Greefswald-plaas

Greefswald was 'n plaas op die suidelike oewer van die Limpopo, en is tans deel van die Mapungubwe Nasionale Park.

Die plaas Greefswald lê by nagenoeg 29° 12′ suid, 22° 24′ oos en 88 km wes van Musina in die rigting van Alldays.

Vanaf die 1930’s is dit staatseiendom en as militêre oefenterrein met ‘n militêre gevangenis gebruik. Teen die vroeë 1940’s is 27 aangrensende plase hier aaneengeskakel vir die doel. Dit was die eerste militêre gebied in Suid-Afrika wat tot ‘n natuurreservaat omskep is. Vroeg in die 1990’s is dit aan die destydse Transvaalse provinsiale administrasie oorhandig, in 1999 het dit onder beheer gekom van Sanparke en in Julie 2002 is dit as deel van Mapungubwe tot wêrelderfenisgebied verklaar.

Greefswald is ‘n plek van groot historiese belang vir Suid-Afrika weens die argeologiese vondste wat daar gemaak is wat verband hou met die Mapungubwe koninkryk. Mapungubweheuwel op die plaas is in die 1980’s tot kultuurmonument verklaar.