Far breton
Far breton is 'n gewilde melktert wat in Bretagne warm as nagereg of koud as tert bedien word. Daar is baie variasies van die resep, maar die hoofbestanddele is tans gewoonlik meelblom, eiers, melk, suiker, droë vrugte (pruime), botter, vanielje en calvados of rum na smaak.
Geskiedenis[wysig | wysig bron]
Far breton, wat in Bretons ook as Farz Forn bekend staan, was oorspronklik 'n spesiale nagereg, wat net op feesdae soos Mardi Gras, Paassaterdag, Pase en tradisionele Bretonse feeste soos die pardons bedien is.
Net soos die bekende crêpes en graanpap was farz vroeër 'n belangrike stapelvoedsel van die plattelandse bevolking, en die resepte is eintlik uit nood gebore. Al kon die meeste arm boeregesinne vleis en ander geregte nie bekostig nie, was meelblom, eiers, melk, suiker en botter steeds volop.
Die historiese voorloper van die huidige Far breton is farz wat in 'n sop gekook, verbrokkel of in snye gesny en daarna saam met vleis en groente geniet is. Hierdie tradisie leef nog steeds voort in die département Finistère waar kig ha farz veral op Saterdae geniet word.
Die term farz forn verwys na farz wat in die oond gebak word en onder meer in Bretonse bakkerye te koop is.
Metode[wysig | wysig bron]
- 250 gram meelblom
- 150 gram suiker
- 4 eiers
- 1 pakkie vanieljesuiker of vanieljegeursel
- 1 liter melk
- 100 gram droë vrugte (pruime; vars pruime of rosyntjies kan ewe goed gebruik word)
- botter
- 1 glasie calvados of rum na smaak
- Kaneel na smaak
Vermeng eers droë bestanddele (meelblom, suiker en vanieljesuiker). Voeg eiers by en klits saam (of skei eiers en voeg geklitste eiergele en geklitste eierwit apart by). Maak aan met melk en voeg calvados of rum na smaak by.
Smeer botter in tertbak en plaas droë vrugte in die bak. Gooi deeg daaroor. Bak 45 tot 60 minute in voorverhitte oond by 175 °C tot 200 °C tot ligbruin en gaar. Strooi suiker en/of kaneel na smaak daaroor.