Doubt (Amerikaanse rolprent)
| Doubt | |
|---|---|
| Regisseur | John Patrick Shanley |
| Vervaardiger |
|
| Draaiboek | John Patrick Shanley |
| Geskoei op | Doubt: A Parable deur John Patrick Shanley |
| Met | |
| Musiek deur | Howard Shore |
| Kinematografie | Roger Deakins |
| Ateljee |
|
| Verspreider | Miramax Films |
| Uitgereik | 30 Oktober 2008: AFI Fest 12 Desember 2008: VSA |
| Speeltyd | 104 minute[1] |
| Land | VSA |
| Taal | Engels |
| IMDb-profiel | |
Doubt is 'n Amerikaanse dramarolprent van 2008 wat deur John Patrick Shanley geskryf en geregisseer is. Dit is geskoei op Shanley se pryswennende toneelstuk Doubt: A Parable van 2004. Die prent speel in 'n Katolieke laerskool met die naam Sint Nicholas af. Die hoofakteurs is Meryl Streep, Philip Seymour Hoffman, Amy Adams en Viola Davis.[2]
Die première was op 30 Oktober 2008 op die AFI Fest van die Amerikaanse Rolprentinstituut voordat Miramax Films dit op 12 Desember in Amerikaanse rolprentteaters uitgereik het. Streep, Hoffman, Adams en Davis het lof vir hulle toneelspel ontvang en al vier is vir Oscars vir 2009 benoem. Shanley is ook vir beste aangepaste draaiboek benoem.
.jpg)
_(cropped_2).jpg)
Rolverdeling
[wysig | wysig bron]- Meryl Streep as suster Aloysius Beauvier, die skoolhoof
- Philip Seymour Hoffman as vader Brendan Flynn
- Amy Adams as suster James, die geskiedenisonderwyseres
- Viola Davis as mev. Miller, Donald Miller se ma
- Joseph Foster as Donald Miller, die skool se eerste swart leerling
Die ander susters in die prent sluit in Alice Drummond as suster Veronica, Audrie J. Neenan as suster Raymond en Helen Stenborg as suster Teresa. Die rolle van die skoolkinders word vertolk deur Mike Roukis as William London, Lloyd Clay Brown as Jimmy Hurley, Frank Shanley as Kevin, Frank Dolce as Ralph, Paulie Litt as Tommy Conroy, Matthew Marvin as Raymond, Bridget Clark as Noreen Horan, Molly Chiffer as Sarah en Lydia Jordan as Alice.
Storielyn
[wysig | wysig bron]Bederwingswaarskuwing: Die storielyn en/of storie se einde volg hieronder.
In 1964, tydens ’n Katolieke mis in The Bronx, lewer vader Brendan Flynn ’n preek oor twyfel. Die priester merk op dat dit, net soos geloof, ’n verenigende krag kan wees. Suster Aloysius, die streng hoof van die kerk se skool, is bekommerd toe sy sien hoe ’n seun in die binnehof van Flynn wegtrek. Sy beveel haar susters om op die uitkyk te wees vir verdagte aktiwiteite in die skool.
Suster James, ’n jong en naïewe onderwyseres, ontvang ’n versoek dat Donald Miller, ’n altaarseun en die skool se enigste swart leerling, Flynn in die konsistorie moet gaan sien. Hy keer ontsteld na die klas terug, en sy ruik alkohol aan sy asem. Later sien sy hoe Flynn ’n onderhemp in Donald se kluis plaas. Sy rapporteer haar vermoedens aan Aloysius.
Aloysius en James nooi Flynn na die hoof se kantoor onder die voorwendsel om die skool se Kersspel te bespreek. Uiteindelik bring Aloysius Donald ter sprake deur daarop te wys dat sy ras hom kwesbaar maak om uitgesonder te word. Sy sê selfs Flynn het aan hom spesiale behandeling gegee, soos hulle privaat ontmoeting die vorige week. Hy raak verdedigend oor haar insinuasies en onthul uiteindelik dat hy Donald na die konsistorie geroep het omdat hy betrap is dat hy van die nagmaalwyn drink. Flynn het dit stilgehou om Donald te beskerm, maar noudat Aloysius dit uit hom gedwing het, moet hy as altaarseun verwyder word. James is baie verlig om die verduideliking te hoor. Flynn se volgende preek handel oor die euwels van skinder, duidelik gemik op suster Aloysius.
