Hester Snyman

in Wikipedia, die vrye ensiklopedie
Jump to navigation Jump to search
Hester Snyman (née Kruger).

Hester Anna Snyman (gebore Kruger, Steynsburg, 8 Augustus 1904Viljoenskroon, 1 September 1991) was van haar huwelik in 1929 tot 1946, toe haar man, dr. W.J. Snyman, benoem is tot hoogleraar aan die Teologiese Skool Potchefstroom, ’n predikantsvrou in twee gemeentes van die Gereformeerde Kerk.

Hester Kruger se ouers was Gert Hendrik Jacobus Kruger en Jeanette Francina de Klerk, wat op die plaas Kalkoenkrans geboer het. Sy het haar skoolopleiding aan die CNO-skool op Steynsburg ontvang en haar musiekopleiding aan die Konservatorium vir Musiek op Stellenbosch ontvang in die dae toe daar binne-in Doppers (lidmate van die Gereformeerde Kerk) in die Suidwes-Kaap was. Nadat sy vier jaar musiekonderwys op haar geboortedorp gegee het, is sy op 30 Desember 1929 daar met Willem Snyman getroud in die tyd dat hy predikant van die Gereformeerde kerk Venterstad was, nes sy oupa tot 1915. Sy was 25 en haar bruidegom 30. Haar skoonmoeder, Getruida Adriana Snyman, wat 10 jaar vantevore gesterf het, was ’n dogter van die Van Rooy-stamouers in Suid-Afrika, J.C. van Rooy en Anne Holsters. Haar man se vader, dr. P.C. Snyman van die gemeente Steynsburg, is in 1915 oorlede en so ook dié se oupa, ds. W.J. Snyman van die gemeente Venterstad, na wie Hester se man genoem is.

Uit hul huwelik is vier kinders gebore, van wie die eerste drie op Venterstad en die laaste op Burgersdorp: Philippus Christoffel (gebore 25 Januarie 1931), Jeanette Francina (gebore 15 April 1934), Gert Hendrik Jacobus (gebore 25 September 1937) en Gertruida Adriana (Truidie, gebore 22 Desember 1940 en oorlede op Bultfontein op 17 Junie 2013). Die Teologiese Skool se gedenkboek My erfenis is vir my mooi meld dat prof. Snyman se oudste seun ds. P.C. Snyman was, maar hul seun Philippus Christoffel was in werklikheid ’n staatsamptenaar.[1]

Terwyl ds. Snyman twee jaar lank in Nederland studeer het, het Hester Snyman haar musiekstudie voortgesit. Die egpaar het altesaam 15 jaar op Venterstad en anderhalf jaar te Krokodilrivier gewoon, waarna dr. Snyman hoogleraar aan die Teologiese Skool geword het.

Bronne[wysig | wysig bron]

  • (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.

Verwysings[wysig | wysig bron]

  1. (af) Die nasate van Gertruida Adriana Snyman. URL besoek op 8 Desember 2017.