Gambiet

Die Cochranegambiet

'n Gambiet is 'n skaakopening waarin 'n speler 'n pion of stuk, of meer, opoffer in die hoop om kompensasie te kry deur 'n ontwikkelingsvoorsprong, 'n beter pionnestruktuur of 'n ander posisievoordeel. 'n Gambiet kan aanvaar of geweier word. As die teenstander die gambiet weier en 'n ruk later self 'n stuk opoffer, is daar sprake van 'n teengambiet. In baie gambiete bestaan die optimale teenspel uit die teruggee van die gewonne stukke op 'n gunstige oomblik. 'n Bekende gambiet waarby wit in die opening 'n stuk opoffer, is die Cochranegambiet in die Russiese opening: 1. e4 e5 2.Pf3 Pf6 3.Pe5 d6 4.Pf7 (sien diagram).

Gambiete word meestal deur wit gespeel. Bekende voorbeelde is die koningsgambiet (1.e4 e5 2.f4), koningingambiet (1. d4 d5 2. c4) en Evansgambiet (1.e4 e5 2.Nf3 Nc6 3.Bc4 Bc5 4.b4). 'n Gambiet deur swart kan ook gespeel word, soos in die Lettiese gambiet (1.e4 e5 2.Nf3 f5) of Englundgambiet (1.d4 e5); maar dit word soms 'n teengambiet genoem, byvoorbeeld die Albinteengambiet (1.d4 d5 2.c4 e5).

Etimologie

Die uitdrukking gambito is in 1561 die eerste keer opgeteken in die boek Libro de la invención liberal y arte del juego del Axedrez deur die Spaanse skaakmeester Ruy López de Segura. Die woord kom uit Italiaans en beteken om iemand met die voet te pootjie.

Die woord gambit is in 1855 die eerste keer in Engels gebruik om te beteken "openingskuif met die doel om 'n voorsprong te kry".

Skakels

• Hierdie artikel is in sy geheel of gedeeltelik uit die Engelse Wikipedia vertaal.

• Hierdie artikel is in sy geheel of gedeeltelik uit die Nederlandse Wikipedia vertaal.