargiveer 19 Augustus 2012 op Wayback Machine, besoek op 8 Julie 2012