Goue Reël

in Wikipedia, die vrye ensiklopedie
Die barmhartige Samaritaan, soos deur Eugène Delacroix geskilder.

Die Goue Reël is 'n etiese kode en leefreël wat sê:

  • (Positiewe vorm): Behandel ander soos jy wil hê hulle jou moet behandel.
  • (Negatiewe vorm, ook die silwer reël genoem): Moenie aan ander doen wat jy nie wil hê hulle aan jou moet doen nie.

Die Goue Reël word in een of ander vorm in feitlik elke godsdiens en kultuur aangetref. Dit is die uitgangspunt van verskeie humanistiese strominge en lewensfilosofieë. Dit is ook die grondslag van menseregte.

In Griekeland is die reël deur filosowe soos Pittakos van Mytilene en Thales van Milete gevestig, in China deur Confucius (551–479 v.Chr.) en in die jodedom in Levitikus 19:18.

Die Christendom het 'n vergelykbare reël, naamlik "Alles wat julle wil hê dat die mense aan julle moet doen, moet julle ook aan hulle doen. Dit is tog waarop dit neerkom in die wet en die profete.". Die reël fokus op wat gedoen moet word eerder as wat (uitgelaat) nie gedoen moet word nie. Dit word in Matteus 7:12 en Lukas 6:31 aangetref.