Gebruiker:Suidpunt/Memo's vir Morné

in Wikipedia, die vrye ensiklopedie

Hallo @Morné. In die aanloop van jou onderhoud het ek 'n paar notas gemaak wat jy skelm op jou slimfoon (of tablet?) byderhand kan hou as die mikrofoon in jou gesig gedruk word. Hierdie blad kan na hartelus deur die res van die leserspubliek ook aangepas word.


Dit is nie die eerste keer dat die Afrikaanse Wikipedia ter sprake kom nie, of hoe?

  • 15 Januarie 2015 het Derrich Gardner met Deon Steyn op RSG 'n onderhoud gevoer. [Ek dink nie daarvan het iets gekom nie? Bron: Geselshoekie.]
  • 21 Mei 2015 het Steyn ook met Beeld gepraat. [Die onderhoud is gevoer, maar daar het niks gebeur nie? Bron: Geselshoekie.]
  • 1 November 2015 het Professor Laurette Pretorius gepraat op die RSG-program "Die tale wat ons praat" rondom die Afrikaanse Wikipedia ( RSG-potgooi ) .
( Geselshoekie-argief)
  • 14 Januarie 2016 het Martelize Brink en Johan Rademan met Deon Steyn 'n onderhoud gevoer ( RSG-potgooi) . Morné, ek het 'n vermoede dieselfde vrae gaan herhaal word. Luister veral hierdie Potgooi.
(Agtergrond hier)
  • En dan was daar mos die 15-jaar-jubileumartikel in 'n koerant, geskryf deur iemand wat jou mos 'n gunsie geskuld het?


Het die publieke en akademiese belangstelling julle gebaat?

Dit het nogal lank geneem, maar ek dink tog die akademici begin langsaam die potensiaal van die Afrikaanse Wikipedia raaksien.


Wie besoek die Afrikaanse Wikipedia die meeste?

Beslis skoolleerlinge wat Afrikaans verstaan. As mens na die bladtrekke kyk ( https://tools.wmflabs.org/topviews/?project=af.wikipedia.org ; https://tools.wmflabs.org/siteviews/?sites=af.wikipedia.org ) wat wissel van maand tot maand, maar ook die blaaie self wat besoek word, kan mens maklik twee en twee bymekaar sit. Voorbeelde soos sonnestelsel, intensiewe vorme, Mieliestronk, taalkundige voorbeelde, goud, seksueel oordraagbare infeksie, MIV/vigs, fotosintese. Mens sien duidelik die belangstelling afplat tydens skoolvakansies en opvlam tydens skooltaaktye.

Die grootste gros besoekers kom uit Suid-Afrika ( https://stats.wikimedia.org/wikimedia/squids/SquidReportPageViewsPerLanguageBreakdown.htm ). Verder is daar die nuuskierige buitelanders (of, Afrikaanssprekendes daar): veral uit Frankryk, Duitsland, en baie, baie skraal: Nederland. In Suid-Afrika is dit ook maar 'n handjievol mense wat die Nederlandse Wikipedia weer besoek. Die Duitse, Franse en Russiese Wikipedia is net 'n kortkop na die Afrikaanse Wikipedia redelik gewild.

Waarna die besoekers soek wissel: dikwels soek hulle iets heeltemal oorspronklik wat totaal verskil van die Engelse Wikipedia, ander kere weer net 'n vertaling van die Engelse, Franse of Duitse blad om vinniger hul huiswerk af te handel. Dit gaan alles ook oor tyd.

Ek dink die meeste besoekers google eers 'n soekwoord voordat hulle op die eerste die beste resultaat klik, dis nou die artikel van die Afrikaanse Wikipedia.


Hoe lyk die meeste mense wat aan die Afrikaanse Wikipedia timmer? En wat skryf hulle?

