Elsabé Daneel
| Elsabé Daneel | |
| Geboortenaam | Elsabé Grobbelaar |
|---|---|
| Geboorte | 15 Augustus 1955 |
| Nasionaliteit | Suid-Afrikaner |
| Beroep(e) | Aktrise |
| Rolprente | Beloftes van môre, Strikdas, Eintlik nogal baie |
| Internet-rolprentdatabasis-profiel | |
Elsabé Daneel (gebore Grobbelaar op 15 Augustus 1955) is 'n Suid-Afrikaanse aktrise, voordragkunstenaar en aanbieder. Sy is veral bekend vir haar TV-optredes en rolprente soos Beloftes van môre (1981), Strikdas (2015) en Eintlik nogal baie (2016). In die TV-sepie 7de Laan was sy te sien as Linda Jordaan. Haar dogter Roeline Daneel is ook ’n aktrise.[1]
Daneel was hoofmeisie van die Laerskool Jan van Riebeeck en onderhoofmeisie van die Hoërskool Jan van Riebeeck in Kaapstad. Sy het haarself in 2021 in 'n onderhoud met die joernaalprogram Kwêla as "baie voorbeeldig" beskryf, iets wat sy toeskryf aan "daai Dopperetiek" met verwysing na die Dopperkerk, waarin sy grootgeword het. "Dis 'n ding waarvoor ek verskriklik dankbaar is."[2] Sy verwerf 'n B.A.-graad in tale, sielkunde en dramateorie aan die Universiteit van Stellenbosch in 1976 en 'n Hoër Onderwysdiploma in 1977. Sy het in 1981 en '82 die Charles Kebbe Dramaskool in New York bygewoon.[3]
Sy munt uit in beide komiese stukke en ernstige rolle, soos in Deon Opperman se Bittersoet. Sy is ook saam met Niël Rademan te sien in die Lied en Digkuns-programme. Vir Leon Kruger speel sy in die verhoogstuk Ou blare en sy werk dikwels saam met die regisseur Juanita Swanepoel, byvoorbeeld in Uys Krige se Die ryk weduwee.
Filmografie[wysig | wysig bron]
- Beloftes van môre, 1981
- Gideon Scheepers, 1982 as Scheepers se vrou (TV-fliek)
- Mattewis en Meraai, 1983 as Gertie Benade (TV-reeks)
- Fynbos, 1983 as Hester Saaiman (TV-reeks)
- Meisie van Suidwes, 1984 (TV-fliek)
- Vleuels, 1989 as Sandra van Rensburg (TV-reeks)
- Triptiek, 1994 as lt. Mostert (TV-reeks)
- Totsiens Pa, 2014 as Hannie (kortfilm)
- Strikdas, 2015 as Sandra de la Harpe
- Eintlik nogal baie, 2016 as Anita Swartz
Verwysings[wysig | wysig bron]
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Onderhoud met Hannes van Wyk op Kwêla, opgelaai 16 Maart 2021.
- ↑ Elsabé Daneel, Encyclopaedia of South African Theatre, Film, Media and Performance (ESAT), besoek op 13 Mei 2018