Franse nasionale vrouerugbyspan

Frankryk
Unie		Franse Rugbyfederasie (FFR)
Bynaam(e)		Les Bleues
Embleem		die Galliese hoenderhaan
Afrigter(s)		David Ortiz en Gaëlle Mignot (sedert 2022)
Kaptein(s)		Manaé Feleu
Spankleure		Alt. kleure
Statistiek
Meeste toetse		Laëtitia Salles (92)
Eerste internasionale wedstryd
(ook die wêreld se eerste) Nederland 0–4 Frankryk (Utrecht, Nederland; 13 Junie 1982)
Grootste oorwinning
Frankryk 99–0 Japan (Edinburg, Skotland; 17 April 1994)
Grootste nederlaag
Frankryk 0–109 Nieu-Seeland (Edmonton, Kanada; 14 September 1996)
Wêreldbeker
Verskynings		9/9 (Eerste in 1991)
Beste uitslag		Derde plek in 1991, 1994, 2002, 2006, 2014, 2017 en 2021
Unie webwerf
www.ffr.fr

Die Franse nasionale vrouerugbyspan (Frans: Équipe de France féminine de rugby à XV) is die nasionale vrouerugbyspan wat Frankryk in internasionale wedstryde (toetswedstryde) verteenwoordig. Rugby word in Frankryk deur die Franse Rugbyfederasie (Fédération française de rugby, FFR) geadministreer. Hulle word na aanleiding van die nasionale mansrugbyspan Les Bleus ook Les Bleues genoem. Frankryk neem jaarliks aan die Sesnasies-vrouetoernooi deel, saam met Engeland, Ierland, Italië, Skotland en Wallis. Frankryk het die kampioenskap reeds ses keer gewen, insluitende vyf Grand Slams, by altesaam 30 toernooie.

Frankryk het sy eerste toetswedstryd in 1982 gespeel, toe hulle in die eerste internasionale vrouerugbywedstryd weg in Utrecht Nederland geklop het. Frankryk speel tradisioneel in blou truie met wit broeke en rooi sokkies – wat aan die kleure van die vlag van Frankryk ontleen is. Naas hul kortnaam XV de France (XV of quinze verwys na die 15 spelers) dra die span dus die bynaam les bleues. Die Franse embleem is ’n goue Galliese hoenderhaan op ’n rooi skild. Hul alternatiewe kleure bestaan uit ’n wit trui met donkerblou broeke en wit sokkies. Frankryk se internasionale wedstryde word op verskeie plekke dwarsdeur die land gespeel.

Frankryk se belangrikste internasionale verskyning is tydens die vierjaarlikse vrouerugbywêreldbekertoernooi wat sedert 1991 beslis word. Sedert die eerste 1991-toernooi het Frankryk by elke toernooi tot die uitklopfase gevorder en sewe keer die derde plek behaal. Frankryk het die Vrouerugbywêreldbeker 2014 aangebied. Een voormalige Franse rugbyspeler is in Wêreldrugby se Heldesaal opgeneem. Frankryk is tans (Junie 2025) vierde op Wêreldrugby se wêreldranglys gelys.

Beheerliggaam

Die hoofartikel vir hierdie afdeling is: Franse Rugbyfederasie.

Die beheerliggaam vir rugby in Frankryk is die Franse Rugbyfederasie (Fédération française de rugby, FFR). Die FFR is op 13 Mei 1919 gestig en het die sportkommissie van die polisportiewe beheerliggaam, die Unie van Franse atletiese sportverenigings (Union des sociétés françaises de sports athlétiques, USFSA), vervang. Die FFR het op sy beurt in 1934 FIRA (Fédération internationale de rugby amateur; nou Rugby Europa) as ’n mededinger vir die Internasionale Rugbyvoetbalraad (IRVR; nou Wêreldrugby) gestig; hulle het eers in 1978 ’n lid van laasgenoemde geword. As gevolg van die baie groter gewildheid van rugby in Suid-Frankryk was dié sport veral in Oksitanië oor dekades heen deur ’n kleinskaalse strukturering gekenmerk. In die noorde van die land het elke plaaslike beheerliggaam toesig gehou oor ’n groter geografiese gebied. As deel van ’n fundamentele strukturele hervorming van die FFR in 2018 het die destydse 26 plaaslike beheerliggame 13 nuwes gevorm, wat nou amper met die geografiese uitbreiding van dié van die Franse geweste ooreenstem.

