Fort Nottingham
Fort Nottingham is 'n uitgediende fort in die KwaZulu-Natal Middeland in Suid-Afrika. Die fort is venoem na die Nottinghamshire Regiment, 45ste Sherwood Foresters, wat die fort in 1856 gestig het. Die fort is oorspronklik ontwikkel as 'n voorsieningspos om Britse setlaars aan die voetheuwels van die Drakensberge te beskerm teen veediefstal deur die plaaslike Sanbevolking. Die nabygeleë dorpie Nottingham Road is na die fort vernoem.[1]
Teen 1848 het meeste van die Boere in die Middeland van Natal al hulle plase verkoop of die huur daarvan opgesê en noord getrek om Britse heerskappy in die Kroonkolonie van Natal te vermy. Britse setlaars, meestal uit Skotland het hulle op die plase gevestig. Die nuwe setlaars het spoedig dieselfde probleme as die boere ondervind – gereelde strooptogte deur die San wat Natal deur die Drakensberge binnegekom het. Sedert daar begin is om rekord te hou, is daar tussen 1845 en 1872 2 287 stuks beeste en 400 perde deur die San gesteel. Setlaar boere het gedreig om hulle plase te verlaat wat daartoe gelei het dat die waarnemende Luitenant-Goewerneur, kol. H Cooper, in 1856 versoek het dat 'n militêre buitepos in die Middelande opgerig word. Die 45ste Regiment het 'n klein fort en 'n kothuis vir die bevelvoerende sersant van die garnisoen opgerig. Dié het uit ses manskappe van die Cape Mounted Rifles onder bevel van sersant John Quick gestaan. 'n Klein dorpie is aangelê en 'n buffersone van 13 000 akker tussen die Drakensberge en die Natal Middeland afgebaken.[2]
Die fort is die derde oudste fort in Natal.
Verwysings[wysig | wysig bron]
- ↑ Midlands Reservations Nottingham Road Historical & Cultural Attractions, besoek op 3 Februarie 2007
- ↑ Zulu Kingdom – KwaZulu-Natal Geargiveer 3 Februarie 2007 op Wayback Machine Fort Nottingham's 150th Anniversary – Maart 2005 Geargiveer 1 Oktober 2006 op Wayback Machine, besoek op 3 Februarie 2007
