Eden Hazard
 Hazard saam met Chelsea tydens die Europa League-eindstryd in 2019 | |||
| Persoonlike inligting | |||
|---|---|---|---|
| Geboortedatum | 7 Januarie 1991 | ||
| Geboorteplek | La Louvière, België | ||
| Lengte | 1,75 m[1] | ||
| Speelposisie | Vleuel, aanvallende middelveldspeler | ||
| Jeugloopbaan | |||
| 1995–2003 | Royal Stade Brainois | ||
| 2003–2005 | AFC Tubize | ||
| 2005–2007 | Lille | ||
| Seniorloopbaan* | |||
| Jare | Span | Kere† | (Doele)† |
| 2007–2008 | Lille II | 13 | (1) |
| 2007–2012 | Lille | 147 | (36) |
| 2012–2019 | Chelsea | 245 | (85) |
| 2019–2023 | Real Madrid | 54 | (4) |
| Totaal | 459 | (126) | |
| Nasionale span | |||
| 2006 | België o/15 | 5 | (1) |
| 2006 | België o/16 | 4 | (2) |
| 2006–2008 | België o/17 | 17 | (2) |
| 2007–2009 | België o/19 | 11 | (6) |
| 2008–2022 | België | 126 | (33) |
| * Kere vir seniorklub uitgedraf en doele is net vir die plaaslike liga.. † Kere uitgedraf (Doele). | |||
Eden Michael Walter Hazard (gebore op 7 Januarie 1991) is ’n Belgiese voormalige professionele sokkerspeler wat as ’n vleuel of aanvallende middelveldspeler vir Lille, Chelsea, Real Madrid, en die Belgiese nasionale span gespeel het. Hy was bekend vir sy dribbels en kreatiwiteit en word beskou as een van die beste spelers van sy generasie.
Hazard het sy seniorkloopbaan by die Ligue 1-klub Lille in 2007 op die ouderdom van 16 begin en het gou ’n integrale deel van die span onder afrigter Rudi Garcia geword. In sy eerste volle seisoen het hy die eerste nie-Franse speler geword om die Ligue 1 Jong Speler van die Jaar-toekenning te wen, en in die daaropvolgende seisoen het hy die eerste speler geword om dit twee keer te wen. In die 2010–11-seisoen het hy die liga- en bekerdubbel gewen en is hy, as gevolg van sy vertonings, aangewys as die Ligue 1 Speler van die Jaar, die jongste speler wat dié toekenning ooit gewen het.
Na meer as 190 wedstryde en 50 doele vir Lille het Hazard in Junie 2012 by die Engelse klub Chelsea aangesluit. Hy het die UEFA Europa League in sy eerste seisoen gewen, en in sy tweede seisoen is hy aangewys as die PFA Jong Speler van die Jaar. In die 2014–15-seisoen het Hazard gehelp om vir Chelsea die Football League Cup en die Premier League te wen, waarvoor hy die FWA Sokkerspeler van die Jaar en die PFA Spelers se Speler van die Jaar-toekennings ontvang het. Twee jaar later het hy sy tweede Engelse ligatitel gewen toe Chelsea die 2016–17 Premierliga gewen het. In 2018 het hy die FA Cup gewen en is in die FIFA FIFPRO Mans se Wêreld 11 ingesluit. Hy het die Europa League weer saam met Chelsea in 2019 gewen en twee keer in die eindstryd aangeteken. By Chelsea het Hazard homself gevestig as een van die wêreld se beste spelers. Hy het in die somer van 2019 by Real Madrid aangesluit in ’n oordrag wat tot €146.1 miljoen werd was – een van die hoogste oordragfooie ooit. Sy loopbaan daar is egter gekniehalter deur beserings, swak vertonings en ’n gebrek aan fiksheid, wat daartoe gelei het dat hy net ’n beperkte aantal wedstryde gespeel het. Hy het die klub in Junie 2023 verlaat en vier maande later uit professionele sokker getree.
Hazard het sy land op verskeie jeugvlakke verteenwoordig en het in November 2008, op 17-jarige ouderdom, sy senior debuut vir België gemaak. Sedertdien het hy meer as 126 wedstryde gespeel en was hy ’n lid van die Belgiese span wat die kwartfinaal van die 2014 FIFA Wêreldbeker, UEFA Euro 2016, en Euro 2020 gehaal het. By die 2018 Wêreldbeker was hy die kaptein van België wat derde geëindig het – hul beste prestasie in die geskiedenis – en het hy die Silwer Bal ontvang as die tweede beste speler van die toernooi. Van 2015 tot 2022 het hy as kaptein van die span gedien, insluitend die tyd toe België vir die eerste keer boaan die FIFA-wêreldranglys was – die langste aaneenlopende heerskappy van enige Europese span.
Hy het drie broers, wat almal sokker speel, insluitend Thorgan, wat hom in 2012 by Chelsea aangesluit het.[2][3][4][5]
Verwysings
[wysig | wysig bron]- ↑ "Hazard". Real Madrid CF. Besoek op 4 Julie 2020.
- ↑ "Chelsea man to stay at Borussia Mönchengladbach". BBC Sport. 24 Februarie 2014. Besoek op 25 Februarie 2014.
- ↑ "A 3-year agreement was signed today with Kylian Hazard". ujpestfc.hu. 27 Junie 2015. Geargiveer vanaf die oorspronklike op 30 Julie 2020. Besoek op 27 Junie 2015.
- ↑ "M. Seydoux confirme pour Kylian Hazard". FootLille.com (in Frans). 3 Maart 2011. Geargiveer vanaf die oorspronklike op 24 September 2015. Besoek op 18 September 2011.
- ↑ "Eden Hazard out, Kylian Hazard in?". Voetbalbelgie.be (in Nederlands). 2 Maart 2011. Geargiveer vanaf die oorspronklike op 21 September 2013. Besoek op 19 April 2011.
