Eerstehulp

in Wikipedia, die vrye ensiklopedie
Jump to navigation Jump to search

Eerstehulp of noodhulp is die noodbehandeling van beserings. Volgens die SafeTech noodhulpopleidingshandleiding word noodhulp vir drie redes toegepas: Om 'n persoon aan die lewe te hou, om te voorkom dat 'n besering of toestand vererger en om spoedige herstel te bevorder. Kardiopulmonêre resussitasie (KPR) is 'n belangrike vaardigheid wat deel van eerstehulp vorm.

Hoe om KPR toe te pas[wysig | wysig bron]

As 'n pasiënt bewusteloos is, kantel sy of haar kop agteroor en lig die ken om die lugweë oop te maak. Ondersoek die borskas en luister en voel vir asemhaling.

Begin dan met KPR:

  1. Plaas een hand in die middel van die bors. Plaas die kussing van jou ander hand se palm bo-op dié hand, sluit jou vingers inmekaar en hou dit van die ribbekas af.
  2. Leun oor die bors en druk vertikaal sowat 5 cm tot 6 cm af.
  3. Verlig die druk, maar hou jou hande daar.
  4. Gee 30 drukke teen 'n tempo van 100 tot 120 per minuut – dis twee drukke per sekonde.
  5. Kantel die kop agteroor en lig die ken. Knyp die neus toe.
  6. Asem diep in, seël jou lippe oor sy of haar mond en asem uit totdat die borskas opstoot.
  7. Met die kop steeds agteroor en die ken gelig, lig jou mond op en laat sy of haar borskas weer sak. Herhaal die asemoordrag.
  8. Dien 30 borsdrukke toe, gevolg deur twee asemoordragte.
  9. Hou aan totdat hulp opdaag, die pasiënt normaal asemhaal of jy te uitgeput is om voort te gaan.

Noodsaaklikhede vir 'n noodhulpkis[wysig | wysig bron]

Elke huis en werksplek moet 'n noodhulpkis hê. Wanneer 'n onderneming meer as vyf personeellede in diens het, word dit deur die Wet op Beroepsgesondheid en Veiligheid vereis.

  • Wondreinigers (ontsmettingsmiddel)
  • Steriele watterol en gaas, om nat wonde te dreineer
  • 'n Skêr
  • 'n Tangetjie, om skerp voorwerpe uit die vel te trek.
  • Twee paar mediese handskoene
  • Haakspelde
  • Driehoeksverbande
  • Rolverbande
  • Kleefverband (pleister)
  • Pleisters van verskillende groottes
  • Salf vir brandwonde
  • 'n Koorspen
  • Teenontstekingslappies
  • Teenontstekingsalf
  • Medikasie om koors af te bring
  • Pynpille
  • Antihistamien vir allergiese reaksies
  • Maagmedikasie soos lakseermiddel en medisyne teen diarree

Noodnommers[wysig | wysig bron]

Landswye noodreaksie 10111 Dié nommer bring jou in aanraking met die polisie en die blitspatrollie. Sodra jy genoeg besonderhede oor jou noodgeval verskaf het, kan die relevante eenheid uitgestuur word om jou te help.
Nasionale ambulans en brandweer 10177 Gebruik hierdie nommer wanneer daar 'n mediese noodgeval is. Jy kan dit ook bel vir noodgevalle soos rooftog, vuurwapenvoorvalle of motorongelukke, as daar sterftes was.
Selfoon-noodnommer 112 Hierdie nommer kan slegs van 'n selfoon af gebel word en sal jou in verbinding met jou selfoonmaatskappye se inbelnooddiens bring, selfs al is jou lugtyd klaar. Die selfoonmaatskappye sal dan die nooddiens naaste aan jou in kennis stel.
Privaat ambulans (ER24) 084 124
Privaat ambulans (Netcare) 082 911

Vul hierdie lys aan met die nommers van jou tuisdorp.

Wenke vir 'n noodsituasie[wysig | wysig bron]

Die span van VIA (DStv-kanaal 147) se mediese werklikheidsprogram, Noodlig, gee 'n paar wenke vir 'n noodsituasie:

  • As iemand naby jou flou val moet jy die persoon onmiddellik op hul rug draai, sodat hul lugweg oop bly. As dit 'n besonder warm dag of omgewing is, waai hulle koel.
  • Lig hul bene bo hul borsvlak.
  • Verwyder enige kledingstukke wat styf sit, soos juwele, dasse of belde.
  • Praat die heeltyd met hulle en skud hulle liggies, sodat hulle nie bewussyn verloor nie.
  • Maak seker dat hulle vir 'n rukkie sit of lê voordat hulle opstaan.
  • Bel nooddienste as 'n persoon ná 'n minuut nie sy of haar bewussyn herwin nie.

Bel dadelik noodhulpdiens wanneer jy die volgende simptome sien:

  • Blou lippe of gesig
  • Onreëlmatige asemhaling
  • Borspyn

Die Suid-Afrikaanse Noodhulpliga[wysig | wysig bron]

Die Suid-Afrikaanse Noodhulpliga (SANL) is in April 1935 gestig en bied noodhulpopleiding aan die gemeenskap in die algemeen, asook by sport en ander gemeenskapsaktiwiteite te bied. Die organisasie is by die Departement van Arbeid geregistreer en volg die riglyne wat deur die Resussitasieraad van Suider-Afrika neergelê is.

Die SANL bied eerstehulpkursusse aan, verkoop eerstehulptoerusting en bied eerstehulp by geleenthede.

Bronne[wysig | wysig bron]