Drakensberg-seunskool

in Wikipedia, die vrye ensiklopedie
(Aangestuur vanaf Drakensberg-seunskoor)
Jump to navigation Jump to search
Drakensberg-seunskoorskool
Drakensberg-seunskool - ingang.jpg
Ingang na die Drakensberg-seunskoorskool

Gestig 1967
Tipe Privaat
Hoof Mnr. Andrew Stead
Stigter John Tungay
Grade 4-9
Provinsie KwaZulu-Natal
Land Suid-Afrika
Webblad http://www.dbchoir.co.za/

Die Drakensberg-seunskool is 'n dubbelmedium-seunskool naby Winterton in die hartjie van die Drakensberg in KwaZulu-Natal, Suid-Afrika. Die skool bied onderrig aan die lede van die Drakensberg-seunskoor. Dit is in 1967 gestig en is die enigste skool in Afrika wat aan koorsang toegewy is.[1]

Die skool maak voorsiening vir 100 tot 120 seuns tussen die ouderdom van 9 en 15 jaar (graad 4 tot 9). Hulle beskik oor 'n 600-sitplek ouditorium, gebou in 1995, waar weeklikse konserte gehou word. Koorlede toer gereeld en het al vertonings in die VSA, Europa, Japan, Taiwan, Hongkong, Mauritius en talle Afrika-lande gelewer.

Geskiedenis[wysig | wysig bron]

Die skool is op 23 Januarie 1967 deur John Tungay met 21 leerlinge geopen. Tungay het die land deurreis om leerlinge met die hand uit te kies. Hy het sy huis in Durban-Noord, sy melkplaas by Rosetta en sy drukkery verkoop om die skool te befonds.

Die stigterslede van die Drakensberg-seunskoor was: Leslie Legg (Durban); Begley Goodchild (Kroonstad); Rennie Agnew (Durban); Chris van der Merwe (Sasolburg); Francois en Ben Cronje (Standerton); Robert Baumann (Welkom); Rudolph Lewis (Johannesburg); Sakkie Fourie (Edenvale); Derek Dumayne (Durban); Philip, Andrew en David Mortlock (Swartberg); Bill Holesgrove (Umbogintwini); Rodwell Rehse (Oos-Londen); Willem Breedt (Randbrug); Bruce Knowles (Port Elizabeth); Stephen Wilkinson (Durban); Quentin en Gerald Swart (Roodepoort) en Roger Smith (Glenashley).

Die skool se konserte was so gewild, dat 15 addisionele seuns hulle voor die einde van die eerste jaar by die skool aangesluit het. Die inskrywings vir die tweede jaar het tot meer as 50 seuns gestyg. Binne vier jaar het die skool gegroei om vir 120 leerlinge (in verskeie kore) voorsiening te maak, en moes 'n waglys aangelê word.

In 1983 het die koor, op versoek van die Vatikaan, voor 25 000 mense gesing.[2] In 1992 is hulle as die beste koor tydens die Sesde Internasionale Wêreld-seunskoorfees in Pole aangewys.

Fasiliteite[wysig | wysig bron]

Lede van die koor tydens 'n optrede in Oktober 2015 voor die Media24-sentrum in Kaapstad.

Die skool is op 'n 100 akker (40 ha) landgoed in die Drakensberge geleë. Die geriewe was aanvanklik betreklik primitief, en kon as 'n soort plaasskool beskryf word.

Die bou van 'n 600-sitplek-ouditorium in 1995, met moderne klank en beligting, het gehelp om groter gehore tydens hul feeste en weeklikse konserte op Woensdae te huisves. Hulle vorige saal het net sitplek aan 80 toeskouers gebied.

Gedurende 1999 is 'n 34-register Norman & Beard-orrel in die ouditorium geïnstalleer. Die orrel is oorspronklik in 1904 gebou, en is in 1998 deur die skool van die St. George’s United Church in Joubertpark in Johannesburg aangekoop.

'n Nuwe akademiese fasiliteit is in 2006 geopen. 'n Nuwe koshuis is ook opgerig, waarvan die eerste fase in 2009 voltooi is.

Verwysings[wysig | wysig bron]

  1. Die Bydrae van die Drakensberg Seunskoor tot die Musieklewe in Suid-Afrika: 'n historiese oorsig, verhandeling deur Maria Magdalena de Beer, Universiteit van Pretoria, 2008
  2. Pous Johannes Paulus II (20 Julie 1983). "Toespraak aan die algemene publiek". vatican.va (in Italiaans). Besoek op 2015-08-17. 

Eksterne skakels[wysig | wysig bron]