Frederick Hugh Barber

in Wikipedia, die vrye ensiklopedie
Jump to navigation Jump to search
Frederick Hugh Barber.

Frederick Hugh Barber (Graaff-Reinet, 8 Januarie 1847Eldoret, Kenia, 19 Mei 1919) was ’n Suid-Afrikaanse ontdekkingsreisiger, delwer en sakeman.

Barber was die oudste seun van Frederick William Barber en sy vrou, Mary Elizabeth Barber. Barber gaan skool aan die St. Andrew-kollege, Grahamstad, en trou in 1898 met Eira Evans. Hulle het een seun. In sy jeugjare (omstreeks 1870) verken Barber die Vaalrivier, pen kleims in verskillende diamantvelde af en ontgin hulle. Hy doen later onder sir Walter Currie diens in die Frontier Armed and Mounted Police.

Ná sy uitdienstreding in 1875 bring hy tien jaar in Matabeleland, Masjonaland, Suidwes-Afrika en Portugees-Wes-Afrika deur terwyl hy jag en verkenningstogte onderneem. Barber word 'n goeie vriend van die opperhoof Kgama III en ook van Lobengula. Hy onderneem 'n jagekspedisie per ossewa van Kimberley na die Victoria-waterval. Sy skilderye van die waterval is in die Rhodes-Livingstone-museum, wat ook sy reisverhale uitgee: Zambezia and Mataheleland in the seventies (Londen, 1960).

In 1895 hervat hy sy ontdekkingstogte en onderneem 'n tog deur die Kalahari. Saam met sy broer, H.M. Barber, vertrek hy in Februarie 1884 na die De Kaap-vallei, Oos-Transvaal. Gesamentlik verken hulle die gebied en hul ontdekking van winsgewende goudafsettings veroorsaak 'n groot toeloop van delwers na die Barberton-gebied, wat na die twee broers genoem is.

Barber keer terug na die oostelike distrikte en lê hom daar toe op volstruisboerdery. Toe hy hoor van die ontdekking van goud aan die Witwatersrand, vertrek hy na Transvaal en begin met 'n klein kapitaal die Ferreira-myn en later die Simmer en Jack-maatskappy. Hy word later ook direkteur van ander goudmynmaatskappye en het verbintenisse met die Delagoa Bay Investment Company en die Johannesburg Board of Executors, waar sy finansiële vernuf duidelik geblyk het.

Weer gaan boer hy in die oostelike distrikte en toon groot belangstelling in plaaslike aangeleenthede: die Grahamstadse munisipaliteit, die plaaslike kunsvereniging en die botaniese tuin. Barber was 'n bereisde man en 'n FRGS. Hy het aanleg as landskapskilder gehad en liefde vir sport en vir die bodem. Hy verlaat Suid-Afrika in 1915 om te gaan boer in Kenia, waar hy en sy broer albei oorlede is.

Bronne[wysig | wysig bron]