Gaan na inhoud

Ernst Roets

in Wikipedia, die vrye ensiklopedie
Ernst Roets
NasionaliteitVlag van Suid-Afrika Suid-Afrika
BeroepBurgerregte-aktivis, skrywer en rolprentvervaardiger

Ernst Alex Roets (gebore 5 September 1985) is ’n Suid-Afrikaanse burgerregte-aktivis, skrywer en rolprentvervaardiger. Hy is die uitvoerende direkteur van Lex Libertas,‘n organisasie wat as visie stel "...om 'n werkbare politieke bedeling vir die bevolkingsgroepe van Suid-Afrika", te bewerkstellig.[1] Hy was Uitvoerende Hoof vir Strategie en Internasionale Skakeling van die burgeregte organisasie AfriForum en van 2023 tot 2025, Hoof van Beleid van die Solidariteit, vakverbond.[2] Hy is die uitvoerende hoof van die rolprentvervaardigingsmaatskappy Forum Films.

Opvoeding

[wysig | wysig bron]

Roets het op die landboudorp Tzaneen grootgeword waar hy in 2003 aan die Hoërskool Merensky gematrikuleer het. Hy het sy LLB-graad in 2009 aan die Universiteit van Pretoria (UP) verwerf. Tydens sy studentejare het hy op verskeie leierskapstrukture, waaronder die verteenwoordigende studenteraad (VSR) en die senaat, by dié universiteit gedien.

Gedurende sy studentejare het Roets as stigterslid en die eerste nasionale voorsitter van Solidariteit Jeug gedien. In 2008 het Solidariteit Jeug sy naam verander en is die organisasie omskep in AfriForum Jeug. Roets het sy LLM-graad in Publiekreg in 2016 met lof aan die UP behaal. Die titel van sy verhandeling was ’n Peiling van die middele kragtens die Suid-Afrikaanse Grondwet, ter afdwinging van die basiese regte van minderheidsgemeenskappe.[3] Roets het sy doktorsgraad in Publiekreg by UP in 2023 behaal.[4]

Loopbaan

[wysig | wysig bron]

Roets is in 2010 gearresteer nadat hy gepoog het om ’n advertensiebord met die woorde "Welkom in Pretoria" langs die N1-snelweg te installeer. Hierdie aksie was in protes teen die Tshwane Metropolitaanse Munisipaliteit se gebruik van die woord "Tshwane" om tydens die FIFA Sokker-Wêreldbekertoernooi in 2010 na die hoofstad te verwys, terwyl die stad se naam eintlik Pretoria is.[5]

In 2011 word Roets as adjunk-uitvoerende hoof van AfriForum aangestel. Hy het in 2011 namens AfriForum in die saak van AfriForum vs. Malema getuig.[6] Hy het namens AfriForum ’n saak van haatspraak teen Julius Malema aanhangig gemaak nadat Malema die lied "Skiet die Boer" by verskeie politieke byeenkomste gesing het. Die hof het Malema aan haatspraak skuldig bevind.[7] Die Suid-Afrikaanse Menseregtekommissie (MRK) het teen die beslissing na die Gautengse Hooggeregshof geappelleer en het geargumenteer ten gunste van Malema se reg om "Skiet die Boer" te sing.[8] In 2024 het die appèlhof die Suid-Gautengse hooggeregshofse uitspraak van 2022 bevestig, dat die lied, soos gesing tydens die Senekal-voorvalle, nie haatspraak was nie.[9][10]

Roets was van 2012 tot 2023 aan die stuur van AfriForum se veldtog om plaasmoorde tot ’n prioriteitsmisdaad te laat verklaar.

Roets het verskeie konferensies van die Verenigde Nasies (VN) toegespreek, veral oor plaasmoorde en die stand van minderheidsregte in Suid-Afrika. In 2015 het Roets skerp by die VN se kantore in Genève gereageer op ’n beskuldiging deur die Suid-Afrikaanse regering dat dié wat vir prioritisering van plaasmoorde vra, dit slegs doen omdat hulle ’n rasse-agenda dryf en apartheid terug wil bring. In dieselfde jaar het Roets ’n klag van diskriminasie teen die Suid-Afrikaanse regering ingedien by die VN se Special Rapporteur on the situation of human rights defenders, nadat die Suid-Afrikaanse regering polities by die VN ingemeng het om te verhoed dat AfriForum as nieregeringsorganisasie by die VN registreer.[11]