Soos by 'n winkelsentrum kom en gaan mense gereeld. Daar is betreklik min mense wat baie aktief skryf (meer as 100 wysigings), so veertien tot sestien per maand, maar hul belangstellings gee die deurslag. Jy kry byvoorbeeld 'n tegnikus wat artikels skryf oor visse, bome en vliegtuie. 'n Ander rekenaartegnikus wat die opruimwerk doen. 'n Apteker wat belangstel in sport, honde en afgeleë dorpies. Iemand wat graag artikels uit vreemde tale vertaal en swymel oor Latyn. 'n Programmeerder wat skryf oor eietydse musiek en brandaktuele sake. En dan is daar twee redakteurs van die Huisgenoot wat belangstel in die kerkgeskiedenis, sterrekunde, koningshuise, Rusland, katte en dies meer. Ook het ons gebruikers wat met hart en siel hul besig hou met die wysbegeerte.

Ons het ook 'n chemikus, 'n Hollander van geboorte, wat uit Amerika bydra, 'n veeltalige Brit wat veral fokus op Britse plekkies en die esoterie, en 'n Noord-Duitser wat veral skryf oor alles en nog wat van Afrika. En so nou en dan 'n Hollander-Brit wat kom skryf oor mates en treine.

Die span van Maroela Media het ook sedert 2016 begin inklim en letterkunde-artikels begin plaas. Hulle is ook gedrewe met onderwerpe wat op universiteite en skole van belang is. In die verlede het 'n klomp studente van die Noordwes Universiteit as opdrag 'n string artikels oor die taalkunde geplaas.

Soos dit nou maar regoor die wêreld ook die geval is, bly die grootste gros Wikipediaskrywers mans. Ook in Suid-Afrika ( https://upload.wikimedia.org/wikipedia/commons/c/cc/Infographic-WMZA_survey_results_2015.png )


Stamp julle gereeld koppe?

Die testosteroonvlakke loop soms hoog, maar nee, ons verskil net. Soos beskaafde mense.


Wie sou julle graag nog wil betrek?

Ons het nooit genoeg bydraers nie. Hoe gering ook al - daar is altyd verouderde feite wat op datum gebring moet word. Nog mense wat artikels uit Engels, maar veral vreemde tale moet vertaal.

Ons grootste klantebasis is skoolgaande leerlinge, dus sou die insae van onderwysers goed te pas kom.

Tot op hede word groot gewag gemaak van predikante en godgeleerdes om meer oor die gevorderde teologie te kom skryf. Miskien het die sendingveld nou na die kuberruim verskuif? Mediese artikels het 'n geweldige groot openbare belangstelling - maar geneeshere dra om verskeie redes selde by. Tegnici het weer probleme om Afrikaanse begrippe te gebruik, maar die Virtuele Instituut vir Afrikaans en soortgelyke rolspelers probeer ons bystaan.

Ek dink wel die Afrikaanstalige akademici kan heelwat meer doen om hul eie kennisveld, maar ook gedeeltes van hul vaktydskrifartikels aan die Afrikaanssprekende leserspubliek bekend te stel. So ook Afrikaanse fiksieskrywers wat 'n oorsig van hul werk gee, sonder om dit te veel in 'n advertensieveldtog te laat ontaard.

Verder sou ons graag meer kennis van spesialiste wil inwin oor allerlei vakgebiede.


Watter voordeel dink jy het die Afrikaanse Wikipedia bo ander media?

Vroeg verlede jaar nog, volgens die Kaapse Bibliotekaris, sê Nicol Stassen, uitvoerende hoof van Protea Boekhuis, wanneer daar na die mark vir gedrukte algemene boeke in Suid-Afrika gekyk word — universiteits- en skoolhandboeke uitgesluit — moet jy onderskei tussen ingevoerde en plaaslik gepubliseerde boeke. ‘Die internasionale Engelse aanbod verkoop verreweg die meeste, maar wat plaaslik gepubliseerde boeke betref, vaar Afrikaanse boeke baie beter as Engelses.’ Maar dan sê hy: ‘As jy ’n uitgewer in Suid-Afrika is, moet jy vaklektuur publiseer — in Afrikaans. Die verkope van plaaslik gepubliseerde Afrikaanse vaklektuur oortref dié van Engels verreweg.’

Nou ja, waar daar 'n vraag is, is daar 'n aanbod. Maar ons lewer dit net gratis.