Drie plaaslike beheerliggame is oorgrens: Aan die Ligue régionale Auvergne-Rhône-Alpes de rugby behoort ook ’n Switserse span, terwyl Andorra en Monaco onderskeidelik onder toesig van die Ligue régionale Occitanie de rugby en die Ligue régionale Provence Alpes Côte d'Azur de rugby is. Die Ligue nationale de rugby reël die professionele spelbedryf in Frankryk; hulle hou toesig oor die twee belangrikste Franse rugbytoernooie, die Élite 1 met twaalf spanne en die Élite 2 met tien spanne.

Geschichte

Frankryk tydens die Sesnasies-vrouetoernooi2014

Volgens vroeë optekeninge het Franse vroue reeds in die 1890’s rugby gespeel. In die 1920’s was die sportsoort barette baie gewild wat baie ooreenkomste met rugby getoon het en daar is nasionale kampioenskappe beslis. Ná die 1930’s het dié sport egter amper heeltemal verdwyn en dit is eers weer in 1965 herleef, toe studentegroepe in Lyon en Toulouse daarop besluit het om aan die liefdadigheidsveldtog teen honger in die wêreld deel te neem. Die meeste van hulle het broes of vriende gehad wat rugby gespeel het en sodoende het hulle ’n liefdadigheidswedstryd in Bourg-en-Bresse aangebied.

Dit was baie suksesvol, waarvolgens hierdie wedstryde gereeld aangebied is en veral in die suide van die land studente ná hul matriek klubs gestig het. In 1969 is die beheerliggaam Association française de rugby féminin (ARF, “Franse Vrouerugbyvereniging”) gestig. Ten spyte van die oorspronklike afkeuring van vrouerugby deur beide die regering en die Franse Rugbyfederasie (wat alle FFR-beamptes tydelik verbied het om vrouewedstryde te lei), het in 1976 reeds twaalf klubs aan die nasionale kampioenskap deelgeneem.

Tot in 1982 het die aantal klubs verdubbel en die ARF het ’n ooreenkoms onderteken met die FFR, wat sy amptelike ondersteuning gegee het, en in dieselfde jaar het Frankryk in die heel eerste toetswedstryd teen Nederland gespeel.

Sedert 2000 het Frankryk ses Sesnasies-vrouetoernooie gewen en is daarmee ná Engeland dié toernooi se tweede suksesvolste span.

Kleure, embleem en naam

Die Franse vrouerugbyspan dra gewoonlik blou truie, wit broeke, en rooi sokkies, die kleure van die nasionale vlag, en hulle word dus les tricolores (“die driekleuriges”) genoem. Aangesien die Franse span nou veral blou truie dra, word na die span, net soos baie ander Franse sportspanne, dikwels as les Bleues (“die bloues”) verwys. As die trui met dié van hul opponente ooreenstem – soos in wedstryde teen Skotland en Italië – dra Franse spelers wit.

Die Franse rugby-embleem is ’n goue Galliese hoenderhaan op ’n rooi skild.

Stadions

Net soos ander vername rugbylande soos Ierland, Italië, Kanada, Nieu-Seeland, Skotland, Suid-Afrika, die Verenigde State en Wallis beskik Frankryk oor geen amptelike tuisstadion vir sy nasionale span nie. Die Franse gebruik vir hul toetse eerder ’n verskeidenheid stadions dwarsdeur Frankryk.

Rugbywêreldbekerstadions

Die hoofartikel vir hierdie afdeling is: Vrouerugbywêreldbeker 2014.

Frankryk het die Vrouerugbywêreldbeker 2014 aangebied. Die groepfase is op die Centre national du rugby in Marcoussis beslis, terwyl die uitklopfase op die Paryse Stade Jean-Bouin gehou is.

Toetswedstryde

Frankryk het 187 van sy 272 toetswedstryde gewen, ’n wenrekord van 68,75%. Frankryk se statistieke in toetswedstryde teen al die lande, in alfabetiese volgorde, is soos volg (korrek teen Junie 2025):

Opponent	Gespeel	Gewen	Verloor	Gelykop	% Gewen
Australië	5	4	1	0	80,00
België	1	1	0	0	100,00
Duitsland	1	1	0	0	100,00
Engeland	57	13	44	0	22,81
Fidji	1	1	0	0	100,00
Groot-Brittanje	4	3	1	0	75,00
Ierland	32	28	3	1	87,50
Italië	28	23	4	1	82,14
Japan	3	3	0	0	100,00
Kanada	16	9	7	0	56,25
Kasakstan	3	3	0	0	100,00
Nieu-Seeland	10	4	6	0	40,00
Nederland	12	11	1	0	91,66
Skotland	30	24	5	1	80,00
Swede	4	4	0	0	100,00
Spanje	19	14	5	0	73,68
Suid-Afrika	5	4	0	1	80,00
Verenigde State	13	10	2	1	76,92
Wallis	30	26	4	0	86,67
Algeheel	272	187	79	5	68,75

Wedywering met ander nasionale spanne

Engeland en Frankryk het tot dusver in 57 toetswedstryde ontmoet, waarvan Engeland 44 gewen het en Frankryk 13. Gedurende wêreldbekertoernooie het albei spanne tot dusver vier keer ontmoet, waarvan Engeland al die wedstryde gewen het. Wedstryde tussen albei spanne word deur die pers en die ondersteuners in albei lande Le Crunch genoem.