Op 3 Maart 2025 was Roets die gas van die konserwatiewe Amerikaanse podsender, Tucker Carlson, en het oor die “krisis in Suid-Afrika” gepraat. Tydens die onderhoud het hy aangevoer dat die politieke stelsel in Suid-Afrika gedoem is om te misluk en dat die Verenigde State 'n morele verantwoordelikheid het om by te dra tot oplossings vir Suid-Afrika. Hy het ook gesê dat sommige universiteite in Suid-Afrika 'n teorie genaamd Azaniese Kritiese Teorie onderrig, wat 'n filosofiese regverdiging vir geweld teenoor wit mense is, al is dit nie 'n wydverspreide oortuiging nie.[12]

Hy het in Maart 2025 die bekendstelling van die Pionierinisiatief aangekondig deur middel van 'n video wat aanlyn gepubliseer is, 'n nuwe instelling wat sal dien as 'n kombinasie van 'n dinkskrum en drukgroep, wat sal werk aan 'n meer volhoubare politieke bedeling vir Suid-Afrika.[13] Op 15 Mei 2025 is die Pionierinisiatief formeel in Pretoria van stapel gestuur. By die bekendstellingsgeleentheid het Roets aangekondig dat die instelling voortaan as Lex Libertas bekend sal staan. Hy het verklaar dat Suid-Afrika nie 'n vrye land is nie en dat Afrikaners nie 'n vrye volk is nie, en dat die oplossing lê in 'n meer gedesentraliseerde politieke stelsel, gebaseer op die beginsel van selfbestuur.[14]

Bibliografie

[wysig | wysig bron]

2018: Kill the Boer

[wysig | wysig bron]

Roets is die outeur van die boek Kill the Boer wat in Junie 2018 gepubliseer is. Kill the Boer handel oor die wrede werklikheid van plaasaanvalle in Suid-Afrika. In die boek word aangevoer dat die Suid-Afrikaanse regering, weens ’n verskeidenheid van redes, aandadig tot die krisis is. Hierdie redes sluit in: die deprioritisering van plaasaanvalle (ondanks ’n toename in aanvalle); die negatiewe stereotipering van wit boere in besonder; die romantisering van geweld teen boere; die verkondiging van rassehaat vanaf politieke platforms; en die belediging en vernedering van die slagoffers van plaasaanvalle. Die boek onthul verhale van die regstreekse betrokkenheid van veral die regerende African National Congress (ANC), die Suid-Afrikaanse regering en die Suid-Afrikaanse Polisiediens (SAPD) in die beplanning en uitvoer van hierdie aanvalle.

Daar word verder aangevoer dat ’n proses van etniese uitwissing as ’n dreigende gevaar beskou moet word wat verhoed moet word. Op grond van ’n ontleding van duisende nuusartikels word die aandadigheid van die Suid-Afrikaanse media in die negatiewe stereotipering van wit boere ook in die boek aangedui. Verder word ’n verskeidenheid van redes uiteengesit waarom plaasaanvalle tot ’n prioriteitsmisdaad verklaar moet word. Dit sluit in die buitengewone frekwensie van hierdie aanvalle, die buitengewone wreedheid daarvan, asook die unieke rol wat boere in die samelewing speel en die unieke omstandighede waarin boere hulself bevind.

Filmografie

[wysig | wysig bron]

2016: Tainted Heroes

[wysig | wysig bron]

Tainted Heroes (Engels vir "bevlekte helde") is 'n Suid-Afrikaanse dokumentêre film wat deur Forum Films onder regie van Elrich Yssel vervaardig is met Ernst Roets en Beatrice Pretorius as vervaardigers. Die film handel oor die gewelddadige stryd van die African National Congress teen apartheid in Suid-Afrika tussen 1976 en 1994. Die dokumentêr is op die boek People's War: New Light on the Struggle for South Africa deur Anthea Jeffrey gebaseer.[15]

Max du Preez het die film as "kru" en "roekeloos" beskryf, maar daarna toegegee dat hy die film nog nie gesien het nie. Die joernalis Pieter du Toit het gesê dat Roets met vuur speel. Hoewel die ANC nie op die inhoud van die film kommentaar wou lewer nie, het die party die film as propaganda afgemaak.[16]

Persoonlike lewe

[wysig | wysig bron]

Hy is die seun van Sarel Arnoldus en Irma Mariette (née Ernst) van Orania. Roets trou op 5 Desember 2009 met Lelanie de Kock.

