Fürstlich Drehna

in Wikipedia, die vrye ensiklopedie

Fürstlich Drehna (tot 1807 Deutsch Drehna, vanaf 1950 tot 1991 Drehna,[1] Neder-Sorbies: Serbski Drjenow) is 'n stadsdeel van Luckau, 'n nedersetting in die administratiewe distrik Dahme-Spreewald van die Duitse deelstaat Brandenburg. Die nedersetting met 'n bevolking van minder as 300 word beskryf as 'n volmaakte simbiose van 'n waterkasteel (tans 'n vyfsterhotel), 'n kasteeltuin wat deur die befaamde Pruisiese hoftuinier en stadsbeplanner Peter Joseph Lenné aangelê is, die kasteel se historiese brouery, 'n historiese dorpskern, en die omliggende landskap met weivelde, grasland en mere in die omgewing.[2]

Ligging[wysig | wysig bron]

Die ou dorpskool op die markplein
Die waterkasteel van Fürstlich Drehna (14de tot 16de eeu) het sy oorsprong in 'n nabygeleë Slawiese vesting. Dit is, net soos baie ander van Brandenburg se sowat 500 kastele en herehuise, in 'n stylvolle hotel omskep

Fürstlich Drehna is geleë in die Niederlausitz-streek, sowat twaalf kilometer suidoos van Luckau, tien kilometer wes van Calau en 15 km noord van Finsterwalde. Nedersettings in die omgewing sluit Egsdorf in die noorde, Schlabendorf am See en Zinnitz, 'n stadsdeel van Calau in die distrik Oberspreewald-Lausitz, in die noordooste, Groß Jehser en Mallenchen (twee verdere stadsdele van Calau) in die ooste, Klein Mehßow in die suide, Crinitz (in die distrik Elbe-Elster) in die suidweste, Bergen ('n stadsdeel van Luckau) in die ooste en Beesdau ('n buurt van Heideblick) en Görlsdorf ('n stadsdeel van Luckau) in die noordweste.

'n Groot deel van die nedersetting se oppervlakte is in die gebied van die vroeëre oopmyn Schlabendorf-Süd geleë. Dele van die meer Schlabendorfer See en sowat die helfte van die meer Drehnaer See is eweneens in Fürstlich Drehna geleë.

Verwysings[wysig | wysig bron]

  1. Reinhard E. Fischer: Die Ortsnamen der Länder Brandenburg und Berlin: Alter - Herkunft - Bedeutung. Berlin: be.bra Wissenschaft 2005, bl. 213 en 215
  2. Ulrike Wiebrecht: Brandenburg. Dumont Reise-Taschenbuch. Ostfildern: Dumont Reiseverlag 2012, bl. 162