Gaan na inhoud

Faber & Faber

in Wikipedia, die vrye ensiklopedie
Faber & Faber
Tipe
Gestig 1929; 97 jaar gelede (1929)
Stigter(s)Geoffrey Faber
Hoofkantoor Verenigde Koninkryk Londen, Engeland
ProdukteBoeke
Webwerffaber.co.uk

Faber and Faber Limited, alomweë bekend as Faber & Faber of afgekort as Faber, is 'n onafhanklike boekuitgewersmaatskappy gesetel in Londen. Die uitgewers se gepubliseerde outeurs en digters sluit in T. S. Eliot (vroeër 'n redakteur en direkteur van dié uitgewersmaatskappy), W. H. Auden, C.S. Lewis, Margaret Storey (skryfster van jeugboeke),[1] William Golding, Samuel Beckett, Philip Larkin, Sylvia Plath, Ted Hughes, Seamus Heaney, Paul Muldoon, Milan Kundera en Kazuo Ishiguro.[2]

Die uitgewersmaatskappy is in 1929 gestig. In 2006 is die maatskappy as die KPMG uitgewery van die jaar gekies.[3]

Faber and Faber Inc., voorheen die Amerikaanse tak van die Londense maatskappy, is in 1998 verkoop aan die Georg von Holtzbrinck Publishing Group-maatskappy Farrar, Straus en Giroux (FSG). Faber & Faber het die vennootskap met FSG in 2015 beëindig en sy boeke direk begin versprei in die Verenigde State.[4]

Geskiedenis

[wysig | wysig bron]

Die firma is in 1929 gestig, maar het sy oorsprong in die Scientific Press, wat besit is deur Sir Maurice en Lady Gwyer. Die Scientific Press het 'n groot deel van sy inkomste verkry uit die weeklikse tydskrif The Nursing Mirror. Die Gwyers se begeerte om uit uit te brei na die publikasie van handelslektuur het hul gelei na Geoffrey Faber, 'n genoot van All Souls College, Oxford; in 1925 kom Faber and Gwyer tot stand. Na vier jaar is The Nursing Mirror verkoop en Geoffrey Faber en die Gwyers het ooreengekom om hul eie weë in te slaan. Faber het die maatskappynaam Faber and Faber gekies, alhoewel daar nie 'n ander Faber betrokke was nie.[5]

T. S. Eliot, wat aan Faber voorgestel is deur Charles Whibley,[6] het Lloyds Bank in Londen verlaat om by Faber aan te sluit as 'n literêre raadgewer; in die eerste seisoen het die firma Eliot se Poems 1909–1925 gepubliseer. Die katalogusse uit die vroeë jare sluit boeke in deur Ezra Pound, Jean Cocteau, Herbert Read, Max Eastman, George Rylands, John Dover Wilson, Geoffrey Keynes, Forrest Reid, Charles Williams en Vita Sackville-West. In 1928 het Faber & Faber sy eerste kommersiële sukses gepubliseer: Memoirs of a Fox-Hunting Man. Die boek is aanvanklik anoniem gepubliseer; die skrywer se naam, Siegfried Sassoon, is aangebring op die titelblad van die tweede druk. Oor die volgende ses maande is die boek agt keer herdruk.

Rol as uitgewery

[wysig | wysig bron]

Poësie was aanvanklik die bekendste genre van die maatskappy, met W. H. Auden, Stephen Spender en Louis MacNeice in aansluiting tot Ezra Pound, Marianne Moore, Wyndham Lewis, John Gould Fletcher, Roy Campbell, James Joyce, David Jones en Walter de la Mare wat onder T.S. Eliot se leiding gepubliseer is.[7]

Onder Geoffrey Faber se voorsitterskap was onder andere Eliot, Richard de la Mare, Charles Stewart en Frank Vigor Morley in 1929 raadslede. Die maatskappy se kunsdirekteur was Berthold Wolpe.[8] Faber het biografieë, memoires, fiksiewerk, poësie, politieke en godsdienstige essays, monografieë oor kuns en argitektuur en kinderlektuur gepubliseer. Dit het ook Eliot se literêre resensiewerk, The Criterion, gepubliseer. Eliot het twee boeke deur George Orwell verwerp, A Scullion's Diary (die oorspronklike titel van Down and Out in Paris and London) en Animal Farm.[7]

Gedurende die Tweede Wêreldoorlog het papierskaarste gelei tot hoë winste, maar baie van die wins is aangewend om belasting te delg.

