Gaan na inhoud

Downsizing

in Wikipedia, die vrye ensiklopedie
Downsizing
Hong Chau
Matt Damon
Genre
Geskryf deur
  • Alexander Payne
  • Jim Taylor
Geregisseer deur Alexander Payne
Met
Oorsprong VSA
Taal Engels
Vervaardiger(s)
  • Mark Johnson
  • Alexander Payne
  • Jim Taylor
Kinematografie Phedon Papamichael
Produksiemaatskappy
  • Ad Hominem Enterprises
  • Gran Via Productions
Verspreider Paramount Pictures
Uitsending
Oorspronklike lopie 30 Augustus 2017 (2017-08-30)

Downsizing is 'n Amerikaanse wetenskapsfiksie- en komediedramarolprent wat deur Alexander Payne en Jim Taylor geskryf is en met Matt Damon, Christoph Waltz, Hong Chau en Kristen Wiig in die hoofrolle. Dit gaan oor Paul Safranek, wat besluit om 'n onlangs ontdekte prosedure te ondergaan om sy liggaam te laat krimp sodat hy 'n nuwe lewe in 'n eksperimentele gemeenskap kan begin. Sy vrou trek op die laaste oomblik kop uit en laat hom alleen. Sy lewe neem 'n onverwagte wending toe hy 'n kunstenaar bevriend.

Die rolprent se première was op 30 Augustus 2017 op die Venesiese Internasionale Rolprentfees en is op 22 Desember 2017 deur Paramount Pictures in Amerikaanse rolprentteaters uitgereik. Dit was 'n sukses by die loket, maar het gemengde resensies gekry.[1] Chau is op die 75ste Golden Globe-toekenningsaand vir 'n Golden Globe benoem vir haar toneelspel.[2][3]

Hoofakteurs

[wysig | wysig bron]
  • Matt Damon as Paul Safranek, 'n abeidsterapeut wat by die krimpingsprogram aansluit
  • Christoph Waltz as Dusan Mirkovic, 'n middeljarige Serwiese losbol en woekeraar
  • Hong Chau as Ngoc Lan Tran, 'n Viëtnamese aktivis wat onvrywillig deur haar regering laat krimp is en Paul bevriend
  • Kristen Wiig as Audrey Safranek, Paul se vrou, wat van hom skei toe sy besluit om nie met die krimpingsprogram voort te gaan nie
  • Udo Kier as Joris Konrad, Dusan se vriend
  • Jason Sudeikis as Dave Johnson, Paul se vriend as kind, wat Paul aanmoedig om hom te laat krimp
  • Maribeth Monroe as Carol Johnson, Dave se vrou

Storielyn

[wysig | wysig bron]

Bederwingswaarskuwing: Die storielyn en/of storie se einde volg hieronder.

Terwyl hy op soek is na 'n manier om oorbevolking en aardverwarming op te los ontwikkel die Noorweegse wetenskaplike dr. Jørgen Asbjørnsen die krimpingsprosedure, 'n onomkeerbare proses om organiese materiaal te krimp. Hy word deel van die eerste menslike proefkonyne van die eksperiment, wat mense tot sowat 13 cm krimp – wat hulle verbruik en vullis aansienlik verminder. Toe hy vyf jaar later sy bevindings op 'n konferensie bekend maak, is dit 'n wêreldwye sensasie.

Tien jaar later sien Paul en Audrey Safranek, 'n getroude paartjie wat finansieel sukkel, Dave en Carol Johnson, wat gekrimp is, op Paul se hoërskoolreünie. Dave vertel vir Paul die rede hoekom hulle hulle laat krimp het, is omdat hulle soveel beter met hulle geld uitkom. Paul en Audrey besluit om die prosedure te ondergaan en na Leisureland, Nieu-Mexiko, een van die ryk gemeenskappe vir klein mense, te verhuis. Terwyl Paul in Leisureland van die prosedure herstel, bel Audrey hom en sê sy het op die nippertjie kop uitgetrek. Sy skei later van hom.

Paul bly alleen in 'n luuksehuis, maar 'n jaar later kan hy dit nie meer alleen bekostig nie. Hy trek na 'n woonstel en kry 'n werk by 'n kliëntediens. Hy begin met iemand uitgaan, maar hulle beëindig die verhouding en Paul bevind hom op 'n wilde partytjie wat deur sy sjarmante buurman, Dusan, gehou word.

Die volgende oggend herken Paul een van Dusan se huisskoonmakers as Ngoc Lan Tran, 'n Viëtnamese politieke aktivis wat gevangenisstraf gekry het en teen haar wil gekrimp is. Sy is in 'n televisieboks na Amerika vervoer en het net-net met haar lewe daarvan afgekom. Sy is 'n jaar tevore na Leisureland gebring om haar been af te sit. Paul wil haar met haar kunsbeen help en beland in haar woonstel in 'n krotbuurt net buite Leisureland waar die gemeenskap se werkers woon. Hy is geskok deur die toestande daar.

