Google-soekenjin

in Wikipedia, die vrye ensiklopedie
Google-soekenjin
Tipe webblad Soekenjin
Taal(e) Veeltalig
Registrasie Geen
Eienaar Google, Inc.
Opgerig 1996 (as BackRub)
15 September 1997 (as Google)
Huidige status Aktief
URL http://www.google.co.za/

Die Google-soekenjin is ’n soekenjin wat deur Google besit en bedryf word. Dit kan gebruik word om trefwoorde (teks) op webblaaie te soek. Dit is op 15 September 1997 bekendgestel en het sedertdien die mees gebruikte soekenjin op die wêreldwye web geword.[1] Die woord Google het mettertyd sinoniem met internetsoektogte geword en is sedert 2006 selfs as ’n werkwoord in die Oxford-woordeboek opgeneem.[2] Dit kan ook in Afrikaans as ’n werkwoord gebruik word en wel met ’n kleinletter-g.

Algoritme

Google se soekenjin gebruik ’n gepatenteerde algoritme wat as "PageRank" bekend staan. Die algoritme word gebruik om resultate vir die soekopdrag te rangskik. Net soos die waarde van ’n wetenskaplike artikel bepaal word deur die aantal sitasies (aanhalings) daarvan, bepaal PageRank die belangrikheid van ’n artikel aan die hand van die aantal skakels daarheen. Elke verwysing na ’n bladsy is inderwaarheid ’n stem ten gunste van die betrokke artikel. Google ontleed ook die geloofwaardigheid van die bladsye wat die stem uitbring. PageRank gebruik ’n skaal van 0 tot 10. ’n Hoë PageRank beteken egter nie dat ’n bladsy vir alle soekopdragte hoog sal wees nie.

Indeksering

Google gebruik ’n webkruiper genaamd Googlebot om die web te deurkruis en die teks van webbladsye te lees en in ’n indeks te katalogiseer. Die robot kan webskakels volg en spring so van die een webtuiste na die ander om sy bladsye op te slurp en by die indeks te voeg. As ’n soektog uitgevoer word, word die indeks geraadpleeg en resultate word in minder as ’n sekonde aan die gebruiker vertoon.

Opsoek van inligting

Die soekproses word begin deur na Google se webwerf te navigeer en soekwoorde in die veld wat daarvoor aangedui is, in te sleutel. Spesiale sintaks kan gebruik word om beter resultate te verkry:[2]

  • Soek vir frases deur die woorde in aanhalingstekens te plaas, soos "brooklax wat ek kou"
  • ’n Minus-teken kan gebruik word om woorde uit te sluit. As mens byvoorbeeld vir inligting oor springbokke soek, maar nie oor rugby of die dorp handel nie, kan die volgende opdrag gebruik word: Springbokke -rugby -town
  • Soektogte kan tot ’n bepaalde webwerf beperk word. As voorbeeld, soek inligting oor spingbokke op Wikipedia met Springbokke site:af.wikipedia.org
  • Soek net vir sekere tipes dokumente, soos UNISA aansoekvorm type:pdf

Google se koppelvlak is volledig in Afrikaans beskikbaar. Stel jou webblaaier se voorkeurtaal na "Afrikaans" om te verseker dat Google weet watter koppelvlak om op te dis. Soekresultate kan ook tot Afrikaanse artikels beperk word (kliek op "Soeknutsgoed" en verander "Enige taal" na "Afrikaans").

Mense wat nie deur al die resultate wil blaai nie, kan die kansvatterskortpad-funksie gebruik. Klik op die "laat rol katrol"-knop om direk na die eerste en beste bladsy oor die onderwerp te spring.

Verwysings

  1. "Alexa Search Engine ranking". Geargiveer vanaf die oorspronklike op 5 Maart 2016. Besoek op 15 November 2009.
  2. 2,0 2,1 Artikel oor Google deur Nico Gous, Beeld, 12 Desember 2015

Eksterne skakels