Ivy League

Die Ivy League is ‘n groep van 8 elite-universiteite in die noordooste van die VSA. Hulle word beskou as die mees toonaangewende universiteite in die wêreld weens hul besonder hoë akademiese standaarde en prestasies.

Universiteite

Yale-universiteit, Harvard-universiteit, Princeton-universiteit, Brown-universiteit, Cornell-universiteit, Columbia-universiteit, Dartmouth College en die Universiteit van Pennsylvania is almal privaat universiteite wat groot klem lê op navorsing deur hul personeel en studente. Omdat daar gestreef word na uitmuntendheid en mededingendheid kan al die universiteite uiters kieskeurig wees in hul toelatingsbeleid van studente. Cornell aanvaar met sy 8.4% die meeste nuwe studente. Harvard aanvaar slegs 3%. Al hierdie universiteite staan hoog op alle wêreldranglyste van universiteite. Hierdie agt het 16 van die VSA se presidente opgelewer. Die HYP, ook bekend as die Big Three, naamlik Harvard, Yale en Princeton, word beskou as die beste drie universiteite in die VSA.

Naam

Kleiner en minder bekende universiteite se studente het vroeër op die sportveld na hul opponente van hierdie groot agt spottend as die Ivies verwys, omdat hierdie ouer universiteite se geboue se mure dikwels oortrek vas met dik ou klimplante. ‘n Ander onwaarskynlike verklaring is dat die naam ontstaan het uit die studente se spottende Engelse uitspraak van IV, die Romeinse syfer vier. Dit sou verwys na die eerste vier privaat universiteite aan die ooskus van die VSA, naamlik Harvard, Yale, Columbia en Brown.

Geskiedenis

Sewe van hierdie agt Ivies is tussen 1600 en 1800, die koloniale tydperk in die geskiedenis van die VSA, gestig. Harvard dateer uit 1636. Cornell het in 1865 begin.

Ivy Plus

Die Ivy Plus-groep sluit ook in MIT (Massachusetts-tegnologie-instituut), Stanford-universiteit, Duke-universiteit en die Universiteit van Chicago. Hulle geniet net soveel aansien in die wêreld as akademiese instellings.

Ander groeperings van universiteite

• Oxbridge
• Coimbra-groep
• Russellgroep
• Redbrick-universiteit
• Group of Eight
• Matariki Network of Universities
• PluS Alliance
• Universitas 21
• Worldwide Universities Network
• Vereniging van Afrika-universteite (Association of African Universities)
• African Research Universities Alliance

Bronnelys

• bestcolleges.com/blog/what-is-ivy-league/