Elna Crouse

in Wikipedia, die vrye ensiklopedie
Jump to navigation Jump to search

Elna Crouse is ’n Suid-Afrikaanse skrywer en is op 30 Julie 1951 in Port Elizabeth gebore.

Lewe en werk[wysig | wysig bron]

Sy bring die grootste deel van haar skoolloopbaan op Vryburg deur en matrikuleer daarna aan die Hoërskool Voortrekker in Boksburg. Daarna studeer sy aan die Universiteit van Pretoria, waar sy in 1972 'n B.A.-graad in tale met sielkunde as ekstra hoofvak behaal en in 1973 die H.N.O.D. Diploma in buitengewone onderwys. Sy hou daarna skool by die Transoranje Skool vir Dowes en voltooi die B.A. Honneursgraad in sielkunde met deeltydse studie aan die Universiteit van Pretoria in 1975. Daarna werk sy as skoolsielkundige by die inspektoraat van nasionale opvoeding. Sy trou in 1977 met die beeldhouer Tienie Pritchard en verlaat die formele sektor om tuisteskepper te word. Hulle bly in Hartbeespoort en het 'n dogter, Milla. Vanaf 1997–2001 aanvaar sy weer betrekkings as sielkundige berader en menslikeehulpbronbestuurder.[1]Die skrywers Reinet Nagtegaal en Henk Crouse is haar sussie en boetie en haar oudste suster is Marianne.

Skryfwerk[wysig | wysig bron]

Sy publiseer kortverhale in tydskrifte, waarna sy met die kortverhaalbundel 'n Moeg hond onder die bed debuteer.[2] Hierin skryf sy hoofsaaklik oor verhoudings en mense wat voor 'n keuse te staan kom. Verskeie temas word aangeraak. 'n Vrou ondergaan 'n mastektomie en is dan afhanklik van haar man se ondersteuning. 'n Kind oorreed 'n ou hengelaar om nader aan sy seun te kom en 'n vrou gee 'n geskenk aan haar ma in die vorm van 'n liedjie wat sy op die klavier speel. Die titelverhaal is na aanleiding van die man en vrou wie se seks die dogtertjie wakkermaak, wat dan sê dat sy "'n moeg hond" onder die bed hoor.

Sy skryf ook gedigte, wat in Gestaltes van 'n dogter: In konfigurasie[3] gebundel word.[4] Die gedigte vertel die verhaal van die werklike verkragtings van 'n ma en haar dogter en die gevolge daarvan, met die ma as die spreker. Die Griekse mite van Persephone word ook gebruik as agtergrond. Die god van die onderwêreld, Hades, ontvoer vir Persephone en haar ma, Demeter, wat godin van die aarde se vrugbaarheid is, treur só dat die hele wêreld in rou gedompel word. Die oppergod Zeus gryp in en so vertoef Persephone vir ses maande in die onderwêreld by Hades en vir ses maande by haar ma, wat dan ook die begin van ons vier seisoene is. Die ervarings van die spreker en haar dogter laat hulle voor die hekke van die hel omdraai, wat hierdie mite toepaslik maak op die gedigte.

Publikasies[wysig | wysig bron]

  • 1998 – 'n Moeg hond onder die bed
  • 2008 – Gestaltes van 'n dogter: In konfigurasie

Ander verwysings[wysig | wysig bron]

Verwysings[wysig | wysig bron]

  1. Versindaba: http://versindaba.co.za/gedigte/elna-crouse/
  2. Nieuwoudt, Stephanie Beeld: http://152.111.1.88/argief/berigte/beeld/1998/03/3/8/11.html
  3. Coetzee, Corné “Beeld” 25 Februarie 2008
  4. Mynhardt, Elisabeth LitNet: http://argief.litnet.co.za/article.php?news_id=29135