Aloysius is egter steeds ontevrede en spreek Donald se ma oor haar vermoedens. Toe sy die moontlike mishandelende verhouding tussen Donald en Flynn beskryf, is sy geskok oor mev. Miller se oënskynlike onverskilligheid. Uiteindelik erken die ma huilend dat Donald gay is en vrees dat sy pa hom sal doodmaak as hy dit uitvind. Sy beskryf haar moeilike posisie: Sy kan haar seun nie teen sy pa se geweld beskerm nie, en Flynn is die enigste manlike figuur wat ooit vriendelikheid teenoor hom getoon het. Donald se posisie by die skool beskerm hom teen boelies, en om nou die skool te verlaat kan die beter toekoms wat die skool hom kan bied, in gevaar stel. Sy smeek Aloysius dat, as sy haar sin wil kry, sy Flynn eerder as Donald moet verwyder. Maar haar grootste wens is dat Donald teen Junie met goeie punte sal slaag.
Omdat hy weet sy het met Donald se ma gepraat, dreig Flynn om Aloysius uit haar pos te laat verwyder as sy nie terugstaan nie. Sy sê vir hom dat sy ’n non van sy vorige gemeente gekontak het en ’n geskiedenis van vorige oortredings ontdek het. Hy eis om te weet watter bewys sy het, en sy erken haar sekerheid is al wat sy het. Flynn beskuldig haar van insubordinasie en dat sy buite haar pligte optree. Sy dreig dat sy alles sal doen wat nodig is om hom uit te dwing, selfs al beteken dit dat sy self uit die kerk verwyder word.
Aloysius verwerp sy aansprake van onskuld en dreig met afpersing as hy nie onmiddellik bedank nie. Hy erken dat sy ondergang onafwendbaar sou wees as hy haar dreigemente ignoreer, maar hou vol hy het niks verkeerds gedoen nie en dat haar sekerheid oor wangedrag feilbaar is. Sy eis dat Flynn ’n oorplasing versoek, wat hy doen, en hy lewer ’n laaste preek voordat hy vertrek.
’n Rukkie later vertel Aloysius vir James dat Flynn sedertdien aangestel is in ’n meer gesogte pos by ’n groter kerk. Sy onthul dat sy gejok het oor die kontak met ’n non by Flynn se vorige gemeente, maar redeneer die plan sou nie gewerk het as dit onwaar was nie. Vir haar is sy bedanking ’n bewys van sy skuld. James, wat steeds in Flynn se onskuld glo, is geskok oor haar leuen, maar Aloysius sê: “In die nastrewing van onreg tree ’n mens weg van God.” Sy voeg egter by dat dit ’n prys het. Daarna roep sy huilend uit: “Ek twyfel ... ek twyfel so baie!”
Ontvangs
[wysig | wysig bron]Op Rotten Tomatoes was 79% van die 20 resensies positief. Die webtuiste se konsensus lui: "Doubt slaag danksy die sterk akteurs, wat die prent suksesvol deur die sporadiese verslappings lei."[3] Op Metacritic het die prent 'n punt van 68/100 gekry, gebaseer op 36 resensies, wat dui op 'n "algemeen gunstige" ontvangs.[4]
Die resensent Manohla Dargis van The New York Times skryf: “Die lug is dik van paranoia in Doubt, maar nêrens so dig, sappig, volgehoue of ondersteunend soos Meryl Streep se vertolking nie.”[5] Streep se vertolking as die streng, intimiderende en standvastige skoolhoof, suster Aloysius Beauvier, is algemeen geprys.
