Groothertog Georgi Michailowitsj van Rusland (1863-1919)

in Wikipedia, die vrye ensiklopedie

Hierdie naam is volgens die Oos-Slawiese gebruik; die patroniem is Michailowitsj en die van is Romanof.

Georgi Michailowitsj
Groothertog

Huis Romanof
Vader Groothertog Michail Nikolajewitsj
Moeder Prinses Cecilie van Baden
Gebore (1863-08-23)23 Augustus 1863,
Tiflis, Russiese Ryk
Oorlede 28 Januarie 1919 (op 55),
Petrograd, Sowjetunie
Eggenote Prinses Maria van Griekeland en Denemarke

Groothertog Georgi Michailowitsj van Rusland (Russies: Георгий Миха́йлович; 23 Augustus 1863 - 28 Januarie 1919) was die derde oudste seun van groothertog Michail Nikolajewitsj van Rusland en ’n neef van tsaar Aleksander III. Hy was tydens die Eerste Wêreldoorlog ’n generaal in die Russiese keiserlike weermag.

Persoonlike lewe[wysig | wysig bron]

Groothertog Georgi en prinses Marie van Griekeland, wat later sy vrou geword het (1894).

In sy jeug het groothertog Georgi verlief geraak op prinses Nina Chavchavadze, ’n direkte afstammeling van die konings van Georgië, maar hy mag nie met haar getrou het nie omdat dit volgens die familiewette ’n morganatiese huwelik sou gewees het.[1] Georgi was gebroke en het ’n vrygesel gebly tot hy 37 jaar oud was. In 1892 wou hy met prinses Marie van Edinburg trou, maar haar ma het vir haar ’n ander huwelik gereël.[2]

Eindelik het Georgi in prinses Maria van Griekeland en Denemarke geïnteresseerd geraak. Sy was die jongste dogter van koning George I van Griekeland en groothertogin Olga Konstantinowna van Rusland.[3] Sy was nie mooi nie en het nie daarin belanggestel om met hom te trou nie, maar hy het volhard. Sy is verbied om met ’n gewone burger te trou op wie sy verlief was en en het eindelik besluit om groothertog Georgi se huweliksaanbod te aanvaar.[4] Sy het dit duidelik gestel sy is nie op hom verlief nie en die huwelik het eers vier jaar later plaasgevind. Op haar aandrang is hulle op Griekse grondgebied getroud, op 12 Mei 1900. Hulle het daarna in Rusland gaan woon en Frans met mekaar gepraat.

Die paartjie het twee dogters, Nina en Xenia, gehad.[5] Die huwelik was egter ’n mislukking. Maria het nooit van Rusland gehou nie en eindelik het hulle vervreem geraak. In Junie 1914 het Maria haar twee dogters Engeland toe geneem. Kort daarna het die Eerste Wêreldoorlog uitgebreek; die hertogin het haar nie teruggehaas Rusland toe nie en later was dit te gevaarlik om te probeer teruggaan.[6] Groothertog Georgi het nooit weer sy vrou of kinders gesien nie.

Nadat hy deur die Bolsjewiste gevange geneem is, is hy in Januarie 1919 tydens die Russiese Rewolusie as lid van die Romanof-familie buite die Petrus-en-Paulusfort in Sint Petersburg deur ’n vuurpeloton doodgeskiet saam met sy broer groothertog Nikolaas en twee van sy neefs.

Sien ook[wysig | wysig bron]

Verwysings[wysig | wysig bron]

  1. "The Grand Dukes": David Chavchavadze, p. 184
  2. "The Grand Dukes": David Chavchavadze, p. 184
  3. "The Grand Dukes": David Chavchavadze, p. 184
  4. " A Romanov Diary": Grand Duchess George of Russia, p. 51
  5. "The Grand Dukes": David Chavchavadze, p. 184
  6. " A Romanov Diary": Grand Duchess George of Russia, p. 176

Bronne[wysig | wysig bron]

  • Chavchavadze, David. The Grand Dukes, Atlantic, 1989, ISBN 0-938311-11-5
  • Prinses Maria van Griekeland en Denemarkte. A Romanov Diary: the Autobiography of the Grand Duchess Marie Georgievna of Russia. Gilbert's Books, 2012. ISBN 978-09865310-6-4

Skakels[wysig | wysig bron]