Gedaanteverandering van Jesus

in Wikipedia, die vrye ensiklopedie
Jump to navigation Jump to search
Die Gedaanteverandering van Jesus, skildery deur Raphael, ca. 1520
Ikoon van Jesus se Gedaanteverandering deur Theophanes die Griek, 15de eeu

Gedaanteverandering van Jesus of Transfigurasie (Latyn: transfiguratio Domini; Grieks: μεταμόρφωσις, metamorphosis) verwys na 'n openbaringsgebeurtenis wat volgens die kanonieke evangelies drie van die twaalf Apostels beleef het, toe Jesus in 'n spesiale, getransformeerde vorm saam met die profete Moses en Elia op 'n berg verskyn het. Drie van die vier kanonieke evangelies beskryf die gebeurtenis: Matteus (17,2),[1] Markus (9,2)[2] en Lukas (9,29).[3]

Volgens dié Bybelse verhaal in die Nuwe Testament het Jesus saam met drie Apostles – Simon Petrus, Jakobus die Grote en Johannes – na 'n berg gegaan (glo Berg Tabor in Galilea[4]) om te bid. Op die berg het Jesus met helder ligstrale begin skyn. Vervolgens het die profete Moses en Elia – die wetgewing en Profesie van die ou bond verteenwoordigend – langs hom verskyn en hulle het begin praat.[5][6][7] Jesus is toe deur 'n stem in die hemel – glo dié van God – "Seun" genoem,[8][9][10] soos tydens die doop van Jesus. Die drie Apostels val geskrik op die grond. Die apostel Petrus stel voor om drie hutte te bou,[11][12][13] wat na die Joodse Soekot verwys.

In die drie evangelies word twee verskeie tydperke vir die duur van dié gebeurtenis aangegee. Matteus (17,1)[14] en Markus (9,2)[2] noem ses dae, terwyl Lukas (9,28)[15] 'n tydperk van omtrent agt dae noem. In die Joodse kalender is twee groot herdenkings net vyf dae uitmekaar: Jom Kippoer, die groot Versoeningsdag, en Soekot, die Loofhuttefees wat sewe dae gevier word. Op Jom Kippoer uiter die Hoëpriester van die Jode tydens 'n feestelike seremonie die naam van GodJHWH – in die Allerheiligste van die tempel. Die datering van die Gedaanteverandering dui op die laaste dag van Soekot.

Baie Christelike tradisies, insluitende die Oosters-Ortodokse, Rooms-Katolieke en Anglikaanse kerke, herdenk die Gedaanteverandering van Jesus. In die Westerse kerke word die Gedaanteverandering op 6 Augustus volgens die Gregoriaanse kalender gevier,[16] terwyl die Oosterse kerke dié gebeurtenis op 19 Augustus volgens die Juliaanse kalender herdenk. Die fees in in 1456 deur pous Callixtus III in die liturgiese kalender van die Rooms-Katolieke Kerk opgeneem, nadat op 6 Augustus dié jaar die Christelike oorwinning oor die Ottomaanse Ryk tydens die Beleg van Belgrado in Rome bekend geword het.[17]

Verwysings[wysig | wysig bron]

