Green Porno

Green Porno
Regisseur	Jody Shapiro Isabella Rossellini
Produksieleier	Rick Gilbert Jody Shapiro Isabella Rossellini
Draaiboek	Isabella Rossellini
Verteller	Isabella Rossellini
Met	Isabella Rossellini
Musiek deur	Andy Byers Rick Gilbert
Redigeerder	Stacey Foster Cynthia Madansky Angelika Brudniak
Uitgereik	2008
Taal	Engels
Amptelike webtuiste
IMDb-profiel

Green Porno is 'n reeks kortfilms oor die seksuele gedrag van diere. Die reeks is deur Isabella Rossellini bedink en geskryf en sy behartig ook die regie (saam met Jody Shapiro) en vertolk die rol van die verskillende diere. Die reeks is bedoel om humoristies en vermaaklik dog feitelik akkuraat en opvoedkundig te wees. Die episodes is kort: tussen 1 en 2 minute elk.

Isabella Rossellini vertolk die (enigste) rol in Green Porno.

Sundance was op soek na kortrolprente vir die "derde skerm": 'n metafoor vir skerms anders as die silwer- en televisieskerm. Volgens Rossellini wou sy nog altyd kortrolprente maak en was sy sedert kindwees in dierelewe geïnteresseer. Sundance het bygevoeg dat die rolprente mense se aandag op 'n manier moet trek en Rosselini het besluit op 'n seksuele tema.

In die eerste reeks (2008) het Rossellini op die paarrituele van verskeie goggas gekonsentreer: die spinnekop, vlieg, erdwurm, slak, by, hotnotsgot, naaldekoker en vuurvlieg. Die tweede reeks (2009) het weer lig op die paargewoontes van lewe in die see gewerp: die klipmossel, eendmossel, walvis, seester en seeduiwel. Een episode het ook op die uniekheid van elke spesie se voortplantingsorgane gefokus. Die komende derde reeks sal plaasdiere behandel.

Behalwe vir die by-episode is Rossellini die enigste toneelspeler in al die episodes.

Die reeks is op die Sundance-kanaal se webwerf beskikbaargestel, maar sommige episodes is ook tydens die Sundance-rolprentfees en Berlynse Rolprentfees gewys.

Bronnelys

• Green Porno, webwerf by die Sundance-kanaal se werf. Die verskillende episodes kan ook hier besigtig word.