HMS Thetis

in Wikipedia, die vrye ensiklopedie
Jump to navigation Jump to search
HMS Tunderbolt

Die HMS Thetis was 'n Britse duikboot wat op 1 Junie 1939 tydens 'n toetsvaart gesink het, met 'n verlies van 99 persone. Dit was die derde duikboot wat in die T-klas vir die Britse Vloot voltooi is. Die duikboot is te water gelaat in 1938 en vandaar het dit sy finale aanvaardingstoetse ondergaan tot in Mei 1939. Die duikboot se bemanning het uit 5 offisiere en 48 manskappe bestaan, onder aanvoering van lt. kommandeur Guy Bolus.

Die finale duiktoets is uitgestel tot 1 Junie 1939 in Liverpoolbaai. Die Thetis verlaat Birkenhead net na 09:00 met 'n groot aantal addisionele persone aan boord; in totaal 103. Die weer was goed, die see kalm met 'n ligte oostewind wat gewaai het. Almal aan boord het uitgesien na die vaartog. Die Thetis was vergesel deur die Grebecock, 'n tweejaaroue sleepboot met 'n bemanning van sewe onder beheer van lt. Dick Coltart. Die teenwoordigheid van die Grebecock was deel van die transaksie met die skeepsbouers, Cammell Laird. Die Grebecock moes ander skepe waarsku dat die duikboot in die omgewing is asook om passasiers van die Thetis op te laai wat nie meer met die tog wou voortgaan nie.

Die noodlot slaan toe[wysig | wysig bron]

Die Thetis sein aan die Grebecock dat hy gaan duik en om 14:00 gee Bolus die sein om te duik. Aanvanklik weier die duikboot egter om te duik; maar minute later duik die duikboot skielik en daar word aanvaar dat alles normaal is.

Maar alles was nie normaal nie. Binne-in die duikboot was die nommer 5-torpedobuis (533 mm) oop aan die seekant en die agterste deur van die buis in die duikboot was ook oop weens 'n foutiewe instrument. Derhalwe het seewater in die duikboot ingestroom en die Thetis het gesink. Soos die tyd verbygaan word Coltart oortuig dat iets verkeerd geloop het met die Thetis. Hy stuur 'n boodskap na die duikbootbasis te Fort Blockhouse. Ongelukkig kry die bode wat die telegram moet aflewer se fiets 'n papwiel en die boodskap word vertraag. Toe dit uiteindelik afgelewer word, word vinnige torpedojaers na die ongelukstoneel gestuur en die RAF stuur vier Anson vliegtuie om te help met die soektog. 'n Bergingskip, die Valiant, word vanaf Liverpool gestuur; teen hierdie tyd was dit reeds agt ure sedert daar laas met die Thetis gekommunikeer is.

Drie ure later sien 'n uitkykwag, van die torpedojaer Brazen, iets in die verte op die horison. Dit was 'n 5,5 m gedeelte van die agterstewe van die duiboot wat teen 'n hoek uit die water gesteek het. Die duikboot lê teen 'n hoek in water wat 45 m diep is, ongeveer 24 km vanaf die kus van Wallis. Die toestand in die duikboot was haglik, die lug was besmet en het begin opraak. Bolus besluit om mense via die Davis Submerged Escape Apparatus (DSEA) uit die duikboot te kry. Min mense in die duikboot was egter opgelei om die toestel te gebruik. Vrywilligers stap na vore en kapt. Joe Oram, in bevel van die 5de Flottielje, en lt. Woods ontsnap suksesvol uit die duikboot. Hulle word opgepik deur die Brazen en kon toe verslag doen oor die situasie in die duikboot. Slegs vier persone ontsnap uit die duikboot.

Teen daardie tyd was reeds ses torpedojaers, vyf sleepbote, die Llandudno - 'n lewensreddingboot en die bergingskip Vigilant versprei om die Thetis. Hul laaste plan was om 'n gat in die Thetis se kant te sny met 'n asetileen vlam maar teen 15:00 op 2 Junie breek die kabels en die Thetis sink tot op die bodem en neem die 99 persone aan boord saam met haar. Na nog pogings om die boot te bereik is die reddingspoging laat vaar teen die volgende dag. Familielede van die oorledenes het 'n hofsaak van nalatigheid gemaak en is ses en 'n half jaar later is die saak afgekeur deur die hof.

Die Thetis is drie maande later na die oppervlakte gebring en die lyke aanboord is begrawe. Die duikboot is herstel en herdoop as die HMS Thunderbolt. Die Thunderbolt het 'n klompie suskesvolle maande in die Middellandse See gehad voor sy deur 'n dieptebom vir die tweede en laaste keer gesink is op 14 Maart 1943.

Bron[wysig | wysig bron]

  • The Illustrated Encyclopedia Of Destroyers Frigates & Submarines, Bernard Ireland en John Parker, 2015, ISBN 978-0-85723-601-2