Elijah Ngurare
| Elijah Ngurare | |
| Ampsbekleër | |
| Termynaanvang 21 Maart 2025 | |
| Vise | Lucia Witbooi (2025–hede) |
|---|---|
| President | Netumbo Nandi-Ndaitwah (2025–hede) |
| Voorafgegaan deur | Saara Kuugongelwa |
Persoonlike besonderhede | |
| Gebore | 28 Oktober 1970 Kavangoland, Suidwes-Afrika (nou Namibië) |
| Politieke party | SWAPO |
| Alma mater | University College Cork, Ierland |
Tjitunga Elijah Ngurare (Nkurenkuru, 28 Oktober 1970) is 'n Namibiese politikus en die huidige eerste minister van Namibië. Hy is 'n langdurige lid en ondersteuner van SWAPO, die regerende party van Namibië. Hy het opgang gemaak binne die SWAPO Party Youth League (SPYL), waar hy in 2002 aangestel is as Sekretaris vir Inligting, Publisiteit en Mobilisasie, en in 2007 as Sekretaris-Generaal, 'n pos wat hy tot 2015 beklee het.
Benewens sy politieke loopbaan was Ngurare aktief as akademikus aan die Universiteit van Namibië. Later het hy as direkteur by die Ministerie van Landbou gewerk. Op 21 Maart 2025 het president Netumbo Nandi-Ndaitwah hom as eerste minister van Namibië aangestel, as opvolger van Saara Kuugongelwa.
Opvoeding
[wysig | wysig bron]Ngurare is in Nkurenkuru, Kavangoland, in die destydse Suidwes-Afrika gebore tydens die Suid-Afrikaanse Grensoorlog. As seun het hy, soos baie ander seuns in daardie tyd, sy pa se vee opgepas. Hy is die oudste van sy moeder se nege kinders.[1]
Ngurare het sy hoërskoolopleiding in Rundu en Arandis voltooi. Met 'n beurs het hy in Ohio se Central State University gestudeer, waar hy 'n Baccalaureusgraad in Waterbestuur en Internasionale Betrekkinge behaal het. Daarna het hy 'n meestersgraad in regte aan die Universiteit van Dundee verwerf en in 2009 'n PhD aan die University College Cork in Ierland voltooi.
Politieke loopbaan
[wysig | wysig bron]Dr Ngurare se politieke betrokkenheid het in 1983 op hoërskool begin. In 1986 het hy by SWAPO aangesluit en verskeie poste binne die SWAPO Party Youth League (SPYL) beklee. Hy het tien jaar in die buiteland gestudeer en na sy terugkeer een van Namibië se eerste tegnologies vaardige politici geword. Hy het 'n skootrekenaar vir sy werk gebruik en sosiale media aangewend om die SPYL met die jeug te verbind. In 2004 het hy jeugondersteuning gekry met sy politieke benadering en hy het kunstenaars soos Gazza, The Dogg en Gal Level na SWAPO-geleenthede gebring.
In 2002 is hy as Sekretaris vir Inligting, Publisiteit en Mobilisasie van SPYL aangestel en het in 2005 die leierskap oorgeneem ná die gedwonge uittrede van Paulus Kapia. In 2007 is hy verkies as Sekretaris-Generaal en het hy gereeld propaganda-artikels vir Namibia Today, SWAPO se koerant, geskryf.[2]
In 2015 het hy hierdie pos verloor en is hy uit SWAPO gesit weens die “diskreditering van die party en belediging van partyleiers.” Ná ’n lang regsproses is hy weer as lid opgeneem en in 2020 as Direkteur in die Ministerie van Landbou aangestel. Op 6 Desember 2024 het hy bedank om sy oorgang na die parlement moontlik te maak. Vise-president Netumbo Nandi-Ndaitwah het hom toe op die SWAPO-parlementslys geplaas.[3]
Sakeloopbaan
[wysig | wysig bron]Hy was 'n lid van die raad van direkteure van Namdeb Diamond Corporation.
Persoonlike lewe
[wysig | wysig bron]Dr Ngurare is getroud met Dr. Albertina Mbute Ngurare. Hulle het vier kinders. Hy is ’n Lutheraan en ’n toegewyde kerkganger.
Hy was 'n lid van die musiekgroep Rasta Rebels in Kaisosi, Rundu, gedurende die vroeë 1980's.
Verwysings
[wysig | wysig bron]- ↑ Kashindi Ausiku (12 Maart 2012). "Interview Dr. Ngurare" (in Engels). Geargiveer vanaf die oorspronklike op 13 April 2013. Besoek op 25 Maart 2025.
- ↑ Tileni Mongudhi. "The nine live of Elijah Ngurare". The Namibian Investigative Unit (in Engels). Besoek op 25 Maart 2025.
- ↑ Aletta Shikololo; Edward Mumbuu (10 September 2024). "Swapo pot burns old guard…as electoral college delivers a mixed stew" (in Engels). New Era. Besoek op 25 Maart 2025.
Eksterne skakels
[wysig | wysig bron]
Wikimedia Commons het meer media in die kategorie Elijah Ngurare.
| Voorafgegaan deur Saara Kuugongelwa |
Eerste minister van Namibië 2025–hede |
Opgevolg deur Ampsbekleër |