Noemenswaardige na-oorlogse skrywers sluit in William Golding (alhoewel die maatskappy byna sy Lord of the Flies verwerp het),[9] Lawrence Durrell, Robert Lowell, Ted Hughes, Sylvia Plath, W. S. Graham, Philip Larkin, P. D. James, Tom Stoppard en John Osborne. Die maatskappy het sy belegging in kontemporêre drama verhoog, met toneelstukke deur drie Nobelpryswenners: Harold Pinter, Samuel Beckett en T. S. Eliot wat deur die maatskappy gepubliseer is. Ander dramaturge het later by Faber aangesluit, insluitende Alan Ayckbourn, Alan Bennett, Brian Friel, Tony Harrison, David Hare, Frank McGuinness en Timberlake Wertenbaker.[10]

Huidig

[wysig | wysig bron]

Moderne skrywers soos Kazuo Ishiguro, Peter Carey, Orhan Pamuk en Barbara Kingsolver het ook by Faber aangesluit. Bykomend hiertoe, het Faber die vertaalde werk van prominente romansiers en digters gepubliseer, soos Milan Kundera, Thomas Bernhard, Günter Grass, Nikos Kazantzakis, Wisława Szymborska, Mario Vargas Llosa en Czesław Miłosz. Nadat die maatskappy vir verskeie jare die toneelstukke van Samuel Beckett gepubliseer het, het die maatskappy in 2007 die regte verkry tot Beckett se oorblywende oeuvre van die uitgewery John Calder. Faber het in Oktober 2011 aangekondig dat Jarvis Cocker, hoofsanger van die musiekgroep Pulp, by die firma sou aansluit as hoofredakteur, 'n aanstelling soortgelyk aan dié wat gehou is deur Pete Townshend van The Who in die 1980's.[7]

In 2008 is die druknaam Faber Finds gestig om boeke te publiseer wat uit druk is maar waarop kopiereg steeds bestaan, met gebruikmaking van druk-op-versoek-tegnologie.[11][12] Werke wat onder dié druknaam heruitgereik is sluit in items uit die Mass-Observation-argiewe, en werke deur John Betjeman, Angus Wilson, A. J. P. Taylor, H.G. Wells, Joyce Cary, Nina Bawden, Jean Genet, P. H. Newby, Louis MacNeice, die kritikus John Carey, F. R. Leavis, Jacob Bronowski, Jan Morris en Brian Aldiss. In 2009 het Faber Finds e-boeke begin uitgee.[13]

Faber se Amerikaanse tak is in 1998 verkoop aan Farrar, Straus en Giroux ("FSG"), waar dit 'n druknaam is wat fokus op die kunste, vermaak, media en populêre kultuur. In Februarie 2015 is Faber se venootskap met FGS egter beëindig.[14]

Ligging

[wysig | wysig bron]

Die boekuitgewersmaatskappy se kantore was oorspronklik geleë te 24 Russell Square, in Bloomsbury, Londen. Faber het later verhuis na 3 Queen Square, Londen, en op 19 Januarie 2009 het die maatskappy verhuis na Bloomsbury House, 74–77 Great Russell Street, Londen. Die maatskappy het in 2023 verhuis na The Bindery, Hatton Garden, Londen.

Nobelpryswenners wat gepubliseer is deur Faber

[wysig | wysig bron]

Verwysings

[wysig | wysig bron]
  1. ↑ "Publication Series: Faber Fanfares". isfdb.org. Besoek op 3 Maart 2022.
  2. ↑ Garner, Dwight (23 Augustus 2019). "Two New Books Have Anglophiles and Bibliophiles Covered". The New York Times.
  3. ↑ "Awards & Prizes". Faber and Faber. Geargiveer vanaf die oorspronklike op 8 Augustus 2014. Besoek op 25 Julie 2014.
  4. ↑ Dilworth, Dianna (10 April 2015). "Faber & Faber Teams With Perseus to Enter U.S. Market Directly". Galley Cat. Besoek op 11 Desember 2017.[dooie skakel]
  5. ↑ Toby Faber, Faber & Faber: The Untold Story (2019),
  6. ↑ Kojecky, Roger (1972). T. S. Eliot's Social Criticism. Faber & Faber. p. 55. ISBN 0571096921.
  7. 1 2 3 Faber, Faber & Faber: The Untold Story (2019).
  8. ↑ Pardey, James (Desember 2011). "Wolpe, Albertus and Faber's Classic Covers". Creative Review.
  9. ↑ Faber, Toby (28 April 2019). "Lord of the Flies? 'Rubbish'. Animal Farm? Too risky – Faber's secrets revealed". The Observer. Londen. Besoek op 28 April 2019.
  10. ↑ "Content Partners". Drama Online. Besoek op 19 April 2019.
  11. ↑ Dammann, Guy (2 Mei 2008). "Faber Launches Print-on-Demand Classics". The Guardian. Besoek op 4 Maart 2010.
  12. ↑ Page, Stephen (31 Mei 2008). "Faber Finds: Your Own Private Printing Press". The Daily Telegraph. Londen. Geargiveer vanaf die oorspronklike op 12 Januarie 2022. Besoek op 4 Maart 2010.
  13. ↑ Neilan, Catherine (30 Junie 2009). "Faber Finds branches into e-books for anniversary". TheBookseller.com. Geargiveer vanaf die oorspronklike op 26 September 2009. Besoek op 4 Maart 2010.
  14. ↑ Farrington, Joshua (18 Februarie 2015). "Faber ends FSG partnership". The Bookseller. Besoek op 19 Julie 2015.

Verdere leesstof

[wysig | wysig bron]
  • Toby Faber, Faber & Faber: The Untold Story, Faber & Faber, 2019.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Faber_%26_Faber&oldid=2822923"