Gebruiker:Suidpunt/Waarom Afrikaans

Waarom Afrikaans leer/studeer?

Hierdie blad het ek geskryf grootliks omrede die Google Soektogte nie hardgebakte standpunte opgelewer het nie. Dit is een van die eksistensiële vrae rondom taal. Voeg nog by as jy wil:

• Afrikaans is een van die elf amptelike tale van Suid-Afrika en word ook gepraat in Namibië en regoor die wêreld. Afrikaans is dus 'n internasionale taal (op kleinskaal!).

• Afrikaans en Nederlands is onderlangs verstaanbaar. Vir Engelssprekendes is Afrikaans eenvoudig. Party beskou Afrikaans as die eerste fase na Nederlands. Reeds in 1989 het die Nederlandse vindt oorgeskakel na vind.[1] Afrikaans is, deur sy vereenvoudiging, 'n futuristiese vorm van Nederlands. Terselfdertyd behou Afrikaans sekere woordgebruike wat nie meer in Nederlands gebesig word nie, daarom is die taal ook 'n verwysing na Nederlands se vroeëre beskawing en kultuur. Omrede Afrikaans 'n vloeiende taal is, is strelende fluweelstemliedjies musiek vir die ore.

• Afrikaans is onontbeerlik vir studente wat die Afrikaanse letterkunde en kultuur studeer (vanaf Jakkals-en-Wolfstories tot die Dertigers tot Postkoloniale desillusie). Ook diegene wie geboei word deur mensekunde, landbou, ekonomie, staatkunde en taalkunde (wat ook die oorsprong van dorpsname, volksemitologie en die invloed op Tsotsitaal en Flaaitaal insluit). Omrede Afrikaans 'n eenvoudige taal is, help sy eie vertalings baie keer ander Afrikatale wat sukkel om tegniese konsepte te vertaal. Afrikaans het slegs binne 3 eeue ontwikkel, wat dit 'n redelike jong taal maak. Die kulturele uitbou, suiwering en hoogtepunt van Afrikaans in die 1970's en 1980's sal in taalgeskiedenis en -politiek 'n boeiende onderwerp wees.

• Afrikaans gee ander tale hoop om volle onafhanklike erkenning, steun of herlewing te kry. Dit is 'n riem onder die hart vir streektale soos Vlaams, Seeus, Nedersaksies, Fries en Beiers.

• Natuurlik sal aanlynnuusargiewe van Beeld, Volksblad en Die Burger (dateer terug tot 1985), streekskoerante en kerkbodes in die Kaapland en Transvaal ontoeganklik vir diegene wees wat die Afrikaanse Taal en Kultuur nie begryp nie.

• As daar breedvoerig oor geskiedkundige gebeurtenisse soos die Groot Trek, volkskarakters (soos die towenaar Spoorbek/Skoorbek), die pagstelsels, massa-Verstedeliking, Armblankevraagstuk, Kerkgeskiedenis en Apartheid, die lewe agter die Koringgordyn en post-Apartheid (met ander woorde, die sentrale middelpunt wat politiek in die Afrikaanse samelewing speel) ondersoek gedoen moet word, is Afrikaans 'n belangrike faset om die denkpatrone en ervarings EERSTEHANDS en SONDER FOUTIEWE INTERPRETASIES vas te vang. Afrikaans kan as die binding tussen die gekunstelde Europa en magiese Afrika beskou word. Hierdie aanpassing van Europa en Asië by Afrika is 'n onuitputbare bron van vrae.

Deur die Afrikaanse taal, sal die navorsers sekere raakpunte eien:

- volke wat logiese pragmatiek bo teorie verkies

- wat nooit genoeg van hul eie taal in wetenskapboeke kan lees nie,

- volke wat nie vitterig rondom detail, presiesheid, gekunsteldheid en strukturalisme mopper nie,

- maar eerder uit die natuur, ironie en woordspeling hul inspirasie put,

- 'n taal wat vry is en aan geen reëls gebonde is nie,

- die sosiale en kulturele naelstring en denkwyse wat voortdurend met Europa en Amerika tred probeer hou en beredeneer word

- kulturele wendings vanaf subjektiewe tradisionalisme tot objektiewe individualisme, skeptisme, egalitaristiese strewe en globalisme; met 'n goeie skeut humor regoor die eeue heen.

- die verdraagsaamheid en openlikheid teenoor kunste wat teen jou eie verwysingsraamwerk is

- suiwering en behoud van Afrikaans as 'n Wes-Germaanse taal, met genoeg vryheid vir alledaagse slêng en brabbelmieks.

- die verantwoordelikheidsbesef, maar tog die soeke na skuiwergate in stelsels

- die lewenswyse van die Afrikaanssprekendes is baie soos die Mediterreense (Suid-Europese) volke s'n; goeie vriende word ook makliker gemaak deur taal.

• Afrikaans word vereenselwig met 'n sterk koopkrag. Dit strek diegene wat Afrikaans leer tot voordeel.

• Vir stamboomnavorsing is Afrikaans as taal uitsonderlik belangrik. As jy familie in sowel Nederland as Namibië/Suid-Afrika gehad het, is die twee versoenende tale 'n absolute bonus in die soektogte deur argiewe in Europa, sowel as in Afrika. Baie van die Boere het na Suid-Amerika getrek ná die Anglo-Boereoorlog - van hul nasate stel belang om hul voorouers se taal te leer, om die geskiedenis beter te begryp.