Die buiteland befonds hierdie platform, dit kos ons nie 'n bloue duit nie. Ons hoef net die skryf- en vertaalwerk te doen. Ons arbeid is gratis. Die leesstof is deur selfoon- of biblioteekinternetfasiliteite toeganklik en beslis nie so duur soos die gedrukte media nie. Ons kan ook makliker eksperimenteer met nuwe onderwerpe. Ons het buitendien geen geldelike wins om te maak nie. Ons hoef ook nie saam te stem met instansies oor sake nie, solank die artikel net nie eensydig raak nie. En verder is die gemiddelde Afrikaanse leser effens lui: waarom sou ek soveel moeite doen om byvoorbeeld 'n Engelse artikel te vertaal vir 'n skoolprojek as ek reeds die Afrikaans tot my beskikking het?

Verder is ons Wikipedia ook klein genoeg dat jy hom by Kiwix.org kan gaan aflaai en op jou geheuestokkie pas. Dis so 77 MB vir die inligting alleen. Dis nou wanneer mens na die gopse gaan en/of internet skielik nêrens beskikbaar is nie.

Watter ander probleme kom julle gereeld teen?

Alles draai om gehalte.

1. Mense dink dikwels 'n Wikipedia-artikel is 'n klasopstel of klasdebat wat 'n sekere standpunt moet verdedig. Dit is nie. Dit is 'n versameling standpunte of feite wat reeds gemaak is, sonder 'n gevolgtrekking. Hierdie opsommings van gedagtes gaan gepaard met bronne.

2. Die Afrikaanse Wikipedia is ook nie die plek vir advertensieartikels nie.

3. Verder verander die internet baie - jy klik nog op 'n skakel wat vir 'n bron gebruik is, maar dit is nie meer nie. Daardie probleem sukkel ons sedert 2015 mee. Daarvoor gebruik ons gelukkig "wayback" van Archive.org of archive.is.

4. Baie swak letterlike vertalings, spelfoute, sinsboufoute, grammatikafoute, en die vervloekte masjienvertalings kan die Afrikaanse Wikipedia se reputasie kwaai skade berokken.

5. Maar ek dink ons grootste bedreiging is 'n gebrek aan beskikbare Afrikaanse bronne deur Afrikaanssprekendes geskryf. Vaktydskrifartikels word dikwels weggebêre agter 'n betaalmuur. Oor baie onderwerpe, soos byvoorbeeld oor die Middeleeue, staan ons met leë hande. Ons probeer waar moontlik voorkeur gee aan Afrikaanse bronne.

6. 'n Mens het ook net X-hoeveelheid tyd. Google Trends help ons by die keuse, om te kyk hoe relevant 'n artikel vir die Suid-Afrikaanse en buitelandse leser is, maar dikwels word artikels ook deur die tydsgees beïnvloed, en verouder vinnig. Dit bly egter 'n hoender-en-eier-storie: selfs al skryf jy oor onderwerpe waaroor niemand NOU belangstel nie, weet mens nooit wie eendag daarna sal kom soek nie.

7. Die Afrikaanse Wikipedia het glo net minder as 10% van die Afrikaanslesende mark binnegedring. ( Opsomming deur Duitser van Swahili-Wikipedia)


Dink jy vir 'n nuweling is Wikipedia nogal intimiderend, om baas te raak?

Deesdae met YouTube-videos is dit nie meer so moeilik nie.

Ek dink die nuwes voel gewoonlik baie vinnig uitgesluit en verlaat die projek. Ander plaas net eenmalig hul werk wat hulle wou geplaas het en waai. Op sy beurt voel die ouer garde, party kom al sedert 2004 aan, die nuwelinge wil net nie deelword van die gemeenskap nie. Daar ontstaan dus maklik 'n wrywing tussen "jong moontlike vandalis" vs. "die ou establishment". Probeer dus by die geselshoekie en met ander gebruikers wat jy sien bedrywig is gesels. Dit is 'n baie klein gemeenskappie, en dit help nogal om die ys te breek.

Jongman, dankie vir hierdie, wel 'n paar semantiese verskille maar ek gaan my nie daaroor bekommer nie. Groete! Oesjaar (kontak) 18:57, 7 Februarie 2018 (UTC)
Ontsluit van "https://af.wikipedia.org/w/index.php?title=Gebruiker:Suidpunt/Memo%27s_vir_Morné&oldid=1644817"