Dolmen (televisie-minireeks)

in Wikipedia, die vrye ensiklopedie
Jump to navigation Jump to search
Dolmen
Le Conquet (Kermorvan Lighthouse).jpg
Regisseur Didier Albert
Eric Summer
Draaiboek Nicole Jamet
Marie-Anne Le Pezennec
Met Ingrid Chauvin: Marie Kermeur
Jean-Louis Foulquier: Millic Kermeur
Martine Sarcey: Jeanne Kermeur
Manuel Gelin: Loic Kermeur
Luc Thuiller: Gildas Kermeur
Tom Hygreck: Nicolas Kermeur
Bruno Madinier: Lucas Fersen
Musiek deur Frédéric Porte
Uitgereik 2005
Speeltyd Totale 540 minute; verdeel tot 6 x 90 minute
Land Vlag van Frankryk Frankryk
Taal Frans
IMDb-profiel

Dolmen is 'n Franse televisie-minireeks in ses aflewerings van negentig minute elk wat deur die draaiboekskryfsters Nicole Jamet en Marie-Anne Le Pezennec geskryf en tussen 8 Junie en 13 Julie 2005 op die Belgiese televisiekanaal RTL-TVi en die Switserse kanaal TSR uitgesaai is. Die Franse televisiekanaal TF1 het die minireeks tussen 13 Junie en 18 Julie 2005 uitgesaai.

Die reeks, waarin bekende Franse televisie- asook verhoogsterre rolle vertolk, is as 'n tipiese Franse saga de l'été (of "somerreeks") geproduseer - dit wil sê as 'n riller-minireeks wat op onthullende familiegeheime, onverwagte voorvaders en dikwels skokkende en verrassende na- en voorgeslagbande van die karakters baseer.

In teenstelling met baie ander Franse sagas de l'éte speel Dolmen hom nie in Suid-Franse geweste soos Provence of Côte d'Azur af nie, maar in Bretagne. Vir Dolmen is 'n groot aantal buitelugopnames gedoen om die outentieke atmosfeer van 'n Bretonse eiland te skep.

Sinopsis[wysig | wysig bron]

Die minireeks speel hom op die Bretonse eiland Ty Kern af. Marie (vertolk deur Ingrid Chauvin), 'n jong polisievrou, keer na haar geboorte-eiland Ty Kern terug om met die skipper Christian Bréhat (Xavier Deluc), 'n maat uit haar kinderdae, te trou. Maar sy is nie daarvan bewus nie dat vier families op die eiland nie net deur mededinging nie, maar ook deur 'n verskriklike geheim met mekaar verbonde is: Die adellike Kersaints, eienaars van 'n kasteel op Ty Kern; die Le Bihans, eienaars van 'n keramiekfabriek; die Pérecs, die burgemeester- en doktersgesin en eienaars van 'n laboratorium, en Marie se familie, die Kermeurs.

In die nag voor Marie en Christian se huwelik begin vreemde dinge op die eiland gebeur. Marie ontdek die bloedige karkas van 'n meeu in haar bruidsluier en word snags deur raaiselagtige nagmerries gepla. Nog voor haar huwelik vind Marie die lyk van haar broer Gildas op die strand, en skielik begin Gildas se bloed uit een van die menhirs op die eiland vloei.

Marie besluit om saam met 'n polisie-inspekteur van die vasteland, Lucas Fersen (Bruno Madinier), lig te gooi op die vreemde gebeurtenisse. Gildas se dood is maar die begin van 'n hele reeks misterieuse moorde...

Die spore lei duidelik na 'n ou plaaslike legende oor 18de eeuse strandrowers wat gedurende noodtye skepe met valse ligte na die rotsbanke voor Ty Kern gelei het om die skipbreukelinge se kele af te sny en hul skeepsladings te roof. Marie begin vrae vra oor waar die skielike welvaart van sommige families op die eiland - insluitende haar eie gesin - in die laat 1960's vandaan gekom het. Die moordenaar probeer immers wraak te neem vir 'n grusame gebeurtenis wat hom bykans vier dekades gelede op Ty Kern afgespeel het...

DVD-vrystellings[wysig | wysig bron]

Land Datum Ateljee Tipe Aantal DVDs Speeltyd Klankbane Klankformaat Skermformaat Bonus
Frankryk 28 Julie 2005 TF1 Vidéo DVD-boks 3 600 minute Frans Dolby Digital 2.0 Wye skermformaat 1,77:1 Making of
Frankryk 24 Oktober 2007 Cidc Une Video DVD-boks 3 600 minute Frans Dolby Digital 2.0 Wye skermformaat 1,77:1 Making of
Duitsland 12 Oktober 2007 Warner Home Video DVD-boks 4 379 minute Frans, Duits Dolby Digital 5.1 Gewone skermformaat 4:3 Making of, uittreksel van oudioboek
Duitsland 26 September 2008 Koch Media DVD-boks 4 600 minute Frans, Duits Dolby Digital 5.1 Wye skermformaat 1,78:1 Making of, uittreksel van oudioboek