Bronne

[wysig | wysig bron]

Verwysings

[wysig | wysig bron]
  1. ↑ Lex Libertas webwerf, https://www.lexlibertas.org.za/af/about/ Besoek 25 Mei 2025.
  2. ↑ Sane Dhlamini, Polity, 3 Augustus 2023. Solidarity appoints AfriForum’s Ernst Roets as Head of Policy. Besoek 25 Mei 2025
  3. ↑ "'n Peiling van die middele kragtens die Suid-Afrikaanse Grondwet ter afdwinging van die basiese regte van die minderheidsgemeenskappe" (in Engels). UPSpace. 2016. Geargiveer vanaf die oorspronklike op 5 September 2019. Besoek op 25 September 2018.
  4. ↑ Solidariteit Beweging, 3 Augustus 2023. Ernst Roets appointed as Head of Policy of the Solidarity Movement Trust, https://beweging.co.za/en/ernst-roets-appointed-as-head-of-policy-of-the-solidarity-movement-trust/#:~:text=Roets%20recently%20completed%20his%20doctorate%20in%20Law%2C%20which,the%20Solidarity%20Movement%20together%20and%20coordinates%20their%20work. Besoek 25 Mei 2025
  5. ↑ "3 held for violating ad by-law" (in Engels). News24. 9 Julie 2010. Geargiveer vanaf die oorspronklike op 29 Augustus 2019. Besoek op 25 September 2018.
  6. ↑ "Afriforum takes Malema to Equality Court" (in Engels). News24. 30 April 2015. Geargiveer vanaf die oorspronklike op 5 September 2019. Besoek op 25 September 2018.
  7. ↑ "Afri-Forum and Another v Malema and Others" (in Engels). saflii. 12 September 2012. Geargiveer vanaf die oorspronklike op 20 Februarie 2020. Besoek op 25 September 2018.
  8. ↑ https://www.politicsweb.co.za/politics/hrc-to-argue-case-that-malema-is-not-guilty-of-hat
  9. ↑ Moosa, Tauriq (30 Mei 2024). "Julius Malema singing 'shoot the boer' is not hate speech, SCA rules" [Julius Malema se sing van "Skiet die Boer" is nie haatspraak nie, beslis appèlhof]. BusinessLIVE (in Engels). Besoek op 9 Augustus 2024.
  10. ↑ "THE SUPREME COURT OF APPEAL OF SOUTH AFRICA JUDGMENT" [UITSPRAAK VAN DIE APPÈLHOF VAN SUID-AFRIKA] (PDF). Southern African Legal Information Institute. 28 Mei 2024. Besoek op 9 Augustus 2024.
  11. ↑ "DIRCO guns for AfriForum at UN - Ernst Roets" (in Engels). politicsweb. 3 Maart 2015. Geargiveer vanaf die oorspronklike op 2 Oktober 2018. Besoek op 25 September 2018.
  12. ↑ Inge Kuhne, 23 Februarie 2025. Ernst Roets aan Tucker Carlson: “SA se politieke stelsel gedoem.”https://www.netwerk24.com/netwerk24/nuus/aktueel/ernst-roets-aan-tucker-carlson-sa-se-politieke-stelsel-is-gedoem-20250222}}
  13. ↑ Xolile Mtembu, 10 Maart 2025, IOL, Ernst Roets calls for Afrikaner freedom and Autonomy in South-Africa, amid launch of Pioneer Initiative. https://trendingonline.co.za/index.php/2025/03/10/iol-exclusive-ernst-roets-calls-for-afrikaner-freedom-and-autonomy-in-south-africa-amid-launch-of-pioneer-initiative/#:~:text=Afrikaner%20Foundation%20executive%20director%20Ernst%20Roets%20and%20self-proclaimed,a%20%E2%80%98more%20sustainable%20political%20dispensation%20for%20South%20Africa.%E2%80%99. Besoek 25 Mei 2025.
  14. ↑ Netwerk 24. Anja van der Merwe, 19 Mei 2025, SA vlugtelinge ‘moet vaandel van vryheid opneem’ – Ernst Roets. https://www.netwerk24.com/netwerk24/nuus/politiek/sa-vlugtelinge-moet-vaandel-van-vryheid-opneem-ernst-roets-20250519. Besoek 25 Mei 2025.
  15. ↑ "People's War: New Light on the Struggle for South Africa" (in Engels). IRR - South African institute of race relations. Geargiveer vanaf die oorspronklike op 5 September 2019. Besoek op 25 September 2018.
  16. ↑ "ANC scoffs at 'propaganda' film claims" (in Engels). IOL. 7 Februarie 2016. Geargiveer vanaf die oorspronklike op 23 November 2018. Besoek op 25 September 2018.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Ernst_Roets&oldid=2812903"