Hastings Ndlovu

in Wikipedia, die vrye ensiklopedie
Spring na: navigasie, soek

Hastings Ndlovu (196116 Junie 1976) was 'n skoolseun wat in die Soweto-opstand van 1976 gedood is.

Op 16 Junie 1976 het die polisie van die Orlando-polisiestasie onder leiding van kolonel Kleingeld op studente in Soweto losgebrand. Hulle het teen 'n regeringsbesluit dat beide Afrikaans en Engels op 'n 50-50 basis as voertale in die Bantoe-onderwys gebruik moet word betoog. Ndlovu was die eerste persoon wat in die oproer geskiet is. Sy dood het egter nie soveel aandag getrek nie, aangesien dit nie soos Hector Pieterson se dood op film vasgelê is nie. Volgens kolonel Kleingeld se getuienis tydens die Cillié-kommissie was Ndlovu regstreeks by die aanhitsing van die skare betrokke.[1]

Hoewel Ndlovu eerste geskiet is, is dit onseker wie eerste gesterf het. Hector Pieterson is met sy aankoms by die kliniek dood verklaar, terwyl Ndlovu eers 'n rukkie nadat hy in die kliniek opgeneem is gesterf het. Ndlovu het in 'n koma gegaan en het nie weer herstel nie. Dit is dus nie duidelik wie eerste gesterf het nie, maar Pieterson was waarskynlik die eerste slagoffer van die dag se gebeure.

Hastings Ndlovu is deur sy ouers, drie susters en 'n broer oorleef. Sy susters verlaat die land na die gebeure, maar het 'n paar jaar later na Johannesburg teruggekeur.[2]

Ndlovu is saam met Hector Pieterson by die Avalon-begraafplaas in Soweto begrawe. 'n Blou gedenkplaat is op 16 Junie 2012 by sy huis te Thabete-straat 7235, Soweto, Johannesburg aangebring om sy dood te gedenk.[1]

Verwysings[wysig | wysig bron]

  1. 1,0 1,1 "Home of Hastings Ndlovu". blueplaques.co.za. Verkry op 20 Junie 2013. 
  2. Hastings: forgotten hero of 1976 South Africa Info, 15 Junie 2006