Gerrit Fourie
Gerrit Fourie (1947–1990) was ’n Afrikaanse digter.
Lewe en werk[wysig | wysig bron]
Gerrit Jacobus van Niekerk Fourie was op 2 Desember 1947 gebore, as naamgenoot en een van vier kinders van Gerrit Jacobus van Niekerk Fourie, per geleentheid burgemeester van Grahamstad. Sy ma is Maureen Anna Farnham. Hy gaan skool by Graeme College op Grahamstad en studeer daarna aan die Rhodes Universiteit waar hy sy B.A.-graad in 1971 en sy B.A. Honneurs-graad in 1972 behaal. Hierna word hy onderwyser by St. Andrews op Grahamstad, terwyl hy hom deeltyds inskryf vir ’n M.A.-graad by Rhodes. Op 1 Maart 1977 aanvaar hy ’n betrekking by die Nasionale Verkeersveiligheidsraad en op 1 September 1979 word hy aangestel as hoof van hierdie liggaam se afdeling Opvoeding. Hy is lid van die Skakelinstituut van Suid-Afrika, die Afrikaanse Skrywersgilde en dien in die Nasionale Komitee van die Suid-Afrikaanse Instituut van Vertalers en Tolke. Hy is op 6 Februarie 1990 in Pretoria aan ’n hartaanval oorlede.
Skryfwerk[wysig | wysig bron]
Verskeie gedigte van hom word in tydskrifte soos Contrast, Tydskrif vir Letterkunde, Donga, Ensovoort, Rhodian, Aspersie en Forum gepubliseer. Hy debuteer met die bundel “Bokas en ondertoon”.[1] Die titel, wat afgelei is van musiekterme, wil reeds te kenne gee dat wat op die oppervlak gesê word, gelees moet word met aandag aan wat onderliggend daardeur geïmpliseer word.[2] Die bundel word deur André P. Brink[[3]i] geloof as “’n debuut van betekenis” wat beïndruk met sy taalvaardigheid, waarmee deur fyn woordspeling veral sosiaal-politiese kommentaar gelewer word. Daar is ’n afdeling oor die Oktober-oorlog tussen Egipte en Israel in 1973, ’n afdeling kwatryne, ’n afdeling met satiriese kommentaar oor die sosio-politiese situasie in Suid-Afrika en ’n afdeling met eksperimentele abstrakte verse. Die bundel bevat ook ’n aantal knap liefdesgedigte en gedigte oor die religieuse. Sy gedig “Rivonia”, in Engels vertaal, word opgeneem in ’n digbundel ter ere van Nelson Mandela, “Halala Madiba: Nelson Mandela in Poetry”. Van sy gedigte word opgeneem in Gerrit Komrij se bloemlesing “Die Afrikaanse poësie in ’n duisend en enkele gedigte” asook in ander versamelbundels soos “Groen” onder redaksie van Johann Lodewyk Marais
Publikasies.[wysig | wysig bron]
| Jaar | Publikasies |
|---|---|
| 1976 | Bokas en ondertoon |
Bronnelys[wysig | wysig bron]
Boeke[wysig | wysig bron]
- Cloete, T.T. (red.) “Die Afrikaanse literatuur sedert sestig” Nasou Beperk Eerste uitgawe 1980
- Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005
Tydskrifte en koerante[wysig | wysig bron]
- Anoniem “Bevorder by N.V.V.R.” “Die Volksblad” 5 November 1979
Internet[wysig | wysig bron]
Ongepubliseerde dokumente[wysig | wysig bron]
- Fourie, Gerrit Lewenskets Nasionale Afrikaanse Letterkundige Museum en Navorsingsentrum (NALN) Bloemfontein