Gimkana

'n Gimkana is oorspronklik 'n byeenkoms vir sport en spel met die klem op perdesport.

In Suid-Afrika was ‘n gimkana aanvanklik ‘n vertoning van die spring van perde en die afrigting van perde waardeur die ruiters en afrigters hul vaardigheid kon wys. Die klem lê dus in die eerste plek nie op mededinging nie.

Gimkana het sy oorsprong in 1861 in Indië waar aanvanklik poniewedrenne gehou is as vermaak, ontspanning en tydverdryf vir Britse soldate en koloniale amptenare. Hierdie byeenkomste is afgewissel met items soos toutrek. Sulke gimkanas het in ander lande nie tot items met perde beperk gebly nie. Later is byvoorbeeld motor- en motorfietsrenne gehou waar die ryers hul behendigheid met hul voertuie vertoon het.