Duane Aslett

Duane Aslett studeer aan die Universiteit van Suid-Afrika, waar hy in 1998 die B.Juris-graad, in 2002 die LL.B.-graad en in 2004 die LL.M.-graad in die Regte behaal.

Lewe en werk

In 2009 verwerf hy aan die Universiteit van Johannesburg 'n Sertifikaat in Geldwasbeheer. Hy is toegelaat tot die Balie as 'n Advokaat in die Hooggeregshof van Suid-Afrika. Die Teologie is 'n verdere belangstelling en hy studeer ook aan die South African Theological Seminary, waar hy in 2007 'n Sertifikaat in Christelike Lewe en in 2010 'n M.Th.-Graad verwerf. Hy is 'n senior lektor in Forensiese Rekeningkunde aan die Potchefstroom-kampus van Noordwes-Universiteit, waar hy ook studeer vir sy LL.D.-graad in die Regte. Die voorgestelde titel van sy proefskrif is “Combating Organised Crime in South Africa”. In 2012 woon hy die Herfsskool van die ATKV se Skryfskool by die universiteit by. Hy is getroud met Tammy en hulle bly in Potchefstroom.

Skryfwerk

Sy debuut is met die misdaadroman “Skoppensboer”, met die titel wat in gesprek tree met Eugène Marais se bekende gedig en ook die skurk se noemnaam is. Hy staan aan die hoof van 'n georganiseerde misdaadsindikaat wat belange het in vele bedrywe, insluitende geldwassery, smokkelary, afpersing en prostitusie. Sy teenstanders maak hy van kant met twee skote uit sy rewolwer, maar nie voordat hy 'n koeplet uit Marais se gedig aan die slagoffer voordra nie. Teenoor hom staan die held, Rex Reyneke, gekwalifiseerde prokureur en geheime agent, wat op sy spoor beland en hom probeer vastrek. Dit beland Rex in groot gevaar en die ergste is dat hy boonop gevoelens ontwikkel vir die prostituut Alicia Vermeulen. Kaptein Januarie van die Valke beland ook op Skoppensboer se spoor na aanleiding van die ontvoering van 'n jong vrou.

Publikasies

• 2014 Skoppensboer