Emmentaler

in Wikipedia, die vrye ensiklopedie
(Aangestuur vanaf Emmental)
Emmentaler
Emmentaler
Herkoms Emmental (Switserland)
Vetgehalte 40 %
Vorm Silindries, deursnee 70-100 cm
Hoogte 12-25 cm
Gewig 60-130 kg
Tipe Harde tot halfharde kaas
Oorsprong Koeimelk

Emmentaler is 'n halfharde Switserse kaas, wat oorspronklik uit die Emmental (Emmenvallei) in die ooste van die kanton Bern kom. Emmentaler het intussen 'n generiese naam geword, en kaas met hierdie naam word tans ook in Duitsland, Oostenryk, Denemarke, Frankryk, Finland en Ierland vervaardig.

Emmentaler word van koeimelk gemaak en as ronde kaas met 'n gemiddelde gewig van 75 kilogram bemark.

Die beste tyd om die Switserse kaas van oorsprong te geniet is van Mei tot Oktober, na 'n veredelingstyd van tenminste drie maande. 'n Besonder geurige smaak vereis dat die kaas oor 'n tydperk van agt tot twaalf maande verfyn word.

Die jaarlikse Europese Emmentaler-produksie beloop tot nagenoeg 490 000 ton of sowat ses persent van die totale melkopbrengs van hierdie lande. Frankryk is tans die grootste produsent met sowat 240 000 ton of twaalf persent van die jaarlikse Franse melkproduksie. Veertien persent van die Franse Emmentaler word uitgevoer.