Harold Botha

Ds. H.C. Botha.

Ds. Botha se oupa aan vaderskant, M.C. Botha, was leraar van Knysna van 1866 tot 1884 en daarna van St. Stephen's tot sy aftrede in 1908. Hy is oorlede op 17 Junie 1915.

Ds. Botha se vader, H.S.M. Botha, was leraar van die NG gemeente Rouxville van 1907 tot sy aftrede in 1943. Sy enigste ander gemeente was Ugie van 1906 tot sy bevestiging op Rouxville.

Ds. Botha se oupa aan moederskant, ds. J.F. Marais, was leraar van Molteno van 1885 tot 1899 en daarna van Dordrecht tot sy aftrede in 1921. Hy is oorlede in sy 99ste lewensjaar.

Ds. Harold Christian Botha (2 Desember 1909 – Marble Hall, 7 November 1983) was predikant in agt gemeentes van die Nederduitse Gereformeerde Kerk, op een na almal in die destydse Wes-Transvaal.

Ds. Botha was ’n skakel in ’n hele ry predikante, want sy grootvader was ds. M.C. Botha, wat 18 jaar lank in die NG gemeente Knysna en toe 24 jaar lank in die NG gemeente St. Stephen's gestaan het, terwyl sy vader, die bekwame ds. Harold S.M. Botha nagenoeg sy hele bediening aan die Vrystaatse gemeente Rouxville (1907–1943) gewy het. Daarby was sy oupa aan moederskant, ds. J.F. Marais, 36 jaar lank predikant in twee Oos-Kaapse gemeentes en toe nog 33 jaar rustend tot hy oorlede is in Oos-Londen in sy 99ste lewensjaar. Hierdie lyn is voortgesit deur twee van ds. Botha se seuns wat ook predikant geword het.

Ná aflegging van die kursus aan die Stellenbosse Kweekskool in 1934 het hy ook die grade M.A. en M.Th. verwerf. Nadat hy hulpprediker in die NG gemeente Johannesburg was, is hy op 18 Januarie 1936 georden en as leraar van Biesiesvlei bevestig. Daarna bedien hy agtereenvolgens die gemeentes Vorentoe (1942), Coligny (1943), Zeerust ( 1948), Lichtenburg-Oos (1969) tot hy op 16 Februarie 1975 sy emeritaat aanvaar het.

Hy en sy vrou het hulle daarna in Pretoria gevestig. Hy is oorlede op Marble Hall in die ouderdom van 82.

Bronne

• Maree, W.J. 1985. Jaarboek 1985 van die Nederduitse Gereformeerde Kerke. Pretoria: Tydskriftemaatskappy van die Nederduitse Gereformeerde Kerk.