Evette de Klerk

Evette de Klerk (gebore 21 Augustus 1965) is 'n Suid-Afrikaanse voormalige baan- en veldnaelloper. Sy was die oorheersende vroulike naelloopatleet in Suid-Afrika in die 1980's, en het tien jaar agtereenvolgens van 1982 tot 1991, die 100 en 200 meter vir vroue by die nasionale senior atletiekkampioenskappe gewen. Dit het kampioenskaprekords van 11,06 sekondes (haar leeftydbeste) in die 100 m en 22,36 sekondes in die 200 m ingesluit. Sy het ook drie Suid-Afrikaanse titels in die 400 meter gewen.

Haar persoonlike beste tye in die kort naellope bly albei Suid-Afrikaanse rekords vir die afstande. Haar 200 m-tyd van 22,06 sekondes is die vinnigste wat 'n Afrika-atleet nog aangeteken het, maar dit is nie as die Afrika-rekord erken nie aangesien dit nie deur die kontinentale beheerliggaam bekragtig is nie. Dié tyd het haar tweede in die wêreld oor 200 m in 1989 geplaas, na Dawn Sowell. Benewens hierdie mylpale het sy 'n persoonlike beste van 50,57 sekondes in die 400 m opgestel. 

De Klerk het nie internasionaal meegeding terwyl sy op die hoogtepunt van haar loopbaan was nie as gevolg van die sportboikot teen Suid-Afrika tydens die apartheidsera. Haar enigste groot internasionale optredes vir Suid-Afrika het in haar laaste seisoen in 1993 gekom. 

Sy was 'n dubbele bronsmedaljewenner by die 1993 Afrika-atletiekkampioenskappe en het die podium gehaal in beide die 200 m en 4 × 100 meter aflos. In 1993 verteenwoordig sy Suid-Afrika by die Wêreldatletiekkampioenskappe en was 'n semi-finalis in die 200 m. Sy het aanbiedinge om vir Brittanje mee te ding verwerp terwyl die sportboikot teen Suid Afrika in plek was.

In 1986 en 1987 het sy 'n kort ruk onder haar getroude naam as Evette Armstrong deelgeneem. 

Carina Horn het de Klerk se 100 m nasionale rekord in 2015 geëwenaar, sowat 25 jaar nadat dit opgestel is.