Estádio da Luz
| Estádio da Luz | ||
 | ||
| Ligging | Lissabon, Portugal | |
|---|---|---|
| Koördinate | 38°45′10″N 9°11′05″W / 38.7527°N 9.1847°W | |
| Eienaar | Benfica | |
| Kapasiteit | 68 100[1] | |
| Oppervlak | Gras | |
| Konstruksie | ||
| Gebou | 2003 | |
| Geopen | 25 Oktober 2003 | |
| Argitek | HOK Sport | |
| Huurders | ||
| Benfica Portugal | ||
Estádio da Luz (amptelik Estádio do Sport Lisboa e Benfica) is ’n multi-doel stadion in Lissabon, Portugal. Dit word hoofsaaklik vir sokkerwedstryde gebruik en is die tuiste van die Portugese klub Benfica, wat dit besit, asook die Portugese nasionale span by belangrike wedstryde. Die Portugese naam Estádio da Luz beteken in Afrikaans “Ligstadion” of “Stadion van die Lig”.
Die stadion is op 25 Oktober 2003 geopen met ’n vertoonwedstryd tussen Benfica en die Uruguaanse klub Nacional, en het die oorspronklike Estádio da Luz vervang, wat ’n kapasiteit van 120 000 gehad het (sommige wedstryde teen Porto is glo deur 140 000 toeskouers bygewoon). Die nuwe stadion het ’n sitplekvermoë van 68 100. Dit is ontwerp deur HOK Sport Venue Event (nou Populous) teen ’n koste van €160 miljoen, waarvan €22,6 miljoen deur die Portugese regering vir die Europese Kampioenskap in 2004 (Euro 2004) ondersteun is.
As ’n UEFA-kategorie 4 stadion en een van die grootste in Europa (en die grootste in Portugal), het Estádio da Luz verskeie wedstryde van Euro 2004 aangebied (insluitend die eindstryd waar Cristiano Ronaldo troosteloos was nadat Portugal verrassend teen Griekeland verloor het) sowel as die UEFA Champions League-eindstryde van 2014 (waar Cristiano Ronaldo ná ’n laat strafdoel gespog het met sy spiere toe Real Madrid Atlético Madrid geklop het) en 2020 (waar Bayern München Paris Saint-Germain geklop het voor leë tribunes weens die COVID-19-pandemie).[2][3][4] In 2014 is dit in ’n aanlyn-opname deur die Franse sportkoerant L'Équipe as die mooiste stadion in Europa aangewys.[5][6][7]
Estádio da Luz sal ook as een van die speelplekke vir die Wêreldbekertoernooi in 2030 dien, wat Portugal saam met Marokko en Spanje sal aanbied.
Onder die musikante wat op die stadion opgetree het, val Rammstein en Taylor Swift uit. Van 28–30 Junie 2019 het die Internasionale Konvensie van Jehovah se Getuies by die stadion plaasgevind.[8] In die sommer van 2026 beplan die verouderde Iron Maiden om by die stadion op te tree.[9]
Verwysings
[wysig | wysig bron]- ↑ "Estádio da Luz ainda mais imponente". www.slbenfica.pt (in Portugees). Besoek op 11 Julie 2025.
- ↑ "Bruno Fernandes explains why Ronaldo's tears at Euro 2004 became his motivation to succeed". tribuna.com. 4 Junie 2021. Besoek op 21 November 2025.
- ↑ "Cristiano Ronaldo's Shirtless Champions League Celebration May Have Been A Movie Stunt". Business Insider. 28 Mei 2014. Besoek op 21 November 2025.
- ↑ "Champions League & Europa League: Tournaments to be completed in 'final eight' format". BBC Sport. 17 Junie 2020. Besoek op 21 November 2025.
- ↑ "Estádio da Luz é o mais bonito da Europa". Record (in Portugees). 22 Oktober 2014. Geargiveer vanaf die oorspronklike op 24 Oktober 2014. Besoek op 18 Junie 2016.
- ↑ "Luz considerado o estádio mais bonito". SAPO Desporto (in Portugees). 22 Oktober 2014. Geargiveer vanaf die oorspronklike op 22 Januarie 2017. Besoek op 30 Mei 2017.
- ↑ Tavares da Silva, Hugo (22 Oktober 2014). "Estádio da Luz é o mais bonito da Europa". Observador (in Portugees). Besoek op 30 Mei 2017.
- ↑ "Lisbon, Portugal—2019 "Love Never Fails"! International Convention". JW.ORG (in Engels). Besoek op 15 Januarie 2025.
- ↑ "The Run For Your Lives World Tour returns to Europe and beyond in 2026!". Iron Maiden. 18 September 2025. Besoek op 23 September 2025.
| Normdata: Geografies |
|---|