Paul breek per ongeluk haar kunsbeen en stem in om vir haar skoonmaakdiens te werk totdat sy 'n nuwe een kry. Hy help ook kos uitdeel in die krotbuurt. Toe Dusan dit uitvind, probeer hy Paul van sy pligte verlos deur hom saam te neem na Noorweë om voorraad by die oorsponklike kolonie vir klein mense te gaan aflewer, maar Ngoc Lan besluit onverwags om saam te gaan, want sy het 'n staande uitnodiging om by dr. Asbjørnsen, wat van haar ontbering gehoor het, te gaan kuier.

In die Noorweegse fjord kondig dr. Asbjørnsen aan daar is sonder twyfel vasgestel dat metaan op die noordpool vrygestel word en dat die menslike ras binnekort uitgewis sal word. Dié nag het Paul en Ngoc Lan seks.

Die mense by die kolonie vind die volgende dag uit dr. Asbjørnsen beplan om ondergronds te gaan woon en dat hulle afstammelinge sal uitkom as die oppervlak oor 8 000 jaar weer gestabiliseer het. Dusan en Joris is skepties oor die kultusagtige plan en reken die uitwissing sal eers oor honderde jare gebeur, terwyl Paul opgewonde is om by die res van die gemeenskap aan te sluit. Hy vra Ngoc Lan om saam te gaan, maar sy weier en sê die mense bo die grond is dié wat wat hulp sal nodig hê. Paul besluit op die nippertjie om om te draai.

Terug in Leisureland gaan Paul voort om die mense in die krotbuurt saam met Ngoc Lan te help, en hy kry bevrediging uit klein dingetjies, soos om kos vir 'n ou man te vat.

Ontvangs

[wysig | wysig bron]

Op Rotten Tomatoes het die rolprent 'n goedkeuringsyfer van 47% gekry, gebaseer op 301 resensies, met 'n gemiddelde punt van 5,7/10. Die konsensus lui: "Downsizing het 'n talentvolle rolverdeling wat 'n paar interessante idees najaag – en dit is dalk genoeg dat sommige kykers die finale produk se tekortkominge oor die hoof sal sien."[4] Op Metacritic het die prent 'n gemiddelde punt van 63 uit 100 gekry, gebaseer op 48 resensies, wat dui op "algemene byval".[5]

Todd McCarthy van The Hollywood Reporter, wat dit eindelik as die beste fliek van 2017 gekies het, het dit geprys as "groot en mooi" en het die regie en toneelspel uitgesonder.[6] Xan Brooks van The Guardian het Downsizing 5 uit 5 sterre gegee en dit genoem "Alexander Payne se miniatuur-meesterstuk".[7] In Rolling Stone het Peter Travers die prent 3,5 uit 4 sterre gegee.[8]

David Sims van The Atlantic het die prent 'n negatiewe resensie gegee.[9] Keith Uhlich van Slant Magazine het dit 1,5 uit 4 sterre gegee en gesê: Dit lyk of Payne dink hy maak 'n grootse stelling," maar hy kry dit nie reg nie.[10]

Verwysings

[wysig | wysig bron]
  1. ↑ Giles, Jeff (21 Desember 2017). "Jumanji: Welcome to the Jungle is Certified Fresh". Rotten Tomatoes. Fandango Media. Besoek op 21 Desember 2017.
  2. ↑ Rubin, Rebecca (11 Desember 2017). "Golden Globe Nominations: Complete List". Variety. Penske Business Media. Besoek op 11 Desember 2017.
  3. ↑ "Downsizing: Nominations and awards". Los Angeles Times. Geargiveer vanaf die oorspronklike op 19 November 2023. Besoek op 19 November 2023.
  4. ↑ "Downsizing (2017)". Rotten Tomatoes. Fandango. Besoek op 27 Mei 2020.
  5. ↑ "Downsizing Reviews". Metacritic. CBS Interactive. Besoek op 12 Februarie 2018.
  6. ↑ McCarthy, Todd (30 Augustus 2017). "'Downsizing': Film Review". The Hollywood Reporter. Prometheus Global Media. Besoek op 30 Augustus 2017.
  7. ↑ Brooks, Xan (30 Augustus 2017). "Downsizing review – Matt Damon thinks small in Alexander Payne's miniature masterpiece". The Guardian. Guardian News and Media. Besoek op 30 Augustus 2017.
  8. ↑ Travers, Peter (19 Desember 2017). "'Downsizing' Review: Matt Damon Shines in 'Bracing Comedy of Shocking Gravity". Rolling Stone. Geargiveer vanaf die oorspronklike op 23 April 2023. Besoek op 23 April 2023.
  9. ↑ Sims, David (22 Desember 2017). "Downsizing Has Big Ambitions but Little Payoff". The Atlantic. The Atlantic Monthly Group. Besoek op 2 Januarie 2018.
  10. ↑ Uhlich, Keith (10 September 2017). "'Downsizing' Film Review". Slant Magazine. Besoek op 2 Januarie 2018.

Skakels

[wysig | wysig bron]
Ontsluit van "https://af.wikipedia.org/w/index.php?title=Downsizing&oldid=2776587"