The Observer se Philip French skryf: “Doubt is ’n uitdagende, gestroopte werk en het vier uitmuntende vertolkings. In die middel is twee van die beste akteurs wat vandag leef, Meryl Streep en Philip Seymour Hoffman. Weer eens bewys hulle hulle is in staat om hulleself te transformeer en oortuigende karakters te skep sonder oormatige grimering of ’n hele reeks eksentrieke maniertjies. Hulle word ondersteun deur Amy Adams, wat verskeie uitstekende tonele het as suster James, ’n jong vrou met deursigtige integriteit, en deur Viola Davis as mev. Miller, ’n liefdevolle ma wat probeer om haar persoonlike ordentlikheid onder ondraaglike omstandighede te handhaaf. Davis maak ’n onuitwisbare indruk in haar enkele toneel.”[6]
Viola Davis se vertolking as mev. Miller is ook deur ander resesente geprys; die webtuiste Salon verklaar die karakter word vertolk met ’n "byna wonderbaarlike vlak van geloofwaardigheid ... Davis, in haar klein rol van een toneel, is ongelooflik aangrypend – ek kan skaars ’n Davis-vertolking onthou waarin ek nie geraak is nie ... [sy] speel haar karakter, ’n angstige, hardwerkende vrou wat net probeer om haar lewe en gesin bymekaar te hou, deur alles naby te hou. Sy is nie ’n fontein van emosie wat breë uitdrukking of beweging uitdeel nie; in plaas daarvan hou sy dit alles binne en laat ons daarin deel.”[7]
Roger Ebert, wat meen Davis se vertolking is ’n Oscar werd, het die prent vier sterre – sy hoogste gradering – gegee en die “presiese en genadelose skryfwerk, kragtige vertolkings en tydlose relevansie” geprys. “Dit sit ons met die eerste skoot aan die dink, en ons hou nooit op nie.”[8] Ebert sê verder: “Die konflik tussen Aloysius en Flynn is die konflik tussen oud en nuut, tussen status en verandering, tussen onfeilbaarheid en onsekerheid. En Shanley laat ons twyfel.”[8]
Die prent en sy akteurs het talle pryse en benoemings ontvang, insluitende vyf Oscarbenoemings: vir beste aktrise (Streep), beste manlike byspeler (Hoffman), beste vroulike byspeler (Adams en Davis) en beste verwerkte draaiboek (Shanley).
Die navorser Daniel Cutrara het in sy boek oor seks en godsdiens in rolprente opgemerk die prent werk as ’n metafoor vir wêreldwye onsekerheid oor Katolieke priesters wat van pedofilie beskuldig word – spesifiek deur Vader Flynn se bedanking as ’n aanduiding van skuld, en suster Aloysius se daaropvolgende twyfel.[9]
Verwysings
[wysig | wysig bron]- ↑ "Doubt (15)". British Board of Film Classification. 18 Desember 2008. Besoek op 4 Oktober 2016.
- ↑ Hughes, Jazmine (12 April 2022). "Viola Davis, Inside Out". The New York Times. Geargiveer vanaf die oorspronklike op 27 Julie 2023.
- ↑ "Doubt (2008)". Rotten Tomatoes. Fandango Media. Besoek op 19 Mei 2025.
- ↑ "Doubt (2008)". Metacritic. Besoek op 13 Februarie 2024.
- ↑ Dargis, Manohla (12 Desember 2008). "Between Heaven and Earth, Room for Ambiguity". The New York Times.
- ↑ French, Philip (8 Februarie 2009). "Doubt". The Observer (in Engels). ISSN 0029-7712. Besoek op 13 Februarie 2024.
- ↑ Zacharek, Stephanie (12 Desember 2008). ""Doubt"". Salon.com. Besoek op 13 Februarie 2024.
- 1 2 Ebert, Roger (10 Desember 2008). "Bless you, father, for you have sinned. Or maybe you haven't". RogerEbert.com.
- ↑ Cutrara, Daniel S. (15 Maart 2014). Wicked Cinema: Sex and Religion on Screen. University of Texas Press. p. 206. ISBN 978-0-292-75472-0.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
