Groot Migrasie (Afro-Amerikaners)

in Wikipedia, die vrye ensiklopedie
'n Familie kom op 30 Augustus 1920 in Chicago aan tydens die Groot Migrasie.[1]

Die Groot Migrasie, ook bekend as die Groot Noordwaartse Migrasie of die Swart Migrasie, was die beweging van ses miljoen Afro-Amerikaners tussen 1910 en 1970 uit die plattelandse Suidelike state van Amerika na die stedelike Noordooste, Midweste en Weste.[2] Dit was hoofsaaklik die gevolg van die swak ekonomiese toestande vir Afro-Amerikaners, sowel as die heersende rasseskeiding en -diskriminasie in die Suidelike state, waar Jim Crow-wette gegeld het.[3][4] Veral voortdurende lynchteregstellings het 'n deel van die migrasie tot gevolg gehad, omdat Afro-Amerikaners sosiale verligting gesoek het.

Die historiese verandering wat deur die migrasie teweeggebring is, is vergroot omdat die migrante hoofsaaklik na die grootste stede van destyds (New York, Chicago, Detroit, Los Angeles, Philadelphia, Cleveland en Washington) getrek het in 'n tyd toe daardie stede 'n sentrale kulturele, sosiale, politieke en ekonomiese invloed op die VSA gehad het.[5] In dié stede het Afro-Amerikaners hulle eie invloedryke gemeenskappe geskep.[5]

Beskrywing[wysig | wysig bron]

Ondanks die verlies van huise in die Suide en al die struikelblokke in hulle nuwe tuiste, het die migrasie die verloop van die Amerikaans geskiedenis verander; hulle dade was 'n "verklaring van onafhanklikheid".[6]

Van die vroegste Amerikaanse bevolkingstatistieke in 1780 tot in 1910 het meer as 90% van die Afro-Amerikaanse bevolking in die Suide gewoon.[7][8] Dit was die meerderheid van die bevolking in drie Suidelike state, Louisiana (tot omstreeks 1890),[9] Suid-Carolina (tot die 1920's)[10] en Mississippi (tot die 1930's).[11] Teen die einde van die Groot Migrasie het net meer as die helfte van die Afro-Amerikaanse bevolking in die Suide gewoon, terwyl net minder as die helfte in die Noorde en Weste gewoon het.[12]

Daarbenewens het die Afro-Amerikaanse bevolking uiters verstedelik geraak. In 1900 het net 'n vyfde van Afro-Amerikaners in die Suide in stedelike gebiede gewoon.[13] Teen 1960 het die helfte in stedelike gebiede gewoon,[13] en teen 1970 het meer as 80% van Afro-Amerikaners landwyd in stede gewoon.[14] In 1991 het die Amerikaanse akademikus Nicholas Lemann geskryf:

Die Groot Migrasie was een van die grootste en vinnigste interne massabewegings in die geskiedenis – dalk die grootste wat nie meegebring is deur die onmiddellike bedreiging van teregstellings of verhongering nie. In blote getalle oortref dit die migrasie van enige ander etniese groepe – Italiane of Iere of Jode of Pole – na die VSA. Vir swart mense het migrasie beteken om dit wat altyd hulle ekonomiese en sosiale basis in Amerika was, agter te laat en 'n nuwe een te vind.[15]

Sommige historici tref 'n onderskeid tussen 'n eerste Groot Migrasie (1910-'40), waarin 1,6 miljoen mense van hoofsaaklik plattelandse gebiede in die Suide na noordelike nywerheidstede getrek het, en 'n tweede Groot Migrasie (1940-'70), wat ná die Groot Depressie begin het en waarin minstens 5 miljoen mense uit die platteland na die Noorde en Weste getrek het.[16]

Sedert die Burgerregtebeweging is die neiging omgekeer, met meer Afro-Amerikaners wat na die Suide verhuis, hoewel geleideliker. Dit word dikwels die Nuwe Groot Migrasie genoem en word hoofsaaklik aangedryf deur die ekonomiese probleme in stede in die Noord- en Middeweste, die toenemende aantal werke in die "Nuwe Suide" en die laer lewenskoste daar, familiebande en die afnemende diskriminasie deur wit mense.[17]

Verwysings[wysig | wysig bron]

  1. Glanton, Dahleen (13 Julie 2020). "Returning South: A family revisits a double lynching that forced them to flee to Chicago 100 years ago". Chicago Tribune. Besoek op 22 September 2020.
  2. "The Great Migration (1910-1970)". 20 Mei 2021.
  3. "The Great Migration" (PDF). Smithsonian American Art Museum.
  4. Wilkerson, Isabel. "The Long-Lasting Legacy of the Great Migration". Smithsonian (in Engels). Besoek op 3 Oktober 2019.
  5. 5,0 5,1 Gregory, James. "Black Metropolis". America's Great Migrations Projects. University of Washington. Besoek op 25 Maart 2021.
  6. Wilkerson, Isabel (September 2016). "The Long-Lasting Legacy of the Great Migration". Smithsonian Magazine (in Engels). Besoek op 31 Julie 2021.
  7. Purvis, Thomas L. (1999). Balkin, Richard (red.). Colonial America to 1763. New York: Facts on File. pp. 128–129. ISBN 978-0816025275.
  8. "Colonial and Pre-Federal Statistics" (PDF). United States Census Bureau. p. 1168.
  9. "Table 33. Louisiana – Race and Hispanic Origin: 1810 to 1990" (PDF). Geargiveer vanaf die oorspronklike (PDF) op 27 Maart 2010.
  10. "Race and Hispanic Origin for States" (PDF). Geargiveer vanaf die oorspronklike (PDF) op 7 Februarie 2014. Besoek op 24 Junie 2013.
  11. "Table 39. Mississippi – Race and Hispanic Origin: 1800 to 1990" (PDF). Geargiveer vanaf die oorspronklike (PDF) op 27 Maart 2010.
  12. "The Second Great Migration", The African American Migration Experience (New York Public Library), archived from the original on 12 Maart 2020, https://web.archive.org/web/20200312114233/http://www.inmotionaame.org/print.cfm;jsessionid=f830444661458729315793?migration=9&bhcp=1, besoek op January 17, 2017 
  13. 13,0 13,1 Taeuber, Karl E.; Taeuber, Alma F. (1966), "The Negro Population in the United States", in Davis, John P., The American Negro Reference Book, Englewood Cliffs, NJ: Prentice Hall, p. 122 
  14. "The Second Great Migration", The African American Migration Experience (New York Public Library), archived from the original on 12 Maart 2020, https://web.archive.org/web/20200312114233/http://www.inmotionaame.org/print.cfm;jsessionid=f830444661458729315793?migration=9&bhcp=1, besoek op March 23, 2016 
  15. Lemann, Nicholas (1991). The Promised Land: The Great Black Migration and How It Changed America. New York: Alfred A. Knopf. p. 6. ISBN 0-394-56004-3.
  16. Frey, William H. (Mei 2004). "The New Great Migration: Black Americans' Return to the South, 1965–2000". The Brookings Institution. pp. 1–3. Geargiveer vanaf die oorspronklike op 17 Junie 2013. Besoek op 19 Maart 2008.
  17. Reniqua Allen (8 Julie 2017). "Racism Is Everywhere, So Why Not Move South?". The New York Times. Besoek op 9 Julie 2017.

Skakels[wysig | wysig bron]