Ernst Thälmann
Ernst Johannes Fritz Thälmann (16 April 1886 – 18 Augustus 1944) was 'n Duitse kommunistiese politikus en leier van die Kommunistiese Party van Duitsland (KPD) van 1925 tot 1933.
As 'n toegewyde kommunis het Thälmann daarna gestreef om die liberale demokrasie van die Republiek Weimar omver te werp, veral gedurende die onstabiliteit van sy laaste jare. Onder sy leierskap het die KPD intiem geassosieer geraak met die regering van die Sowjetunie en die beleid van Josef Stalin. Die KPD onder Thälmann se leierskap het die Sosiaal-Demokratiese Party (SPD) as 'n teenstander beskou en die party het die standpunt ingeneem dat die sosiaal-demokrate "sosiale fasciste" was.
Thälmann was die leier van die paramilitêre Roter Frontkämpferbund. Hy is in 1933 deur die Gestapo in hegtenis geneem en vir elf jaar in eensame opsluiting aangehou. Stalin en Wjatsjeslaf Molotof het oorspronklik Thälmann se vrylating geëis; na die Molotof-Ribbentrop-verdrag is pogings daartoe laat vaar, terwyl Thälmann se partymededinger Walter Ulbricht versoeke om namens hom te pleit, geïgnoreer het. Thälmann is in 1944 op Adolf Hitler se persoonlike bevel in Buchenwald doodgeskiet.
Bronnelys
[wysig | wysig bron]- Biography of Ernst Thälmann Geargiveer 15 Februarie 2012 op Wayback Machine on the website of the Deutsches Historisches Museum (in Duits)
- Lemmons, Russel (2013). Hitler's Rival: Ernst Thälmann in Myth and Memory. University Press of Kentucky.
Eksterne skakels
[wysig | wysig bron]
Wikimedia Commons het meer media in die kategorie Ernst Thälmann.