Rekords

Wêreldbekerrekord

Frankryk het tot dusver aan elke vrouerugbywêreldbekertoernooi deelgeneem en sewe keer die derde plek behaal.

Jaar	Uitslag
1991	Derde plek
1994	Derde plek
1998	Agste plek
2002	Derde plek
2006	Derde plek
2010	Vierde plek
2014	Derde plek
2017	Derde plek
2021	Derde plek
2025	gekwalifiseer
2029	N.v.t.
2033	N.v.t.

Vyfnasies / Sesnasies

Frankryk se enigste jaarlikse toernooi is die Sesnasies-vrouetoernooi waartydens hulle teen vyf ander Europese lande speel: Engeland, Ierland, Italië, Skotland en Wallis. Die Sesnasies het begin as die Tuisnasies-toernooi in 1996 en Frankryk het in 1999 by hulle aangesluit om sodoende die Vyfnasies te vorm. In 2002 kon Frankryk sy eerste titel inpalm. Frankryk is net ná Engeland die Sesnasies se tweede suksesvolste span. Tot dusver kon die Franse ses toernooie wen. Hulle het tot dusver vyf Grand Slams aangeteken.

• 6 titels (2002, 2004, 2005, 2014, 2016, 2018)
• 5 Grand Slams (2002, 2004, 2005, 2014, 2018)

Europese Vrouerugbykampioenskap

Frankryk het voorheen aan die Europese Vrouerugbykampioenskap deelgeneem en vyf toernooie beklink.

• Titeloorwinnings (5): 1988, 1996, 1999, 2000, 2004

Spelers

Huidige span

Die volgende spelers het die Franse span gevorm tydens die Sesnasies-vrouetoernooi 2025:

Agterspelers (arrières) Speler Posisie Klub Toetswedstryde Océane Bordes Skrumskakel Toulouse 01 Pauline Bourdon Sansus Skrumskakel Toulouse 61 Alexandra Chambon Skrumskakel Grenoble 25 Carla Arbez Losskakel Bordeaux 07 Lina Tuy Losskakel Romagnat 07 Nassira Konde Senter Bordeaux 14 Lina Queyroi Senter Toulouse 17 Gabrielle Vernier Senter Blagnac 49 Kelly Arbey Vleuel Toulouse 02 Mélissande Llorens Vleuel Blagnac 12 Marine Ménager Vleuel Montpellier 52 Montserrat Amédée Heelagter Bordeaux 06 Émilie Boulard Heelagter Blagnac 33 Morgane Bourgeois Heelagter Bordeaux 08

Voorspelers (avants) Speler Posisie Klub Toetswedstryde Célia Domain Haker Blagnac 07 Élisa Riffonneau Haker Grenoble 12 Agathe Sochat Haker Bordeaux 56 Rose Bernadou Stut Montpellier 17 Manon Bigot Stut Blagnac 08 Yllana Brosseau Stut Bordeaux 16 Clara Joyeux Stut Blagnac 45 Madoussou Fall Slot Bordeaux 34 Manaé Feleu Slot Grenoble 21 Teani Feleu Slot Grenoble 07 Hina Ikahehegi Slot Lille 03 Kiara Zago Slot Toulouse 03 Axelle Berthoumieu Losvoorspeler Blagnac 17 Léa Champon Losvoorspeler Grenoble 03 Charlotte Escudero Losvoorspeler Toulouse 21 Taïna Maka Losvoorspeler Grenoble 00 Ambre-Saadia Mwayembe Losvoorspeler Grenoble 14 Séraphine Okemba Losvoorspeler Lyon 04

Bekende spelers

Een voormalige Franse speler is vir haar uitstekende prestasies in Wêreldrugby se Heldesaal opgeneem:

Speler	Posisie	Inskrywing
Nathalie Amiel	Senter	2014

Sien ook

• Franse nasionale rugbyspan

Eksterne skakels

• (fr) Amptelike webwerf van die Franse Rugbyfederasie
• (en) Frankryk by Wêreldrugby