  1. (af) "Matteus 17,2". Bybel: Matteus. Bybelgenootskap van Suid-Afrika. Besoek op 21 April 2019. Daar het sy voorkoms voor hulle oë verander: sy gesig het begin straal soos die son, en sy klere het wit geword soos die lig.
  2. 2,0 2,1 (af) "Markus 9,2". Bybel: Markus. Bybelgenootskap van Suid-Afrika. Besoek op 21 April 2019. Ses dae later het Jesus vir Petrus en Jakobus en Johannes saamgeneem en hulle op 'n hoë berg gebring waar hulle heeltemal alleen was. Toe het sy voorkoms voor hulle oë verander,
  3. (af) "Lukas 9,29". Bybel: Lukas. Bybelgenootskap van Suid-Afrika. Besoek op 21 April 2019. Terwyl Hy bid, het die voorkoms van sy gesig anders geword en sy klere skitterend wit.
  4. (en) Festival icons for the Christian year by John Baggley 2000 ISBN 0-264-67487-1 bl. 58–60
  5. (af) "Matteus 17,3". Bybel: Matteus. Bybelgenootskap van Suid-Afrika. Besoek op 21 April 2019. Skielik het Moses en Elia aan hulle verskyn en met Jesus gepraat.
  6. (af) "Markus 9,4". Bybel: Markus. Bybelgenootskap van Suid-Afrika. Besoek op 21 April 2019. Elia en Moses het toe aan hulle verskyn en met Jesus gestaan en praat.
  7. (af) "Lukas 9,30". Bybel: Lukas. Bybelgenootskap van Suid-Afrika. Besoek op 21 April 2019. Skielik was daar twee manne wat met Hom praat. Dit was Moses en Elia.
  8. (af) "Matteus 17,5". Bybel: Matteus. Bybelgenootskap van Suid-Afrika. Besoek op 21 April 2019. Terwyl hy nog praat, het 'n helderligte wolk skielik sy skaduwee oor hulle gegooi, en 'n stem uit die wolk het gesê: “Dit is my geliefde Seun oor wie Ek My verheug. Luister na Hom.”
  9. (af) "Markus 9,7". Bybel: Markus. Bybelgenootskap van Suid-Afrika. Besoek op 21 April 2019. Daar het toe 'n wolk gekom wat sy skaduwee oor hulle laat val het; en uit die wolk het daar 'n stem gekom: “Dit is my geliefde Seun. Luister na Hom.”
  10. (af) "Lukas 9,35". Bybel: Lukas. Bybelgenootskap van Suid-Afrika. Besoek op 21 April 2019. Daar kom toe 'n stem uit die wolk wat sê: “Dit is my Seun wat Ek uitverkies het. Luister na Hom.”
  11. (af) "Matteus 17,4". Bybel: Matteus. Bybelgenootskap van Suid-Afrika. Besoek op 21 April 2019. Toe sê Petrus vir Jesus: “Here, dit is goed dat ons hier is. As U wil, sal ek hier drie hutte bou: een vir U, een vir Moses en een vir Elia.”
  12. (af) "Markus 9,5". Bybel: Markus. Bybelgenootskap van Suid-Afrika. Besoek op 21 April 2019. Toe sê Petrus vir Jesus: “Rabbi, dit is goed dat ons hier is. Laat ons drie hutte bou: een vir U, een vir Moses en een vir Elia.”
  13. (af) "Lukas 9,33". Bybel: Lukas. Bybelgenootskap van Suid-Afrika. Besoek op 21 April 2019. Toe die manne aanstaltes maak om van Hom af weg te gaan, sê Petrus vir Jesus: “Here, dit is goed dat ons hier is. Laat ons drie hutte bou: een vir U, een vir Moses en een vir Elia.” Hy het nie geweet wat hy sê nie.
  14. (af) "Matteus 17,1". Bybel: Matteus. Bybelgenootskap van Suid-Afrika. Besoek op 21 April 2019. Ses dae later het Jesus vir Petrus en Jakobus en sy broer Johannes saamgeneem en hulle op 'n hoë berg gebring waar hulle alleen was.
  15. (af) "Lukas 9,28". Bybel: Lukas. Bybelgenootskap van Suid-Afrika. Besoek op 21 April 2019. Omtrent ag dae nadat Jesus hierdie woorde gesê het, het Hy vir Petrus en Johannes en Jakobus saamgeneem die berg op om te gaan bid.
  16. (en) Christian liturgy by Ignatius Puthiadam 2003 ISBN 81-7109-585-2 bl. 169
  17. (de) Die Verklärung des Herrn. In: Ökumenisches Heiligenlexikon (heiligenlexikon.de). Besoek op 21 April 2019.

Eksterne skakels[wysig | wysig bron]