Elizabeth Connell
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Elizabeth Connell | |
|---|---|
| Geboortenaam | Frances Elizabeth Connell |
| Gebore | 22 Oktober 1946 Port Elizabeth |
| Sterf | 18 Februarie 2012 Londen |
| Beroep(e) | Sangeres |
| Instrumente | Stem |
Elizabeth Connell (1946–2012) was ’n Suid-Afrikaanse sopraan. Sy was veral bekend vir die vertolking van die heldinne in groot operas deur Strauss, Verdi en Wagner. Tydens die Equity-kunsboikotjare is sy verhinder om in Suid-Afrika op te tree. Ná haar dood is die Elizabeth Connell-prys vir jong dramatiese soprane ingestel.[1]
Lewensloop[wysig | wysig bron]
Frances Elizabeth Connell is op 22 Oktober 1946 in Port Elizabeth gebore.[2] Sy was die dogter van Raymond Connell en Elizabeth Scott.[3] Sy studeer aan die Londense Opera Sentrum en maak haar debuut in 1972 as 'n mezzo-sopraan by die Wexford-feesopera in Ierland.[4] In dieselfde jaar het sy die Maggie Teyte-prys gewen.
Is 1973 is sy genooi om tydens die opening van die operahuis in Sydney, in die eerste opvoering van Sergei Prokofiëf se War and Peace te sing. In 1980 maak sy haar debuut in Bayreuth, Duitsland, as Ortrud in Wagner se Lohengrin en later as Bragáne in sy Tristan und Isolde. Sy was vir vyf jaar aan die Engelse Nasionale Opera verbonde, waarna sy 'n vryskutkunstenaar geword het. In 1981 het sy al haar optredes gestaak. Sy het weer in 1983 begin sing, maar die keer as 'n sopraan.
Connell het in die operahuise van Londen, Parys, Wene, Berlyn, München, Hamburg, New York (by die Metropolitaanse Opera), San Francisco, Milaan (in La Scala), Napels en Genève opgetree. Sy het 'n wye verskeidenheid opera-rolle vertolk en by talle groot opera-feeste opgetree. Sy het ook 'n aantal opnames van haar optredes gemaak.
Sy gee haar laaste vertoning op 27 November 2011 in Hastings, Engeland. In 2012 moes sy by die Opéra de Toulon optree, maar het weens siekte nooit verskyn nie. Connell is op 18 Februarie 2012 in Londen aan kanker oorlede.[4] Sy was 65 jaar old.[5]
Elizabeth Connell het $20 000 vir 'n opera-prys in haar naam agtergelaat. Dramatiese soprane van alle identiteite kan aan die kompetisie deelneem. Die eerste kompetisie het op 13 September 2014 in Sydney plaasgevind. Die wenner ontvang ook 'n oudisie in die Royal Opera House (Covent Garden) as deel van die prys.[6]
Verwysings[wysig | wysig bron]
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ The Grove Book of Opera Singers, ed. Laura Williams Macy (New York: Oxford University Press, 2008), p. 93
- ↑ The International Who's Who 2004 (London: Europa Publications, 2003), p. 348
- ↑ 4,0 4,1 Harris M. Lentz, Obituaries in the Performing Arts, 2012 (Jefferson, NC: McFarland & Company, 2013), p. 66
- ↑ "Norman Lebrecht, Arts Journal (18 Februarie 2012)". Geargiveer vanaf die oorspronklike op 23 Julie 2012. Besoek op 24 Julie 2017.
- ↑ Clive Paget, Elizabeth Connell bequeaths $20,000 prize for dramatic sopranos, Limelight, November 6, 2013
Normdata  |
|
|---|