Fair Play
| Fair Play | |
|---|---|
| Regisseur | Chloe Domont |
| Vervaardiger |
|
| Draaiboek | Chloe Domont |
| Met |
|
| Musiek deur | Brian McOmber |
| Kinematografie | Menno Mans |
| Ateljee |
|
| Verspreider | Netflix |
| Uitgereik | 20 Januarie 2023 |
| Speeltyd | 113 minute[1] |
| Land | VSA |
| Taal | Engels |
| IMDb-profiel | |
Fair Play is 'n Amerikaanse erotiese rillerrolprent van 2023 wat deur Chloe Domont geskryf en geregisseer is. Die hoofakteurs is Phoebe Dynevor, Alden Ehrenreich, Eddie Marsan en Rich Sommer. Die prent gaan oor 'n jong paartjie wie se verhouding begin verbrokkel ná 'n onverwagte bevordeing by 'n skansfonds.
Die rolprent se première was op 20 Januarie 2023 op die Sundance-rolprentfees en dit is op 29 September in teaters uitgereik voordat dit op 6 Oktober op Netflix begin stroom is. Fair Play het positiewe resensies gekry.
Akteurs
[wysig | wysig bron]- Phoebe Dynevor as Emily Meyers
- Alden Ehrenreich as Luke Edmunds
- Rich Sommer as Paul, 'n kollega
- Eddie Marsan as Campbell
- Geraldine Somerville as Emily se ma
Storielyn
[wysig | wysig bron]Bederwingswaarskuwing: Die storielyn en/of storie se einde volg hieronder.
.jpg)
.jpg)
Emily Meyers en Luke Edmunds, ontleders by 'n skansfonds in Manhattan, is in 'n geheime, passievolle verhouding, maar hulle kollegas weet dit nie. Hy vra haar om met hom te trou en sy sê ja. Die volgende dag word een van die fonds se bestuurders afgedank. Emily vertel vir Luke sy het haar kollegas hoor sê Luke word vir die pos oorweeg en hulle vier dit dié aand. Op 'n laatnagvergadering met Campbell, die maatskappy se uitvoerende beampte, hoor sy sy het die pos gekry. Luke sê hy is bly vir haar part en ondersteun haar.
Terwyl Emily in haar nuwe pos gevestig raak, word Luke se jaloesie duidelik, en dit lei tot spanning in hulle verhouding. Luke doen 'n kursus by 'n selfhelpghoeroe wat mense leer om hulle by die werk te laat geld. Toe Emily hom uitvra oor die $3 000 wat hy op die kursus uitgegee het, sê Luke sy sal self daarby baat vind om haar beter te laat geld.
Terwyl Emiliy een aand drankies drink saam met Campbell en Paul, 'n senior beampte by die maatskappy, vind sy uit Campbell wil van Luke ontslae raak omdat hy nie bekwaam genoeg is nie. Sy probeer Luke se posisie in die maatskappy verbeter, maar dit boemerang toe hy 'n swak beleggingsbesluit neem wat die maatskappy $15 miljoen kos, en Campbell beledig Emily. Luke pobeer vir sy fout vergoed deur inligting oor 'n maatskappy, waaruit hulle geld kan maak as dit ondergaan, aan Emily te lek. Sy is egter bang die transaksie is onwettig en sy stel aan Campbell voor hulle maak geld uit 'n ander maatskappy se ondergang, en dit werk. Sy kry 'n kommissie van $575 000.
Emily gaan dié aand saam met manlike kollegas na 'n ontkleeklub en kom dronk tuis. Luke stel nie belang om met haar seks te hê nie. Toe nog 'n bestuuder die volgende dag afgedank word, wil Luke hê Emily moet hom vir die pos aanbeveel, maar sy skimp daarop dat Campbell hom nie wil bevorder nie. Hy gaan na Campbell se kantoor en maak 'n toespraak oor hoe lojaal hy aan hom is, maar vind uit hy het reeds die pos gevul.
Dié aand vind Emily uit haar ma het 'n verlowingspartytjie vir hulle gereël. 'n Dronk Luke beskuldig haar daarvan dat sy sy pos gesteel het, maar sy onthul dat Campbell hom wil afdank, en Luke storm uit. Die volgende dag kom hy by Campbell se kantoor in terwyl Emily daar is en skel hom uit. Hy onthul dat hy en Emily in 'n verhouding is, wat teen die maatskappy se beleid is.
Emily sien hom eers weer op die verlowingspartytjie, en hulle stry voor die familie. Sy slaan Luke met 'n drankbottel teen die kop toe hy sê sy het seksuele gunsies gedoen vir die bevordering. Emily gaan badkamer toe en Luke kry haar daar. Hy verkrag haar toe hulle weer begin stry. In die proses stamp hy haar kop teen 'n wasbak.
Toe Emily terugkeer huis toe, kry sy Luke daar. Hy sê hy beplan om uit te trek en by sy broer in te trek. Sy dreig hom met 'n mes sodat hy haar verskoning moet vra vir die verkragting. Sy val hom aan en hy begin huil. Nadat hy verskoning gevra het, sê sy het moet loop en glimlag tevrede.
Ontvangs
[wysig | wysig bron]Op Rotten Tomatoes het die rolprent 'n goekeuringsyfer van 86%, gebaseer op 233 resensies, met 'n gemiddelde punt van 7,4/10. Op Metacritic kry dit 73 uit 100, gebaseer op 47 resensies, wat dui op 'n "algemeen gunstige" ontvangs.[2]
In sy resensie vir Variety prys Owen Gleiberman die draaiboek en regie van Domont, sowel as de toneelspel. Hy noem dit 'n "goeie klein fliek".[3] Op die webtuiste IndieWire gee Ryan Lattanzio dit 'n A-, en prys die draaiboek en toneelspel (veral Ehrenreich s'n).[4]
Kevin Maher van The Times gee dit 'n punt van vier uit vyf.[5]
Verwysings
[wysig | wysig bron]- ↑ "Fair Play (18)". British Board of Film Classification. 23 Augustus 2023. Besoek op 22 Augustus 2023.
- ↑ "Fair Play reviews". Metacritic. CBS Interactive. Besoek op 25 Junie 2025.
- ↑ Gleiberman, Owen (21 Januarie 2023). "'Fair Play' Review: A Gripping Financial Drama Dunked in Up-to-the-Minute Sexual Politics". Variety. Besoek op 26 Januarie 2023.
- ↑ Lattanzio, Ryan (21 Januarie 2023). "'Fair Play' Review: This Sick Psychosexual Finance Thriller Is 'Industry' Directed by Adrian Lyne". IndieWire. Besoek op 26 Januarie 2023.
- ↑ Maher, Kevin. "Fair Play review — sex, lies and jealousy on Wall Street". The Times. Besoek op 26 Januarie 2023.
Skakels
[wysig | wysig bron]- Fair Play in die Internet-rolprentdatabasis
- Fair Play op Netflix
Hierdie artikel is in sy geheel of gedeeltelik uit die Engelse Wikipedia vertaal.
