Gorra (watergat)

‘n Gorra (soms gora, gorê) is ‘n klein vlak put in die woestynagtige dele van Suid-Afrika waarin reën- of syferwater opgevang word.

Dit word aangetref in droë rivierbeddings en in natuurlike holtes in kalkklip. Dikwels is ‘n gorra langs ‘n effense helling van ‘n vlak bult geleë in so ‘n posisie dat water wat langs die skuinste afloop by die bek van die gorra invloei. Hoe kleiner die bek hoe beter om verdamping van die skaars watervoorraad te verhoed. Die klip wat as deksel of prop dien, pas so in die bek van die gorra dat water maklik kan invloei, maar slange en goggas sal teenhou.

Sedert op plase windpompe op boorgate aangebring is, het gorra’s wat al sedert die dae van die Khoikhoi en die San in gebruik is, in onbruik verval.

Lees ook

• Theuns Kotzé: Slukkies uit die brakgorra

Bibliografie

• Jooste, Johannes L.: Interessante oudheidsoorblyfsels. Lantern. Tydskrif vir Kennis en Kultuur. Jaargang 16, nr. 1, September 1966