Hugenotevereniging van Suid-Afrika
Die Hugenotevereniging van Suid-Afrika het ten doel die bewaring van die erfenis van die Hugenote wat hulle in 1688 in Suid-Afrika gevestig het.
Die genootskap doen daarom uitgebreide historiese, sosiologiese en veral genealogiese navorsing aangaande hierdie groep setlaars en hul nageslag. Dit stel belang in die Franse taal en kultuur sowel as die bewaring van artefakte en geboue in die Drakensteinvallei wat met die Hugenote in verband staan.
Dit is in 1953 gestig en het daarna bygedra tot die heropbou van Saasveld as die Hugenote-gedenkmuseum en die onderhoud van die Hugenotemonument in Franschhoek. Verskeie artikels in die museum is op bruikleen van die vereniging.
Jaarliks word ‘n aantal nuusbriewe en ‘n bulletin gepubliseer waarin veral verslag gedoen word oor die vordering in die stamboomondersoek van die Hugenote-nasate.
Dr. D.P. de Villiers was van 1953 tot 1962 die eerste voorsitter. Hy is opgevolg deur Steph F. du Toit. Latere prominente lede is Kay de Villiers en Christo Viljoen. Die adminstrasiekantoor is in Franschhoek.
Enkele andere Hugenote-organisasies bestaan in die buiteland.